جريدة الأهرام الجديد الكندية 
مقالات مشابهة
هاتوا ودنكم أقولكم كلام سر 👂
النهاردة وزير التنمية المحلية جه الأقصر وطبعا أنا إتوقعت من نوابنا الثمانية المبجلين ينتهزوها فرصه ويعملوا عليه جلسه إستجواب مصغر يشوفوا إية فكر الحكومة بالنسبة لتنمية الأقصر وإية المشروعات اللى هتتعمل في المحافظة لمحاربة تفشي ظاهرة البطالة اللى بتعصف بالمحافظة من 25يناير لدلوقت وقلة الوظائف والناس اللى بيوتها إتخربت من قلة السياحة،وكمان ياخدوا جدول زمنى يشوفوا المشروعات اللى مفتوحه فبطن المحافظة دى أمتى هتنتهى من طريق كباش ومشاريع صرف صحي ، وإية مقترحات السادة النواب وأفكارهم المستنيرة من أجل النهوض بمحافظتهم الأقصر والضغط على الحكومة إنها تعلى ميزانية محافظة الأقصر من الموازنه العامه للدولة لضخها في إستثمارات ومشروعات يستفاد منها أبناء المحافظة ،لكن فجأة ال8 نواب بالصلاة عالنبي كده محدش جه فيهم خالص !!!؟خير …إسم الله عليكم حارصكم وصاينكم !!؟قال إية مقاطعين الوزير بالبلدى مخاصمينة إلا لما يعتذر للصعايدة عن ذلة لسانة وغلطة الغير مقصود فيهم!!!؟؟
أولا يا سادة لا تحاولون مزايدة بشراء شعبية زائفة ومواقف بطولية مهترئة على شعب الأقصر الواعي المثقف فلسنا ممن تنطلي عليهم الحنجوريات فرصيدكم جميعا أصبح بالسالب كنواب لدى الشعب الاقصري .
ثانيا لقد قالها الوزير من قبل مرارا وتكرارا وأوضح انها زلة لسان غير مقصوده أخرجت من سياق معناها
ثالثا إذا كنتم تنتفضون (زيفا)من أجل الصعيد والصعايدة،وهل من أخلاق الصعيدي إهانة ضيفة !!الصعيدي الحق يا سادة لو زارة قاتل أبية في دارة لتعذر عليه أخذ ثأرة وهو في ضيافتة ووجب علية إكرامة .
رابعا بفعلتكم تلك ثبت أنكم لا تبحثون عن مصلحة المواطن الاقصري بل لا تهمكم مصلحته من الأساس وكل ما يهمكم صناعة بطولة من ورق على صفحات الجرائد تزينون بها صوركم ومجد ما أنتم حتى ببالغية
خامسا وده المهم لا كلام الوزير عننا هينتقص من قدرنا وفخرنا وشرفنا بصعيديتنا ولا حتى إعتذارة هيزيدنا شرف وفخار !!ياما قالوا عننا كصعايدة نكت كتير بس لما بييجوا يتكلموا عن النخوة والشرف والأصل والرجولة بيقولوا عننا أكتر ،أن الصعايدة هم الشرف والشرف والعزة هما الصعايدة ،وبعدين حقكم علينا أحنا لو مقموصين أوى ،أمسحوها فينا بس شوفوا مصلحتنا ،وصدق المثل البلدي الصعيدى القائل (علمني يابا الهيافة،قاله تعال في الفارغة وإتصدر)
بقلم ياسر العطيفى
