الأربعاء , أغسطس 21 2019
الرئيسية / مقالات واراء / دع الخلق للخالق
نانسي صميدا

دع الخلق للخالق

بقلم / نانسي صميدا

” دع الخلق للخالق “

وبمناسبة ان احنا في أيام مفترجة وكده عايزه أفكرك ان علاقه الانسان بربه علاقه خاااصه جداً و مالكش إنك تحشر نفسك فيها ✋🏼⛔️

يعني اوعاك تقيّم بنفسك علاقة حد بربه ودرجة تدينه بس من مجرد شكله او كلمتين تشدق بيهم: 
-متدين وملتزم ولا فاسق ومايعرفش ربنا، 
-ده هيخش النار حدف ولا هيخش الجنه مرتاح، 
-دي مش محجبة يبقي كافرة ودي لابسه نقاب يبقي ملتزمة وقلبها نقي، 
-دي بتحط مكياج اللهم ابعد عنا التبرج، ودي مش بتحط يبقي اتوماتيك افضل وأكثر تقوي، 
-ده مسيحي هيخش النار وده مسلم اللهم جنة.

مش شرط عشان شفت حسنين في الشغل ختم القران اربع مرات وأهو يادوب بيبتدي في الخاتمة الخامسة ومحمدين لسه في نص الجزء الأول يبقي حسنين يا سلاااام اللهم اجعلنا من امثاله ومحمدين تباً له لان قلبه غافل!!! 
لا في ناس كتير زي حسنين بيقروا القرآن من غير تدبر كانهم بيقروا جريدة يوميه، وفي كتير زي حسنين بيقلبوا الصفحة والصفحة الي بعدها من غير مايعووا ويستوعبوا ماذكر فيه من تعاليم وواجبات وحقوق وتسامح ورحمة وحسن معاملة والا مكنتش المشاكل والصراعات بين الناس بزيادة اليومين دول. في ناس كتير زي حسنين عايزين الناس تحكم عليهم انهم متدينين وأنهم ماااابيسبوش فرض وبيزيدوا ويجودوا في النوافل وهما اساسا قلبهم خاوي مش فاهمين الدين صح وكمان قارفين الناس الي حواليهم! 
✅ويمكن محمدين بيقرأ بتمعن وببطء ومهم عنده ان يفهم ويطبق، ويمكن محمدين بيعمل حاجات لله انت مش شايفاها ولا عمرك هتشوفها لان محمدين مش فارق عنده مين يعرف، اصله مش زي حسنين، لا ده بيعمل لوجه الله ومش فارق عنده الناس تقول عليه ايه، المهم علاقته مع الي خلقه أيه.

ومش شرط عشان مدام فاطمه الي معاكي في الشغل لابسه جوانيات سودا ومبتسلمش علي حد ومتجهمة طول الوقت أصلها متدينه اوي وقاعده بتنقد في لبس دي وتصرفات دي بحجة أنها كتله من الإيمان ويحق لها تقويم الاعوجاج يبقي هو ده التدين الصح، لا مش ده الدين معلش، أصل الخطاب الديني يا أخوانا مش بالترهيب والرعب والنقد- لا ده بالترغيب والمحبة والنصح! 
✅و يمكن مدام ميرڤت الي هي واخدة بالها من نفسها ولابسالنا نص حجاب اعوذ بالله من غضب الله بتشيع طاقه ايجابيه وطاقه محبة في محيطها، ويمكن مدام ميرڤت بتسلم عادي علي رجالة ومش محبكاها لانها ست متصالحة مع الي خالقها ومع نفسها ومعندهاش وقت للقيل والقال ولا عبد العال ولا بتنقد في دي ولا مركزة مع ده، مركزة مع نفسها ورسالتها في الحياة، كل الناس عندها سواسيه اصل قلبها نضيف و بمحبتها ممكن تكون قدوة اكتر من الي بتشخط باسم الدين وأقرب الي الله اكتر من الي ظاهرياً لابسه حجاب كامل!

⭕️مش كل الي لابس جلابيه وضارب دقنه مترين لتحت يبقي توماتيكي بيعرف ربنا لاء.
⭕️ومش كل الي لابسه اسود في اسود من تحت لفوق تبقي علي طول قلبها نقي ومابتطلعش منها العيبة برضه لاء.
⭕️ومش كل واحدة كاشفه شعرها ولابسة جيبة قصيرة تبقي يا إما مسيحيه يا إما مسلمه متبرجة يقام عليها الحد برضه لاء.
⭕️ماتهدريش طاقتك تصنفي دي بالتبرج عشان مزحلقة الحجاب لورا ودي بالرِدة عشان قلعت الحجاب ودي بالفسق يا أختاه عشان لابسه بنطلون مش فضفاض وماتبقاش فزلوك وتحكم علي حد انه سوسو بيه عامر ومش راجل لمجرد انه انسان رقيق و چنتل في تعاملاته ( زي ماالناس كانت مبهدلة شريف مدكور كده…..) انت دخلت جواهم؟ انت عرفت مدي قربهم من ربهم ايه؟

✅خليك عميق في حكمك علي الناس ورحيم في إصدار أحكامك عليهم ومتسامح في تقبل اختلاف طبائعهم واختلاف ديانتهم معاك. 
خلي الناس كلهم في نظرك وإحساسك زي أسنان المشط، كلهم سواء، مخلوقات ربنا الكريمة، ولو مش هتقدر تعمل كده يبقي اسكت وبطل هري وسيب المهمة دي لربنا، هو يعرف يقيم احسن منك، انت بقي خليك في نفسك.

الإيمان واليقين أشياء كامنة في نفس البشر لا يروا بالعين المجردة، لكن يتحسوا في التعامل. المحبه والرقي في العلاقات مالوش علاقه بدين معين، له دعوة بس وفقط وحصرياً بخامات نفسيتك انت – خامات جيدة ام سيئة…..

شاهد أيضاً

داعش

ابن تيمية المصدر الرئيسي للإرهاب..

من المصائب الكبرى التي ابتليت بها الإنسانية قيام جماعة من المسلمين بتكفير غيرهم من المسلمين …

2 تعليقان

  1. الكاتب الأديب جمال بركات

    أحبائي
    نعم ابنتي كثيرا ماننخدع في المظهر
    المؤمن الحق هو مؤمن المعاملات والجوهر
    ومن يراعي الله في السر والعلن هو من يعرف ان الله أكبر
    أحبائي
    دعوة محبة
    ادعو سيادنكم الى حسن الحديث وآدابه…واحترام بعضنا البعض
    ونشر ثقافة الحب والخير والجمال والتسامح والعطاء بيننا في الارض
    جمال بركات….رئيس مركز ثقافة الالفية الثالثة

    • الأديب عبد الغني صالح معوض

      اخي وصديقي وأستاذ التعليقات الراقية الأديب الكبير جمال بركات….تحياتي وتقديري

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *