جريدة الأهرام الجديد الكندية 
مقالات مشابهة
اسمع منى يا عم
هم و غم لم يتلم
دى عيشة الغلابة
اللى محفوظة صم
صدقنى فعلا صحيح
بيوتهم من صفيح
تطيرها نسمة هوا
مش هقولك ريح
مش لاقيين العيش
غطاهم شوية خيش
بيكملوا عشاهم نوم
أصل فعلا مفيش
اسمع كمالة الموضوع
حياتهم كلها جوع
الفرح و السعادة و الراحة
بالنسبة ليهم ممنوع
هواهم دايما معكر
ميعرفوش الهوا المعطر
ريح النسمة الحلوة
عمره عليهم ما مطر
أول ما يبدأ يومهم
يصحوا من نومهم
على مرار طافح
غير طبعا همومهم
ليه الناس دية
دايما هما الضحية
ليه محدش فيهم
ليه اى دية
تمنهم دايما رخيص
ظالمهم كل رئيس
عمر ما حد كان
بالناس دول حسيس
أقسم برب العباد
قلبى عليهم متقاد
أصل حياتهم كلها
سواد فى سواد
امتى تحلى أيامهم
اللى النصيب ظلمهم
ولا بقى خلاص
وجودهم زى عدمهم
كلمات : محمد فتحى
