الأربعاء , يوليو 11 2018
الرئيسية / منوعات / محفوظ مكسيموس يكتب :أعزائي ( المخطوبين & المخطوبات )
محفوظ مكسيموس

محفوظ مكسيموس يكتب :أعزائي ( المخطوبين & المخطوبات )

أعزائي ( المخطوبين & المخطوبات )
خطيبتك إنت إتقدمتلها علشان تعرفوا بعض قبل الزواج و تختبروا محاسن و مساؤي بعض وعلي أساس ده تقرروا هتكملوا ولا لا. فبلاش أرجوكم:
١- بلاش تتعامل معاها من أول يوم خطوبة إنها بقت مراتك لأنها لسة مش مراتك وممكن جدا متبقاش مراتك .

٢- بلاش أوامر ( سي السيد ) لأنها هي كمان تقدر تمثل دور المستضعفات وتحسسك إنها تحت رجليك. و لو بدأتم بالتمثيل هتعيشوا زواج كله مشاكل لأن ببساطة في الزواج بتسقط الأقنعة جدا وبتبقوا علي طبيعتكم جدا.

٣- بلاش تتعامل معاها علي إنها كانت بايرة ومصدقت لقيت سيادتك لأنك كدة بترخص نفسك جدا جدا جدا.


٤- بلاش تتعاملي مع خطيبك علي إنه ضيف لازم يشوفك بدوكو و مدهونة . قابليه في البيت من غير ماكياج لأنه هيشوفك كل يوم وانت صاحية من النوم وحالتك كرب.


٥- بلاش تتعاملي معاه علي إنه الظافر بيبرس أو الحاكم بأمر بالله لأنك هتعوديه علي كدة وبعد الزواج هيكتشف إن حضرتك كنتي بتمثلي وهتعملوا مشاكل بالجملة.


٦- بلاش انت & هي تدعوا الإنفتاحية والحرية الغربية وتمارسوا جنس قبل الزواج لأن ببساطة ممكن الزواج ميكملش لأي سبب و وساعتها هتبقوا انتم الإتنين مرضي نفسيين. وبلاش هو يقنعك بإنه بيعبرلك عن حبه بالجنس لأنه كداب جدا وكل اللي محتاجه جنس بس.


٧- خليكي واعية وحافظي علي نفسك جدا وفهميه إن كل حاجة ليها وقتها والفاكهة لما بتتاكل قبل آوانها مبيبقاش طعمها له لازمة بعدين ولو ضعفتي إفتكري إن الزواج ممكن ميحصلش ولو متأكدة من حبه ليكي حطي في إعتبارك إنه ممكن يموت قبل الزواج من الأخر مفيش سرير غير بعد الزواج.


٨- خليكم فعلا في فترة فحص وإختبار وتعايش بلاش كل اللقاءات تبقي أفلام هوليودية و رومانسية فتاكة. إتكلموا في الفكر والثقافة والعلوم والسياسة والرياضة والدين وإتكلموا في أولاد و شغل و إجتماعيات و مشاكل حتمية الحدوث بعد الزواج.


٩- إحترموا بعض جدا وكل حد فيكم يحترم التاني قدام أهله ويدافع عليه ولو حسيتي إنه خطيبك قبل الزواج بأيام مش أغلي حد عندك أجلي الفرح لحد متتأكدي من ده أو عدمه.


10- لو حسيت إنك متردد ومش مرتاح متكملش لأن التردد مش من فراغ ومبني علي أحاسيس متضاربة جواك مش عارف تعبر عنها.


1١- أوعي تعتبروا فترة الخطوبة دستور زواج لا دي فترة بتتعرفوا فيها علي بعض ومش عيب أبدا إن كل واحد يروح لحاله.


1٢- مش معني إنكم فسختوا خطوبتكم يبقي فيه حاجة غلط أو واحد فيكم وحش لا طبعا ممكن جدا تبقي انتم الإتنين كويسين جدا بس مش بتوع بعض.


1٣- أوعي تتجوزي علشان خاطر أهلك عايزينه لا ارفضي وخليكي قوية لأن أهلك مش هيشيلوا معاكي مشاكلك بعد الزواج.


1٤- أوعي تقبل إنك تتجوزها شفقة أو رجولة أو تأنيب ضمير دي هتبقي مراتك ولازم تبقي واخدها عن قناعة تامة.


1٥- بلاش مغالاة في التقشف والزهد وخليكي طبيعية جدا لأنك مش رايحة دير انت هتعيشي في المستوي المعروض عمرك كله لو مش قادرة إظهري ده في الخطوبة وبلاش مشاكل بعد الزواج.


1٦- بلاش تدعوا إنكار الذات والقداسة خليكم طبيعيين علشان شكلكم قدام بعض بعد الزواج مايبقاش وحش جدا


1٧ – بوظوا ١٠٠ خطوبة وبلاش تبوظوا زواج واحد.


دمتم سعداء & فرحانين .

شاهد أيضاً

محمد السيد طبق يكتب . السلام الجمهوري في المستشفيات والتهريج كما يجب أن يكون .

 بقلم / محمد السيد طبق  يخرج مريض الفشل الكلوي والتهاب الكبد وسرطان الرئة لتحية العلم …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *