الخميس , مارس 28 2024

محفوظ مكسيموس يكتب : ( تربية كئيبة ) 

من خلال خبرتي المتواضعة في الحياة سواء خبرات شخصية أو مع ( كل ) أصدقائي المصريين إكتشفت جريمة إسمها ( تربية الكآبة ) هوضح حيثياتها و أبعادها و أرجوكم كأباء و أمهات ركزوا معايا شوية .
إكتشفت إننا شعب ما يعرفش ( يفرح بجد ) بالرغم إننا دمنا خفيف كمصريين و بنضحك الوطن العربي كله .
و كمان إحنا شعب مايعرفش يعيش من غير ( Stress ) ضغط نفسي و كل حاجة ملهاش طعم . الناس بتخرج تتفسح وإحنا بنخرج ( ناكل ) و نروح وبكدة إتفسحنا.
معظمنا ( و خاصة أنا ) ما بنعرفش نستمتع بالطبيعة و جمالها لأن دماغنا مشغولة بالشغل و المشاكل و المسئوليات حتي وإحنا ع الشاطئ و لما الناس تمدح المكان و جماله بحس إني متبلد المشاعر . و عمرنا مبنعرف نعمل إستجمام زي باقي الجنسيات و لما فكرت في الموضوع لقيت إن السبب الرئيسي في المأساة فقط ( التربية الكئيبة ) إزاي تعالي نشوف :-
لما تربي إبنك بعيد عن الأنشطة الرياضية بحجة إنك خايف عليه تأكد إنه هيبقي كئيب و هيعاني.
لما تربي إبنك بعيد عن الفن و الموسيقي و الإبداع بحجة إنه يهتم بمدرسته فقط لازم تبقي عارف إنك بتصنع حد كئيب 
لما تربي إبنك و تزرع فيه إنه يبقي زي فلان الدكتور أو علان المهندس تأكد إنك بتلغي شحصيته تماما وإنك بتصنع منه مسخ أو عروسة مارونيت ولما يكبر هيبقي شخصية مترددة وكئيب جدا.
لما تقعد كل شوية تقول لإبنك عايز أشوفك دكتور قد الدنيا ولا صيدلي زي إبن عمتك ولا طيار زي حسام ابن طنط ريهام جارتنا تأكد إنك أب أناني و عايزه يحققلك طموحك انت بحجة إنك خايف علي مستقبله. 
بلاش تختارله أصدقاؤه بحجة إنك بتحافظ عليه . فهمه الصح من الغلط و خليه يختار و خد بالك هيغلط ودا طبيعي لأنه إنسان فبلاش تجلده بمثالياتك اللي هو عارف إنها مجرد شعارات. لأنه لو شافك بتبشر بكلام مبتعملش بيه هيتأكد إنك مجرد أب بتفرض وصايتك و أوامرك .
لو عايزه يستمتع بصحة نفسية سوية علمه يحب الحياة وعلمه يمارس رياضة ويسمع مزيكا ويمارس هوايات ولو حابب يدخل كلية فنون جميلة شجعه ولو نفسك في طب روح إدرس انت طب لأنك مش مخلفه علشان يحقق لك أحلامك. 
و علي فكرة كل المذكور أعلاه مش محتاج ماديات و فلوس بس محتاج أب وأم بيربوا ولاد بعيدا عن الكآبة . 
إبنك و بنتك لما يبقي سليم نفسيا و عاطل أفضل مليون مرة من إنك تشوفه ( عالم مجنون ) أو دكتور لاسع . 
دمتم في بهجة و أصحاء أصدقائي.

شاهد أيضاً

الأقصر

مدفع رمضان بالأقصر.. ومرارة فقد هويتنا

كتب الاستاذ الطاهر على الحجاجى كان المدفع الذى أمامنا بالصورة من أقدم المدافع ويرجع تاريخه …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.