الثلاثاء , أكتوبر 23 2018
الرئيسية / منوعات / محفوظ مكسيموس يكتب : ( المخطوبين & المخطوبات )
محفوظ مكسيموس

محفوظ مكسيموس يكتب : ( المخطوبين & المخطوبات )

لما تتقدم لبنت لخطبتها أرجوك ركز علي اللي أهم من الشكل علشان الشكل مش هيربيلك أطفال و الشكل مش مقياس لجوهر البنت بمعني أنت قررت تتجوز صالونات كعادة ٩٠% من الشعب حاول تشوف إيه اللي يناسبك بمعني :-
١- مش معني إنك مليونير و مش ( متعلم ) تروح تتجوز معيدة جامعة أو خريجة إعلام حضرتك دا مش زواج انت كدة ( بتشتريها ) ولو أهلها وافقوا فهم وافقوا علشان فلوسك بس ( بس تفتكر هيبقي فيه توافق فكري & حوار متبادل ؟! ) لا مش هيحصل وعلي فكرة مراتك هتفتكر حبيبها القديم بتاع الجامعة بسببك وهتنسي فلوسك وتقارن دماغك بيه وأنت عارف الباقي .
٢- مش معني إنك جميلة و مرغوبة للزواج تختاري أغناهم ماديا لا إختاري اللي ممكن تكملي معاه بجد مش اللي ممكن يشتري غيرك بفلوسه ولو هو كويس و غني تبقي محظوظة
٣- في الخطوبة متسألوش بعض عن أي ماضي لحد فيكم مسئوليتكم تجاه بعض تبدأ من أول يوم خطوبة وعلشان نريح بعض كل الناس عندها حب قديم سواء انت أو هي فبلاش نبقي جلادين لبعض بسبب حاجة مالهاش لازمة دلوقتي ولو حكيت أو حكيتي فيها كتير متكملوش مع بعض أحسن ليك وليها.
٤- بلاش وعود كدب وكلام مش هتنفذوه لأن الكلام ده مبيتنسيش . علي سبيل المثال: بلاش توعدها بإنكم هتصيفوا كل سنة في بلد مختلف لو مش هتقدر تعمل كدة فعلا وانت بلاش تحسسيه إنك هتبقي مارجريت تشيرشيل و تغيري الكون لو قدراتك محدودة .
٥- بلاش تكدبوا علي بعض بإسم الدين ( يعني لو بتدخن مثلا خليها تعرف إنك مدخن من البداية ولو مش بتصلي بلاش تحسسها إنك إشتركت في نقل جبل المقطم. ولو انت ملكيش في الصوم والروحيات خليكي علي طبيعتك عادي لأنه هيعرف بعدين ومش هيحترمك أبدا.
٦- بلاش تدخلوا وسيط أثناء فترة الخطوبة من أصدقائكم علشان يحللكم مشاكلكم ببساطة لو دخلت صاحبك بقدرة قادر هتبقي خطيبة صاحبك ولو دخلتي صاحبتك هتفسخي خطوبتك ( دي إحصائيات مش كلام مرسل )
٧- مفيش حاجة إسمها أمك قالت وأخوكي قال لو الحوار ده حصل معاكم في الخطوبة إفسخوا الخطوبة فورا لأن بعد الزواج هتعيشوا في جحيم العائلات.
٨- لو فسختم خطوبتكم ببعض بلاش كل واحد فيكم يشيطن الطرف التاني قدام الناس ويتكلم عنه كلام رخيص . إحترموا الفترة اللي عرفتم فيها بعض و بلاش تقطع فيها قدام الناس لأنهم مش هيحترموك انت ونفس الشيء معاكي بلاش تظهريه للناس بشكل سيئ . 

( دمتم سعداء & ناجحين )

شاهد أيضاً

بالصور : حفل خطوبة ساندى وشادي بكنيسة العذراء المسرة

الإعلامي أسامة عيد يتقدم بخالص التهاني الى أسرة الحبيب الغالي شحاتة عزيز وزوجته نادية عزيز …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *