الجمعة , سبتمبر 18 2020
كريستيان

بالصور استاذ دكتور محمد المفتي الي نادر سليمان الإنسانية تسمو فوق الأديان !!

بقلم المهندس/ نادر صبحى سليمان
اكتب تجربتي الشخصية هذه شهادة حق لهذا الإنسان الأستاذ الدكتور محمد المفتي استاذ جراحة اللثة و الفم و الوجة و الفكين. دكتور محمد المفتي هو نجل عالم جليل في جراحة الوجة و الفكين الأستاذ الدكتور شريف المفتي رحمة الله عليه و اعرفه معرفة شخصية و تقابلت معه بالعيادة في المهندسين بعام ٢٠١١ و ٢٠١٢ للكشف و في الحقيقة ذهبت في ٢٠١٨ شهر يناير الماضي للكشف في نفس العيادة و لكن علمت أن توفاة الله و موجود نجلة الأستاذ الدكتور محمد المفتي استاذ بجامعة عين شمس كلية طب الأسنان و فعلا كما قالوا في الامثال ” اللي خلف مامتش” قام دكتور محمد المفتي بفحص الفم واللسان و الشفاة و الأسنان و اللثة و الفكين للتأكد من عدم وجود أي شيء غير طبيعي و انا في الحقيقة بطبعي قلوق جدا . طلب منى اشعة بانوراما عادية علي الفكين و عملتها و تم عرضها علية فعاد و طلب مقطعية للتأكد من شيء موجود تحت الناب الايسر بالفك السفلي و بالفعل عملت المقطعية و تم عرضها علية و قالي هنتابعها هى حاجة عندك من سنين طويلة يمكن اكتر من ٢٠ سنة و موجودة في اشعات البانوراما القديمة اللي كنت بتعرضها علي دكتور شريف المفتي في ٢٠١١ و ٢٠١٢ رحمة الله علية هى اسمها compound odontoma و حاجة حميدة تماما و لا خوف منها و ممكن تعيش بيها لكن هنتابع حجمها بالمقطعية كل ٦ شهور و متقلقش منها .

المهم انا ابتديت اقلق و لفيت علي دكاترة مشهورة بالقاهرة بدون ذكر اسماء منهم من جعل حياتي جحيم حتي اليوم الوسواس القهرى يطاردني من كلامهم الذي حتي الان لا يفارق أذني منهم من قال لي عملية و فورا و لازم نستأصل الورم بسرعة و احتمال كمان نستأصل معاة جزء من الفك و تحليل العينة لإثبات كونة خبيث ام حميد. ! قلبي هيقف من الكلام و لا اكل ولا نوم و لا راحة ..! الغريب أن انا اتصلت علي دكتور محمد المفتي و قولتلة بدون ذكر الاسم ان فية دكتور قالي كذا علي الفور دكتور المفتي ضحك و قالي انت روحت عند الجزار! قولتلة مين ! قالى فولان و قالك كمان العملية هتتكلف كذا قولتلة صح حصل ! قالي انت لو عاوز تعملها اعملهالك و مش عاوز منك فلوس لكن انا بقولك دى مجموعة اسنان زيادة مطلعوش من وانت صغير لان اسنانك كانت كاملة حوالي ٦ او ٧ تحت الناب و حجمهم تقريبا ٢ سم و قولنا نتابعها فقط بالمقطعية مش واثق فيا شوف حد تاني و بالفعل قالي روح لدكتور فولان انسان محترم و اعرض علية الموضوع عشان ترتاح و ابقي بلغني قالك اية بالفعل روحت و تم عرض كل شيء علية قالي نصا تنساها تماما و تعيش حياتك انا هاخد منك فلوس و اشتغل بس حرام عليا مش محتاجها و كتبلي تقرير قولتلة طيب نتابعها كل ٣ شهور و لا ٦ شهور عشان ممكن تكبر او تتحول لخبيث قالي مش بتتحول مستحيل و لا تعمل مقطعية تاني و لو عملت بعد سنتين هتلاقي الحجم دا زى ما هو دى حاجة بتكبر ببطىء شديد جدا علي مدار سنين طويلة جدا . المهم رجعت للدكتور محمد المفتي قالي ها صدقت !! بس معلش هنعمل مقطعية بعد ٦ شهور قولتلة حاضر . من حرق دمى دخلت علي الواتس للدكتور اللي قالي لازم نستأصل بسرعة و قولتلة شوف كدا الإشاعات القديمة دى من ٢٠١١ و ٢٠١٢ قالي مش فاضي كلمني الصبح قولتلة انت دكتور عار علي مهنة الطب و عار علي الإنسانية و تاني يوم اتصلت بية و غير كلامة تماما و قالي مافيهاش حاجة و حاجة حميدة ممكن تتعايش معاها بس الخوف ليحصل اي خبطة في الفك ينكسر! رجعت للدكتور المفتي قولتلة الكلام دا قالي ولا هيتكسر و لا هيحصلة اي حاجة . و كان دايما يقولي ربنا حلو اوى انت انسان قريب من الكنيسة عندكم آباء رائعين و انت بتعرف البابا نفسة و كل الأساقفة الناس دى هتخلى عندك قوة روحية عالية . و عاوز اقول ان دكتور محمد المفتي بيرفض حتي ياخد مني الكشف و اي وقت ارن علية اشكيلة من اي حاجة او تطور يقولي متنزلش مخصوص القاهرة صور اللي تاعبك صور كويسة واضحة سواء لسان لثة اسنان و ابعتلي علي الواتس و ارجع اتصل بية يرد عليا و يطمني و يقولي كلة طبيعي. انت نفسيتك تعبانة يا باشمهندس حد ضايقك الفترة دى ! حصل حاجة مضيقاك و افضفض معاة … بصراحة الراجل دا اتحملني فوق الوصف و اخيرا عدى ٦ شهور و ذهبت اعمل تنظيف الأسنان بعدها تعبت جدا و ندمت اني نظفت اللثة التهبت و مازالت تعباني بعد التنظيف .. قولت اعمل اشعة بانوراما مع نفسي كدا اطمن علي المشكلة.. لقيت الحجم شكلو متغير عن اللي فاتو بتوع ٢٠١٨ و ٢٠١١ و ٢٠١٢ بعتها لدكتور محمد المفتي واتس و اتصلت علية .. قالي مالك مال صوتك مخنوق ! قولتلة انا ملاحظ تغيير قالي نعمل مقطعية قولتلة فين قالي مضطر تنزل القاهرة كدا و بعدين سكت شوية و هو عارف ظروف ماما تعبانة بجلطة و مفيش غيري معاها.. قالي اسمع قولتلة نعم قالي جامعة النهضة بني سويف قريبة منك؟ قولتلة طبعا قالي انا هكون موجود هناك غدا بكلية طب الأسنان تعالي و هنعمل مقطعية عندنا و بالفعل روحت قالي اسمع البانوراما دى بايظة و مش هيطلع اي تغير قولتلو لاء يا دكتور انا ملاحظ الاشعة و الفرق قالي ماشي يا فندم بينا المقطعية!

و من قلقي كل شوية اتصل علية و الراجل يرد و يشرح و يشرح و انا منتظر المقطعية لحد ما عملت المقطعية من يومين و تركت ال cd للدكتور محمد المفتي لان وجدتة في اجتماع مع رئيس جامعة النهضة بني سويف و اول مرة كنت اعرف من الناس اللي في الجامعة ان دكتور محمد المفتي يبقي وكيل كلية طب الأسنان جامعة النهضة بني سويف و ايضا استاذ دكتور بجامعة عين شمس القاهرة مكان تواجدة.

و بعد عرض ال cd قومت بالاتصال علية قالي مافيش اي تغير يا نادر زى ماهي و مافيش حاجة تخوفني.
عاوز اقول اني حاولت أضع مبلغ في ظرف مغلق و ماصدقت قابلتة في كلية طب الأسنان جامعة النهضة بني سويف و حاولت بكل الطرق أعطية الظرف رفض تماما نهائيا و قالي عيب اوى قولتلة اعتبر انا جيت العيادة في المهندسين و كشف قالي انت بتهرج! عيب و قولتلك مليون الف مرة انا مسلم و انت مسيحي دى مش عندى في القاموس انا بتعامل مع نادر الإنسان فاهم !
شاهدت بفم عيني بكلية طب الأسنان جامعة النهضة بني سويف فلاح بسيط لا يقرأ و لا يكتب واقف مش عارف يعمل اية و لا يروح لمين شافة دكتور محمد المفتي أثناء حديثة معي ..سألة مالك قالة عطوني الورقة دى عشان ضرسي مش بنام منة و مش عارف اروح لمين. دكتور محمد مش فاهم منة حاجة ! خد الورقة منة بنفسة و قالة استناني هما و خرج من المكتب و بعد خمس دقايق رجع زعق لدكاترة و قالهم حد يجي يجي فورا يعمل حشو عصب للراجل دا .
اخيرا الاستاذ الدكتور محمد المفتي لا أجد كلمات اعبر بها عن هذا الإنسان المتواضع جدا و الأمين علي خدمة الإنسانية في عالم الطب الذي ندر فية الان مثال الاستاذ الدكتور محمد المفتي. حقيقة الإنسانية تسمو فوق الأديان.

 

شاهد أيضاً

الدكتور عماد فيكتور : يجب محاسبة الجهات التى تعمل ضد توجهات الرئيس

اود ان احدثكم عن ضرورة محاسبة الجهات التي تعمل ضد توجهات السيد الرئيس ،رغم توجهاته …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *