الأحد , مايو 16 2021
جرجس ثروت عضو اتحاد كتاب مصر

لحظة ضياع النعجة بين السباع !!!

بقلم : جرجس ثروت

في الفيلم بتاع كركر لما دكتور مستشفى المجانين كان مع أبوه الحناوى اللي عاوز يطلع ابنه مش مجنون , ولما عرض عليه الرشوة آلاف الجنيهات قاله : وأقول إيه لزمايلى وتلامذتي واقرانى وضميري , رد عليه وقاله : 23 جنيه , وزعل منه ازاى يرشيه بمكتبه ولكن الحناوى قاله : اعتبرهم تبرع منى للمستشفى , حلوة الصيغة دي !!! افتكرت زمان لما كان جدي يقول للأعور أنت اعور في عينه مع انه كان على قد الحال لا جاه ولا سلطان , وكان يتضرب بيه المثل في الهيبة قبل ما تكبرالخيبة , قالها للعمدة أنت اعور يجى مية مرة وقالها للمأمور العفش قبل ما يغور , ولا خاف السلاحليك ولا التخشيبة كان يقول : عمري هعيشوا كام مرة هقول الحق والرزق على الله  مع أن شيخ البلد كان معاهم موالس ووسطهم جالس وياما لجدي هدد وقاله : هتجيبها لروحك يا عم امجد , وعشان كدا كان الحال أحسن والحق صوته عالي وله هيبة لا تغلبه إكرامية ولا سلطة ولا عنجهية , لكن الحال أتغير ولما زاد العور بقى يتقال للواحد منهم أنت كحيل العين , ولما سألت نفسي ليه أنا مش قادر أبقى جدي ردت على نفسي معاك عيال تربيها ومش ناقصة مشاكل خليهم يمرعوا فيها , ولما فكرت زين ومليح لقيت الكلام يمكن يبان صحيح لازمن نتغزل في جمال العور ونسكت , ولما قعدت اخد وادى لقيت أن العيال برضوا هتتبهدل من بعدى ومش هيفضل فيها غير عيال العور والأشكال اللي تغور , وهو هو الضياع طالما بقيت نعجة وسط السباع ويجى صاحبى يقولى مع العاصفة لازم توطى عشان تعدى , واوطى لغاية ما اتعودت على الظهر المحنى واستكتروا على الحيطة لما جنبها أعدى وبقيت اتداس بمناسبة ومن غير والمهانة بقت كتير بعد ما كنت فاكر أن هرتاح منهم وأكفى خيري شرهم , وطلع المجنون بعد ما طلعوا القرشين وساد الجنان وبقى العليل هو الزين والعاقل يسكت بقرشين , لغاية ما بقى المستقبل اعور والولد من دول على الشغل بيدور بعد الشهادة الكبيرة المتعلقة على الحيطة وأمه تتطلع من الشباك وتسمع الزيطة , اتارى ابن البيه الأعور اتنازل وقبل الوظيفة مكان ولدى المتكحور وليه وليه ما يتوظف ابن الباشا دا تربية عز وأتربى على البغاشة , وقولنا زين يمكن العين الواحدة زى اللي خلفوه تتملى وما يمدش إيده في جيب الغلبان وعليه يفترى , لكن كلها كام يوم كان اتقلب فيهم مارد وقالك البحر يحب الزيادة وحمامة الوش فرت وزى المنشار طالع نازل واكل , ويقول ضميري وبكام ولو عملت شريف مليون هيقبضوا منه غيري وأنا أولى بالحسنة , يعنى هعدل الكون وأنا بس اللي من الفسدة , وياما صيغ كتيرة اليومين دول تخلى البال يرتاح للمال الحرام وعلى القلب ينزاح والكرش يوسع ويبقى براح !!! وبعد اللي وصلنا له لازم الأعور يرجع يسمعها من تانى في عينه وقدام الخلق يتقال له أنت طماع وخاين وانانى , يا آخى لما تكون اليد مليانة ولا الماعون لازم يكب على التانى , وافتكر يوم هتطلع منها بيدين فارغة وكفنك ماله جيبين , ولازم صوت الحق يرجع يجلجل ويدوى من تانى ولو ما رجع الأعور يعرف مقامه يبقى البرش مكانه , وتغور معاه كل صيغة ويتقفل باب الميغة !!!  

13020584_990275537717637_852127804_n

شاهد أيضاً

أبونا صرابامون الشايب ظاهرة إنسانية

جميل نصري امين من الصعب جدأ أن تقول كلمة وداع لرجل مثل أبونا صرابامون الشايب …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *