السبت , يونيو 6 2020

لو حتشترى سيارة مستعملة خد بالك من الحاجات دى .

1- مش من المستحسن انك تشترى عربية راشة جوا (يعنى راشه دواخل زى حوض الموتور وداير الباب والشنطة ) لان العربية بتبقى عاملة حادثة محترمة ورحت عند الاسطى رفرف السمكرى قعد يستعدلها ويعملها زراجين واترشت عشان تدارى اماكن اللحمات وبتبقى واخده معجون

٢ – نيجى بقى للنظرات الفنية افتح الكبوت بص على فردة الشاسية كويس شوفى فيها خبطه واخدة لحام او في حتة مكسورة فى فرق جامد بين الفوانيس والرفارف او فى رفرف مش مستريح مش قاعد صح فى مكانه او الكبوت نفسه واخد بنط لحام او معجون

كل دى علامات ان العربية اتعمل فيها شغل قبل كده من قدام او كانت واخده خبطه جامدة والسمكرى معرفش يقفل صح وبردوا القى نظره خاطفه على الشنطة لو لاقيت ارضية الشنطة فى حاجه زى كرمشة كده اعرف ان العربية كانت مخبوطة جامد من ورا
ودا هياثر على العفشة
وهيخلى العربية عربية مش تمام وسيبك منها
٣ _نيجى للقلب بقا ( الموتور )

تدور الموتور تسمع صوته لاقيت ( دخنة _ ترزيع _ نقر )سيبك منها خلص وافلت منها متشتريش

بص على الموتور لاقيته غرقان زيت اعرف ان الموتور بينفخ وهيبدا يطلب طقم شمبر

كمان خد مقاس زيت للعربية شوف اخبار الزيت ايه

٤_ وخد بالك لو الاسطى لمبه الكهربائى عمل واجب مع صاحب العربيه هتبص
على الضفيره اللى فى الحوض كويس واللى تحت الطابلوه
لو لاقيت وصلات كتير وشريط لحام كتير اعرف انه فعلا عمل واجب

٥ – العربية اللى راشة حزام نضافه من برا مش
كخه والله

بس برضو خد بالك العربيه لازم تبص عليها كويس عشان فى ناس بتبقى عمله حوادث صعبه وشاده العربيه عند ناس حريفه ويقولك فبريكا او راشه حزام نضافه

٦ – نيجى بقى للفتيس
لو مانيوال المفروض تدوس دبرياج وتدى كل الغيارات من غير ما فى غيار يزعق او يطلع صوت او يرد تانى لوحده
وتكون الاسطوانه والديسك حالتهم كويس وجرب تدى الرابع مثلا وتسيب دبرياج لو العربيه بطلت يبقى كده طقم الدبرياج سليم ولو مبطلتش يبقى كده الاسطوانه والديسك خلصانين
لو اوتو اطلع جرب العربية المفروض الفتيس يقلب الغيارات معاك و ميطولش
ولا تحس بهبدا جامدة فى تقليب الفتيس
ولو استيبترونك جرب الغيارات بتاعته بردوا
وخد مقاس زيت للفتيس بردوا

٨ – مطب ناس كتير اوى بتقع فيه وانه يشترى العربية والتكييف بتاعه عطلان على انه عايز يتشحن لوسمحت قبل ما تشترى العربية خد صاحبها واطلعوا اشحنوا التكييف عشان تضمن

٩-اركب العربية واطلع جرابها وشوف فى اصوات غريبه انت سامعها او العربية بتحدف ولا حاجه وجرب فراملها كويس وتأكد منها وبص على العدادات كويس شوفها كلها شغاله فى عداد بيعلق ولا لا وكل الوظائف جوا العربية شغاله ولا

10- كل لما اللعب والشخليل اللى فى العربيه زادت متفرحش وابدا اقلق لان العربيه لو متبهدله صاحبها هيلعب فيها شويه عشان يعلى سعرها يعنى تلاقيه مركب طقم جنط سبور على عدة صوت جامدة على شوية انوار ولعب كده بحيث انه يشدك ليها ويخليك تنسى انك تدور على الاساسيات

شاهد أيضاً

القبض على عضو برلمان فيدرالي ليبرالي من أصول عربية

قامت الشرطة الكندية بالقبض علي عضو البرلمان الفيدرالي ذو الأصول العربية “مروان طبارة” بتهمة الإعتداء …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *