الخميس , سبتمبر 16 2021
إيهاب ابو رحمة

د. إيهــاب أبورحمــه يكتب: مــن التـــالي !😭

تعبنا من الكلام و كمان تعبنا من قلة الإهتمام ، إبراهيم مات و في كلام كتير عن سبب موته ، في اللي قال انتحار بعد اكتئاب عنيف و في ناس قالت لا ده وقع من الدور التاسع بعد اختلال اتزان بعد محاولات إصلاح سلك الدش!.

▪️لكن بغض النظر عن سبب موته ، ليه شاب زي البدر و في مكانته العلميه و المفروض مكانته الإجتماعيه يكون عنده اكتئاب للدرجه دي !! لدرجه إن صفحته علي الفيس بوك كلها كلام عن الموت و الهم ، بلاش كده ده حتي حسرته علي قتل الصيدلي في السعوديه واللي حصل من أيام قليله ، فيه كلام كتير بين السطور و معاني كتير ميفهمهاش غير اللي في ظروفه و في مهنته بيعاني ، إبراهيم كان بيتكلم بحرقه أن الراجل سافر عشان يحسن وضعه بعد سنوات مرار من تعليم و شغل محدش يقدر يستحملهم و كمان ببلاش .

▪️الحقيقه مش بس إبراهيم اللي عنده اكتئاب ، جموع الأطباء في مصر عندهم اكتئاب و مش بعيد أبداً ينتحر ناس كتير الفتره الجايه ، لما نلاقي إهتمام رهيب بناس بتقول كلام هلس لا له طعم ولا لون ولا أي معني أصلاً زي حمو بيكا و مجدي قشطه ، دول بقوا نجوم مجتمع لا وكمان بيقبضوا ألاف الجنيهات في الساعه الواحده ، أكيد في حاجه غلط لا حاجات غلط لازملها حل و إصلاح.

▪️إيه اللي ميدخلش الأطباء في اكتئاب ؟ الحياه الورديه ، الأجور المحترمه ، التأمين العالي لهم من بلطجة المرافقين و بعض المرضي ، ولا التأمين الطبي الفخيم ليهم ولأهلهم و لا من إعلام سفيه بيسفه فيهم و بيهدم كرامتهم و أخرها الإعلان السيئ الغريب بتاع بصوا في المرايه ده !.

🔻أما عن موضوع الإعلان ده ، هل يا تري يقدروا يعملوا إعلانهم المشبوه ده علي بعض الفئات بعينها ؟ ولا الأطباء بقوا أصحاب مهنه مستباحه لكل من هب و دب ، و كمان يا ريت عاملين إعلان فاهمين معناه ولا إيه ؟ و لكن الواضح إن اللي عمله جاهل مش فاهم يعني إيه سرقة أعضاء إلا بقا لو الدكاتره دول شغالين في مدبح و مطاعم ! للي عاوز يفهم نقل الأعضاء ده عمليه كبيره محتاجه إمكانات كبيره مش في أي مكان ولا تحت بير السلم ، دي مافيا فيها ناس تقيله مسنوده و بتم بملايين الجنيهات و بيبقي الشاري جاهز بملايينه.

▪️كفايه بقا تعبنا من توجيه الناس إلي أخطاء مش موجوده إلا في عقول مريضه ، أغلب الأطباء طفشوا و حتي طلبة الطب بيهربوا و بيستعدوا للهروب بعد التخرج علطول و في الأخر مش هتلاقوا حد يعالج الناس الغلابه اللي انتم بتشحنوهم ضد الأطباء في الإعلام والفن و هم عن جهل بيسمعوا كلامكم المسموم ، و لازم كل واحد بسيط غلبان فاكر إن بتوع الإعلام دول خايفين علي مصلحتهم يعرف إنهم مش بيتعالجوا في مصر أصلاً يعني لما يحصل الهروب الجماعي للأطباء واللي بدأ بالفعل الغلابه أول ناس لا دول هم بس اللي هيتأثروا لأن اللي بيشحنكم ده مش بيتعالج غير بره مصر يعني مش فارق معاه الغلابه زي ماهم بيرسموا عليكم .

🔻إبراهيم مات سواء بسقوط غير مقصود أو اكتئاب حاد لكن ده لا ينفي إنه كان بيعاني جداً من معاملة الناس و كيفية تعامله مع الناس و برضو لا ينفي إن هناك ألاف الأطباء في حالة اكتئاب زيه و يمكن أكتر و عشان تكونوا عارفين إن في دكاتره دلوقتي بقت بتهرب مش عشان الفلوس لا عشان الكرامه و بالفعل دلوقتي اللي بيهرب ناس علي مستويات عاليه جداً من الطب و ناس كمان علي مستويات ماديه محترمه.

🔻الطب في خطر و أكبر دليل عزوف صغار الأطباء عن إستلام نيابات جامعه و زمالات الصحه ، يعني الناس بتهرب بدري بدري عشان يلحق اللي باقي من عمره في كرامه معنويه و ماديه بدل ما يضييع عمره في إكتئاب و مهانه لا تنتهي و وسط ناس لا تقدر مهنته ولا تحترمه و راميين دماغهم لإعلام فاشل حاقد علي مهنه عظيمه كنا بنحبها جداً لكن نجحوا يخلونا بنحاول نتخلص منها أو نهرب منها.

🔻وفي نفس الوقت اللي فيه بلدنا طارده للأطباء نلاقي دول بتفتح أبوابها للأطباء المصريين ماهم عارفين قيمتهم و مستواهم الحقيقي و كمان تلاقي دول أعداد شعبها ميجيش ربع سكان مصر و عدد الأطباء فيها أضعاف أعداد الأطباء في مصر ! لا و كمان لسه سوق العمل عندهم محتاج تاني ! متستغربش ماهو البني أدم و المريض لهم قيمه عند البلاد دي .

🔻بقالنا كتير بنادي بتدخل الحكماء في هذا الوطن و حماية ما تبقي من منظومة الصحه من الأطباء والعامل البشري بس طبعاً ، لأن المنظومه نفسها متهالكه محتاجه تغيير شامل بدل العشوائيه اللي بتحصل من إعطاء غير مؤهلين ألقاب متخصصه طبيه و مشاريع قوانين و إمتحانات مزاولة مهنه غريبه و قوانين مشبوهه عن منع جمع العمل الخاص بالعام دون التفكير الجدي في حل مشكلات الرواتب و التأمين الكامل للطاقم الطبي من بلطجة بعض البلطجيه وكمان التأمين الصحي المحترم للي بيقدم الخدمه الصحيه نفسه ولا حتي قوانين تمنع المساس بالمهنه و الأطباء في الإعلام الهابط و كمان حل مشكلة عجز الأدويه و صيانة الأجهزه .

💥رحم الله إبراهيم و رحم الله أطباء مصر أمواتاً كانوا أم أحياء

شاهد أيضاً

التاجر المفلس والنبش في الماضي !؟

د./ صفوت روبيل بسطا يقول المثل الشعبي : (التاجر لما يفلس يدور في دفاتره القديمة …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *