الأربعاء , أكتوبر 16 2019
الرئيسية / تويته وستاتيوس / اعمل دراسة جدوى مشروعك بنفسك دراسة جدوى اي مشروع في 7خطوات
حسين بكرى

اعمل دراسة جدوى مشروعك بنفسك دراسة جدوى اي مشروع في 7خطوات

استشاري المشروعات /حسين بكري

خد بالك:

1- لو خايف تبدأ مشروع..أحسن علاج لخوفك هو المعرفة.

2- لو متردد..إعرف وادرس وقرر.

3- مشروعك اختيار وتنفيذ وادارة من دماغك – انا وغيري بنقول الاساسيات بس.

4- لازم تتحول من موظف يدار الي صاحب مشروع يدير.

5- كل الاعمال مخاطرة ولكن تحتاج الدراسة لتقلل وتدير المخاطر -فتكسب كثيرا او تخسر قليلا.

دراسة جدوى اي مشروع في 7خطوات

1 – اختيار مجال المشروع ومجموعة المنتجات او البضائع او الخدمات.

2 – دراسة السوق لتحديد مدي حاجته لمنتجات مشروعك  وهل يوجد منافسين وماذا يبيعون وبكم وهل توجد فرصة لمزاحمتهم او يوجد طلب زيادة عن العرض ام ستقدم منتج جديد او المنطقة محرومة من منتجك وتوجد كثافة طلب – وهل قدرة الناس الشرائية كافية لشراء منتجك واين هم وكيف سيعرفوا عنك وكيف ستتواصل معهم وكيف ستوصل منتجك لهم،ومواصفات منتجاتك او بضائعك او خدماتك واسعار بيعها وتكاليف انتاجها وصافي ربح متوقع.

3 – وضع تصور لكمية المبيعات الشهرية /السنوية وتكاليفها والربح المتوقع سنويا.

4 – استخدام البيانات السابقة لتحديد

– موقع المشروع

– تجهيزه والالات المطلوبة والديكورات والعمالة ونظم العمل والخامات ولوازم التغليف والخطط التسويقية وطرق العرض والبيع والتسويق.

 5 – من البيان السابق نحددع تكلفة الموقع وتجهيزه والالات وباقي التكاليف التي سيحتاجها بدء النشاط.

– وستنقسم الي تكاليف ثابتة، تصرف لمرة واحدة وهي تكاليف الاصول الثابتة

والباقي تكاليف تشغيل النشاط(سيولة التشغيل) ويجب تدبير سيولة تشغيل كافية لحين دوران النشاط والحصول علي كاش كافى للتدوير.

6 – وضع تصور لميزانية تقديرية تحدد ماتحتاجه من اصول وسيولة  علي جانب الصفحة الايمن- وعلي الجانب الاخر ضع رأس مالك.

اذا لم يكفي راس مالك لتغطية التكاليف ..فكر في استكماله بالشراء بالقسط للاصول سواء موقع او الات (لمدة مناسبة للارباح) أو فكر في الايجار- او تشغيل المنتجات لدي الغير،وكذا فكر في شراء الخامات بالآجل – لمدة مناسبة مع التحصيل من المبيعات ..ثم فكر في تمويل او شراكة أو صغر مشروعك  او قرض (في الاخر خالص).

7- إعمل تصور لنسبة الربح المتوقع سنويا علي رأس مالك المستثمر ونسبة الربح علي اجمالي الاموال المستثمرة ..لو النسبة مرضية وتتجاوز الاستثمار الامن (اكثر من 20%) فهو مشروع جيد – وطبعا لو بتقدم خدمة فنية او بتشتغل بايدك – هيكون الربح اعلي بكتير وكلما صغر المشروع تزيد نسبة الربح علي الاستثمار – واحسب لنفسك مرتب معقول ضمن المصروفات – وفيه ناس بتحسب عائد بنسبة علي قيمة استثمارها لتأكيد مدي مناسبة الربح – وكمان لو فيه اصول اعملها اهلاك واخصمه ضمن التكاليف السنوية————؛———–

17 ملاحظة مهمين جدا:

1 – اكتب ماسبق واستخرج منه خطة زمنية للتنفيذ.

2 – نفذ علي الخطة وتابع وعدل.

3 – التزم بالموازنة المالية وماتشتريش اصول للمنظرة – ولازم اي شراء يكون للانتاج او للبيع وتحقيق ربحية

4 – ماتشتريش كميات من اي حاجة ولو رخيصة – الا لو هتبيعها قبل ماتنزل من علي العربية اللي بتنقلها.

5 – اللي بيستورد بيبيع لمخزن جملة الجملة والمخزن بيبيع لجملة والجملة بيبيع لقطاعي – والمصنع بيدي موزع والموزع بيبيع لموزعين اصغر – اشتغل في دورك بالظبط – مافيش حاجة اسمها من المصنع للمستهلك والا السيولة هتتحبس.

6 – لو هتبيع اجل او قسط لازم يكون معاك سيولة كبيرة جدا ولازم تحسب فترة السداد والعائد وتعمل جدول تدفق نقدى.

7 – لو مش هتخطط ماتعملش مشروع

8 – لو مش هتعرف كل حاجة قديمة وجديدةعن مشروعك والمشروعات المشابهة والمنافسة والمكملة والموردين والبائعين- معلومات حديثة متجددة يوميا وتقرأ الغيب فيها كمان – ماتعملش مشروع.

9 – لو مش صاحي انت ودماغك ووعيك واداركك 25 ساعة في ال24 ساعة ،32 يوم في الشهر ،367 يوم سنويا.. ماتعملش مشروع.

10- لازم تعمل كل الخطوات دي وتعيشها وتحلم بيها.

11 – إتعب نفسك وأنت علي البر – الخوف من البداية بيكون لعدم المعرفة والخوف من التنفيذ بيكون من عدم تجديد المعلومات والبحث والتصرف بدون دراسة – الباقي ادارة هتتعلمها من الخطوات اللي فاتت وهتكتسبها مع مر الوقت ..اتعلم وابحث وإسأل وإستشير.

12 – انت إتعلمت 14 سنة في تخصص لغاية الجامعة عشان وظيفة – لو هتعمل مشروع اتعلم شهرين تلاتة عشان تحقق نجاح لمشروعك إن شاء الله.

13 – الكلام ده ماأنزلش ومش قانون – بصمتك الشخصية هي المهم – لكن بعد معلومات اساسية وتحديث دائم.

14- معلش إستعد لإعادة التخطيط والدراسة  مرتين تلاتة لو النتائج علي الورق مش مرضية.

15 – أنا أسف ..وانت بتبدأ التنفيذ هتقابلك مشاكل هتحتاج تعديلات (ماأعرفهاش عشان أحذرك منها)

16 – سامحني..المشروعات بتحتاج وقت للاستقرار وتعديلات لغاية ماتظبط.

17 – ربنا يوفقك ويغفرلي علي اي خطأ او نسيان او جهل – ويعلمني ما ينفعني وينفعني وينفع الناس بما علمني.

شاهد أيضاً

استشهاد ماجد فتحي القبطي من قرية بني محمديات الشهابية باسيوط وإصابة أقباط آخرين

جيهان ثابت استشهد شاب مسيحى يدعى ماجد فتحى وإصابة عدد من الأقباط على آثر أحداث …

تعليق واحد

  1. الكاتب الأديب جمال بركات

    أحبائي
    بارك الله في كل من قدم للناس النصائح النافعة
    هؤلاء هم بالفعل للبشرية زخر ودعم بصورة رائعة
    أحبائي
    دعوة محبة
    أدعو سيادتكم الى حسن الحديث وآدابه…واحترام بعضنا البعض
    ونشر ثقافة الحب والخير والجمال والتسامح والعطاء بيننا في الأرض
    جمال بركات…جمال بركات…رئيس مركز ثقافة الألفية الثالثة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *