السبت , نوفمبر 11 2017
الرئيسية / مقالات واراء / كيف تتخلصين من زن طفلك ؟!
أمل رضا

كيف تتخلصين من زن طفلك ؟!

(نوم الظالم عباده) أشهر مثل بيقوله الأمهات المقهورات من أطفالهم الزنانين لما بيناموا بعد عناء يوم طويل من الزن والعياط والمشادات .
الطفل الزنان هو الطفل اللي بيتلكك علشان يزن أو يعيط ومش بيبقى عياط طبيعي لا دا فى كتير من الاوقات بيدخل في نوبات من البكاء بتوّصل الأم إنها تفقد هدوءها وصوابها فإما إنها هتلبي رغباته وبكده هيا بتستسلم ليه ولإسلوبه دا وهيستخدمه علطول معاها لإنه خلاص عرف ايه اللي بيجيب آخرها أو إنها هتقوم تضربه على أمل إنه يخاف ويسكت ويبطل زن إلا أنه فى الحقيقه بيزداد فى البكاء والزن ودا أبدا مش بيكون الإسلوب المناسب .
عزيزتي الأم الزهانه من عيالك الزنانه إبنك بيزن أو بيعيط لأسباب أكيد إنتي مش واخده بالك منها .
لو طفلك أقل من سنتين فالزن دا بيكون إما لسبب عضوي أو سبب نفسي .
بالنسبه للأسباب العضويه أن يكون مثلا عنده مغص بطنه بتؤلمه أو يكون جعان أو محتاج يغير ملابسه أو في أي حاجه مسبباله ألم هو مش عارف يعبر عنها غير بالزن والعياط ودورك كأم اكتشاف السبب وتلحقي تعالجيه مش تسبيه وتقولي شويه وهيسكت .
أما بالنسبه للأسباب النفسيه إنه بيبقى محتاجك جنبه وحشتيه محتاج حضن أمه لأن الطفل في سنواته الأولى بيعرف أمه من ريحتها لو تلاحظي إنك أول لما تقربي منه بيسكت علشان كده خدي بالك إنتي مصدر الأمان والحنان بالنسباله حاولي ماتبعديش عنه فتره طويله وتكوني جنبه دايما .
أما بقى ياست الكل لو إبنك أكبر من سنتين ولسه بيزن وبيعيط على اتفه الأسباب فأحب اقولك إنه كدا ابتدى يكون حيله الدفاعيه علشان يسيطر عليكي أو بمعنى أصح علشان تستسلمي لرغباته وتلبيها بدون أي اعتراض منك بدليل إن الطفل الزنان دا غالبا بنلاقيه لما يجي يطلب منك حاجه نبرة صوته بتكون فيها زن مصحوبه بدموع تماسيح كدا واخده بالك انتي اوعي يخدعك ويخليكي تستسلمي حاولي تحتفظي بهدوءك لآخر لحظه وعلشان تتعاملي صح تعالي نركز علي شوية نقط تركزي عليها أول ما يدخل ابنك في مرحلة الزن :
– مهما كان صوته عالي وزن وصريخ هستيري خليكي هاديه وتجاهليه تماما وابعدي عن المكان اللي هو موجود فيه لحد مايبطل زن وعياط .
– لو حاول يجي وراكي وفضل ماسك فيكي انزلي لمستواه وعنيكي في عنيه وقوليله اهدى علشان نعرف نتكلم ومتتناقشيش معاه غير لما يسكت خالص وكلامك كله بهدوء من غير لازعيق ولا صوت عالي .
– اتفقي معاه بعد لما يهدي إنك هتبقي مبسوطه منه لو عبر عن اعتراضه بإسلوب تاني زي إنه مثلا يتكلم معاكي ويقولك أنا مش موافق غير كدا إنتي مش هتسمعيه ولاهتتكلمي معاه .
– علميه إنه لما يعيط مثلا يقعد في مكان بعيد عنك وقوليله فكر في اسلوب بكاءك ولما تعرف تتكلم ابقى تعالي نتناقش بهدوء .
– د.أحمد عماره كان بيقول في احد لقاءاته إنه بيعرض على ولاده إنهم يعملوا اللي هو عاوزه وكأنهم هما اللي بيقولوه مثلا ابنك عاوز ياخد لعبته معاه المدرسه ولو رفضتي بإسلوب عنيف لأ يعني لأ هيبدأ نوبة الزن والعيااااط وهينزل المدرسه بيعيط وإنتي زعلانه وقلقانه عليه طيييب وايييه الحل ؟!
حضرتك هتتكلمي معاه بكل هدوء وبالعقل والتفكير المنطقي في شكل حوار بينك وبينه هتقولي :
حبيبي انت عاوز تاخد اللعبه معاك صح ؟
هيقولك ايوه صح
طيب انت لو اخدتها معاك المدرسه هيحصل حاجه من الاتنين :
– انت هتاخد لعبتك وتلعب بيها قدام صاحبك اللي قاعد جنبك وهو مش هيبقى معاه لعبه زيك صاحبك هيزعل ويعيط علشان انت معاك لعبه وهو لا
انا هترضى ان صاحبك اللي بتحبه يزعل ويعيط ؟!
هيقولك لا
لو ابنك عيل غلس وقالك آه
قوليله هو كمان ممكن ياخد منك لعبتك ويكسرها ساعتها انت هتكون مبسوط لما لعبتك تتكسر ؟!!
هنا هتلاقيه بيجري يشيل لعبته فى اوضته وهيقولك خلاص ياماما أنا هسيبها هنا لحد لما أرجع من المدرسه ألعب بيها .
وبكده إنتي وفرتي على نفسك وصلة زن وعياااااااط هتقفلّك اليوم إنتي وهو .
اتعلموا تحاوروهم بلغاتهم وتنزلوا لتفكيرهم هتبرمجوهم زى ماانتوا عاوزين ومن غير أي زعيق وصراااخ وزن .
دمتم أمهات حكيمات لأطفالكن مروضات
بقلم : أمل رضا

أمل رضا

 

شاهد أيضاً

محفوظ ناثان يكتب : ” الذكورية المستبدة “

  وقف عند شاطيء النهر لكيما يغتسل ، فاتت امرأة لكيما تستحم في النهر فانتهرها …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.