الأحد , أكتوبر 21 2018
الرئيسية / مقالات واراء / محفوظ مكسيموس يكتب :اذا كان دكتور جمال عبد العظيم مرتشى يبقى مين الشريف ؟؟؟؟؟؟
محفوظ مكسيموس

محفوظ مكسيموس يكتب :اذا كان دكتور جمال عبد العظيم مرتشى يبقى مين الشريف ؟؟؟؟؟؟

 

 

 

 

 

 

— الرجل لو مرتشى ماكانش لما مسك مدير عام البيوع الجمركية والمهمل نضفها وماكانتش المخازن اتحرقت لما أمر بعمل لجنة والحرامية خافوا من كشف المستور .

— لو مرتشى كان ارتشى وهو رئيس ادارة مركزية لجمارك دمياط أو وهو رئيس ادارة مركزية لجمارك بورسعيد وماكانش حد هيدرى .

— لو مرتشى ماكانش كل اللى اشتغلوا معاه حزانى النهاردة ومش مصدقين .
— لو مرتشى مش هيرتشى بعد شهرين فقط من توليه المنصب !! وهو عارف ان المتربصين به من الفسدة كتار وعاوزين يوقعوه .

— لو مرتشى هيرتشى مليون جنيه ؟؟!!!! اللى اصلا ممكن يحصل عليهم بالحلال من بدلات ومكافآت وووووو !!!!!!!

— تعالوا بقى نفند الواقعة والظروف :

* الراجل فى شهرين بس نضف أماكن كتير وحصلت فى عهده ظبطيات كبيرة ومنها اكبر ضبطية مخدرات من كام يوم .. والحرامية خافوا وحسوا ان الدور جاى عليهم .
* عمل اجتماع بممثلى النقابات وقرر يكون شهرى لحل مشاكل العاملين ووعد بإنه هيجيب حقوقهم .

* الرجل المحترم بيبات فى استراحة تابعة للمصلحة لأنه معندوش شقة فى القاهرة وطول عمره بيسافر من مكان سكنه لشغله !!! يعنى معندوش شقق وفيلات زى المرتشين ،، كمان الاستراحة دى بيدخلها عمال وغيره لأنها مش سكنه الخاص .
الفلوس لقوها فى الاستراحة .. يعنى لاهو متصور ولا مظبوط متلبس . ووارد ان اى حد يكون حطها فى الاستراحة اللى مبيدخلهاش الا عالنوم .

* الرشوة بقى ليه ؟؟ بيقولوا علشان يخرج بضايع دون دفع الرسوم !!! ياسلام ؟؟؟؟
أى مستخلص فاسد او صاحب شأن عارف كويس ان دى مش محتاجة رئيس مصلحة وبالمليون جنيه ممكن يشترى موظف او اتنين يخلصوا له الموضوع وبدون شوشرة 

* بعض المواقع كاتبة انه اجبر مرؤسيه على اعداد تقارير مخالفة للواقع … أى كلام فى اى كلام .. الو يافلان اكتب كذا علشان لو حصل حاجة تروح انت فى داهية ..حاضر ياريس !
معروف ان مفيش حد بيشتغل بدون تأشيرة صريحة ومعروف اصلا ان رئيس المصلحة لايتدخل فى الاجراءات اليومية والروتينية ولو فى اى اجراء جديد يبقى بمنشور موقع عليه منه .ـــــــــــــــــــــــــــــــــــــــــــــــــــــ

الموضوع باختصار .. مافيا الفساد والتهريب والمخدرات من موظفين ومستخلصين وتجار استشعروا الخطر القادم عليهم بعد ماقفل حنفية النهب والتهريب خصوصاً انه خبير فى طرق مكافحة التهريب وعامل فيها رسالة دكتوراة .. فاتفقوا مع عامل عديم الضمير يدس الفلوس ومستخلص فاسد يبلغ .
حاجة كمان مهمة اوى .. هو مش مفروض لسة معمول عنه تحريات قبل صدور قرار تعيينه من شهرين ؟؟؟ طب عمركوا شوفتوا قضية تاخد مراقبة وتسجيل ومتابعة واجراءات كام يوم ؟؟؟ طب عمرنا شوفنا حد يتمسك بالليل ويطلع الخبر فى كل المواقع والجرايد والقنوات تانى يوم الصبح ؟؟؟!!! طيب اللى نشروا الخبر وبتفاصيله امبارح بعد الواقعة بنص ساعة عرفوا منين وازاى ؟؟؟!!!!
الرجل مطلوب دبحه ليكون عبرة لأى حد تسول له نفسه الوقوف قدام مافيا الاجرام والتهريب والفساد . ومعروف انه هيخرج منها بس بعد تشويه سمعته وكسره سواء ظهرت براءته أو لم تظهر خلاص هم عملوا المطلوب وشوشروا عليه ووقفوا مسيرة تقدمه ونجاحه والتطهير اللى بدأه .
####################

أنا أسفة لكل مسئول نشرت خبر القبض عليه واعتقدت انه طالما نشر فى الجرايد يبقى صحيح لأنى ببساطة مبقتش أثق فى أى حد ولا فى المنظومة كلها وعمرى ماهنشر خبر زى ده تانى .
أنا أسفة على كل مرة كتبت فيها مصر بتنضف لأن من الآخر .. مصر عمرها ماهتنضف وفى ناس عاوزينها تفضل كدة 
.. أحبطتونا واحبطتوا كل شريف وضلمتوا الدنيا فى وش الشباب اللى اتوسم خير بتعيين دكتور جمال وكان عنده أمل .
( أرجو من كل صديق عارفنى كويس ويثق فى نزاهتى وصدقى انه يعمل شير علشان كل العالم يعرف ان #جمال_عبدالعظيم_شريف )

دعواتكم لأخويا جمال بفك الكرب وإظهار الحق والنصر عاجل وليس آجل بإذن الله.
من صفحة: عزة عبد المجيد ( زميلة د/ جمال عبد العظيم )

شاهد أيضاً

حينما يكون الطبيب إنساناً فأنه الدكتور جمال شعبان .

   بقلم : ناصر عدلى ليس من الصعوبة أن تصبح  محاسباً أو صحفياً ً أو …

تعليق واحد

  1. شكراً محفوظ بك على نشر البوست بتاعى واشهد الله انى صادقة فى كل كلمة قلتها فى حق هذا الرجل
    #جمال_عبدالعظيم_شريف

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *