الجمعة , أكتوبر 22 2021
جمهور الزمالك

236 محتجز من جمهور الزمالك وأسرهم يتسائلون أين نحن من قانون بلدنا ؟

قبل ما تجاوب عايزك تعرف أن فى٢٣٦ أم رفعت شعار عيدهم فى الزنزانه عيدهم مش معانا وباتوا بجوار الحجز عشان يباتوا جنب ولادهم ، فيه ٢٣٦ أسرة العيد معداش عليهم عشان أولادهم وأشقائهم فى الحجز ، الطلاب والمهندسين والدكاترة والفنانين بقوا للأسف قاعدين نايمين وأكلين مع المجرمين عشان ماتش كورة آه والله ماتش كورة ، وتم القبض العشوائى عليهم ، ياريت نحس ببعض

لما أم ابنها شهيد فى الجيش تلاقى أبنها الثانى محبوس الأم دى ماتت بقهرتها على أبنها ولحد دلوقتى أبنها التانى جوه فى الحجز ميعرفش أنها ماتت ،

عارف يعنى أيه شاب ( راجل بجد ) مشرف أتوبيس لقى فى أتنين ناقصين وعشان هو راجل رجع يسال وخد واحد صاحبه ضابط معاه اتسكوا الأثنين وصاحبه الضابط يخرج بالكارنية ومن ساعتها هو مشفش الأسفلت ،

عارفين يعنى أيه واحد عايش بربع كليه وعامل أكثر من عملية وبطنه كلها خياطات ، وميقدرش أنه حتى يبذل المجهود الطبيعى ،

عارفين يعنى سواق أهلاوى بيسعى على أكل عيشه كان موصل شباب مشجعين بعربيته اللى عليها أقساط من ساعتها مرجعش

عارفين يعنى أيه واحد مركب شرائح ومسامير فى جسمه ميقدرش يمسك قلم بأيده هيكسر ازاى

عارفين يعنى فى واحد يبقى بيصرف على أسرة كاملة أخواته البنات ووالده ومراته وعرف أن مراته حامل قبل الماتش بيوم وراح مرجعش من ساعتها وأخواته البنات لاحول لهم ولا قوة

عارفين يعنى واحد أتاخد عشان خلع التيشرت ورايح يغسل وشه اتاخد من ايد صاحبه

عارفين يعنى ايه واحد عامل عملية ناصور ميقدرش انه يجرى وكان بينزف فى المديرية من ساعتها راح مرجعش ،

عارفين يعنى أيه فى أهالى بتبات قدام السجن فى الشارع عشان مفيش فلوس للمواصلات عشان من محافظات بعيدة ،

عارفين يعنى أيه أن فى طلاب ثانوية عامة محضروش التنسيق بتاعهم عشان كانوا فى السجن ، عارفين يعنى أيه واحد عنده صرع ممكن يبلع لسانه فى اى لحظة ويموت وجاتله النوبة أكثر من مرة بس الرجالة اللى معاه بيلحقوه ،

عارفين يعنى أيه أطفال تحت السن بقالهم شهرين محتجزين عشان تم القبض عليهم بطريقة عشوائية ، مستحيل الايد اللى تشفى مريض أو بتبنى البلد أو بتأكل عيش حلال مستحيل أنها تخرب ، الايد اللى تبنى عمرها ما تكسر أبد

ياريت نحس ببعض أكيد فى كتير ميعرفوش الكلام ده عشان لسه متعرضوش للظلم اللى أحنا فيه بس ربنا ما يكتب على اى أم انها تعيش من غير أبنها ما يكون فى حضنها عشان ظلم
ممكن بقى تجاوبنى أين نحن من قانون بلدنا !!!

نصر القوصى

نقلا عن  أسر المحتجزين

 

 

 

شاهد أيضاً

مذيعة من فرق الإنقاذ

بقلم : ماجدة سيدهم لما تطلع مذيعة بلا معنى كل دورها أنها يادوب راشقة في …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *