الخميس , سبتمبر 7 2017
الرئيسية / مقالات واراء / كنت واقف من بعيد .
ريهام زاهر

كنت واقف من بعيد .

كنت واقف من بعيد
حاسب وقتك بالثواني
حاسب امتي راح تخش
علي النفوس و ع المباني !
عارف أنك راح تقابل
ناس في حالها واقفين يصلوا
شايل سلاحك و القنابل
شايل جواك قلبك و شره !!
دخلت جوة …سمعت قوة ..
صوت صلاة
ناس بتعبد الإله…
ناس في حالها …مش في بالها
أي كره و أي شر
دخلت بصيت … ع البشر
سمعت اية خلاك تفكر ؟!!
انك تعذِّب ….او تفجّر
دا انت لو قلبك حجارة …
كنت دُبت !
كنت تُبت لاجل الطهارة
لاجل البراءة و الخشوع
لاجل البخور ويا الشموع
لاجل الدموع !
لاجل طفلة واقفة تصلي بكل حب
علي شعرها محطوط ايشارب ..
هو انت داخل معركة من جوة حرب ؟؟!
دخلت جوة بالقنابل … و بشرور متأصلة
دخلت وسمعت بودانك.. صوت تسبيحهم و الصلاة !
قررت تقتل الملايكة.. و الزهور
قررت تواجه بضلمتك.. أقوي نور
بس اللي انت متعرفوش
و معشتهوش و مدوقتهوش..
إن احنا عايشين بيه و ليه
و إن الموت بنشتهيه…
معني.. انت متفهموش !!
الصليب فوق الكتاف
و الوعد : مش ممكن نخاف
ايوة نتجرح و نحزن … ايوة نبكي بالدموع
بس الإيمان فوق الألم مرفوع !
فوق الوجع بندوس…
أصل السما في قلبنا أعظم من كل الكنوز !!
و الموت ف عينينا مكسب مش خسارة …
اصل السما فرحة و طهارة
في السما راح نرنم بالسرور
راح نعيش من غير شرور
و لا غرور..
ولا أي غل او ضغينة
…. بس نور
في السما مفيش ألم و لا تعب
و لا زعل .. و لا غضب !!
… بس حب
السما ..فوق تصور اي قلب !
السما درجة عالية من النقاء
عشان كده تلقي الموت بالنسبة لينا
هو شهوة و اشتياق !!!
#Reham_Zaher
Dec.11,2016
#مذبحة_البطرسية

555

شاهد أيضاً

أشرف يسى يكتب : العبوا غيرها ..الروهينجا ليست إلا ملهاة

المفترض أو حسب ما هو متوقع أن تخرج علينا المؤسسات الإسلامية العالمية لتعتذر و هي …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.