الثلاثاء , مارس 19 2024

ماجدة سيدهم تكتب : ” حقى “

حقي أعيش صح .. بيتي تدخله الشمس ..يطل على بنايات جميلة ملونة ..عيني تشوف زرع وريحان ولبلاب .اشم هوا نقي ..بارد ولذيذ ..افتح الحنفية الاقي ميه سخنة وباردة وصابون معطر .. شارع نظيف ..مرصوف ..مش مظلم ..من غير متسولين ولا بخور ولا سبح وتعاويذ وكتب جنس رخيص .. من غير مخلفات..شارع مليان شجر ونافورات ملونة..اشوف ناس نشيطة ..مشيتها حيوية وعلى خدودها صحة.. وشوش بتضحك وأغاني مشجعة ..آكل أكل نضيف وصحي ..الخضار ف السوق مرصوص ويفتح النفس .اشتري حاجتى من غير مذلة او مهانة ..البس لبس أنيق والوانه مفرحة ..مش شوية هلاهيل ملخبطة.. غالية نار ..اتفرضت عليا .. وميت حته فوق بعض.. لا لون ولا شكل .. من حقي اتعلم في مدرسة متطورة و جديدة.. ومدرسين متعلمين وفاهمين .. يصاحبوني ويضحكوا ف وشيى ..يكتشفوا مواهبي ويدعموني .. أعرف تاريخ حقيقي من غير زيف وجغرافية كل حباية رمل على ارضي ..اتعلم الانتماء لنفسى ..لعيلتي ولشارعي ولوطني وللحياة ..اتعلم احترم كل عمل و انت كمان تحترم وتقدر عملي البسيط ..من حقي اتعلم أن أحترم الأضعف بدل ما تعلمني أضحك وأتف عليه وأتريق على عجزه ( الاعمى ..او الاحول ..ابو نص لسان ..الاعرج ).. من حقي اعرف ازاي انطلق واتجن وابتكر .. احس قيمة الوقت . .اتعلم سلوك وذق وفنون وفولكلور ومزيكا ورقص..وازاي التزم اغسل اسناني وأقص ضوافري وماستناش الخميس علشان اخد دش .. ولما احط عطور ابقي شبه الورد ولما أحب ما جرحش قلب حد.. وأن الشارع مش لقضاء الحاجة.. . .من حقي اتعالج في مشفيات ادمية ..ممرضات يشرحوا القلب فاهمين شغلهم بجد ..ودكاترة بتشخص صح وعلاج بجرعات صح ..من حقي أخف .. الطبيعي أكون سليم. . من حقي لما اركب مواصلات اسمع صوت شادية ومحمد فوزي وحورية حسن وقنديل ومنير والحجار كمان ..ولما اطلع الاسانسير اسمع مزيكا وطبلة جنان .. من حقي لما ادخل السوبر ماركت تعطيني سلع صالحة مش مكتوب صلاحية فوق صلاحية منتهية .. من حقي اتفرج على دراما راقية..تحترمني .وتزرع فيا الذوق والجمال وحب الحياة والطموح.. وأن مافيش مستحيل وازاي اعيش الانسانية ازاي اعيش،انسان .. وكمان وكوميدية تطلع الضحكة م القلب …من حقي في الاجازات اخرج لمتنزهات وجناين ترد الروح ومنسقة ونظيفة ..واحضر مسرح وادخل سيما وبار ..من حقي اضحك بعلو الصوت والعب وأعشق ف العلن ..من حقي ماهربش من اي،مشكلة بالنوم والأكل والرغي..ولا اخاف مطر الشتا وقفلة الشوارع .. من حقي اخلص أوراقي بشكل حضارى من غير معاناة القهر والزحمة وموظفين مش فاهمين حاجة ف اي حاجة من حقي اشتغل شغل بحبه واقبض مرتب كافي .. واسمع اخبار وتصريحات حقيقية. .اشوف مسؤولين مش كدابين ونصابين وضلالية.. .أنا مش رقم ..يترص ..يجي هنا على جنب ..أنا انسان ..انا الوطن ..انا التاريخ ..من حقي أعيش صح ..من حقي أكون أنا. لأني ببساطة استحق..البداية كدا وحا تفضل كدا .. دا حق مش طموح .. ولما أنا التزم و ادفع من لحمي تمن حقي ومالقيش حقي ..تبقى حضرتك حرامي خطير وسارق حقي ..انا عاوزة منك حقي ياحرامي حقي .. ومش حاسيب حقي من اللي بيسرقوا كل يوم حقي .. لانه ببساطة حقي ..

شاهد أيضاً

عز توفيق

في علم الطاقة البشر ثلاثة أنواع

عز توفيق النوع الأول تشحن منه طاقة إيجابية بمجرد سماع صوته أو التعامل معه .. …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.