الأربعاء , أكتوبر 16 2019
الرئيسية / أخر الاخبار / كيف تملأ بيانات إيصال_الأمانة بطريقة صحيحة .
إيصال الأمانة
إيصال الأمانة

كيف تملأ بيانات إيصال_الأمانة بطريقة صحيحة .


#محمد_السيد_طبق

موضوع بسيط جداً لكن بعض الناس بتغلط فيه للاسف ، فـ حبيت اوضحه في نقاط بإيجاز شديد

* فيه دفاتر بتتباع في المكتبات ، فيها إيصالات مطبوعه ( زي اللي في الصوره ) ، وتقدر برضه تكتبه في ورقه عاديه لو مفيش معاك إيصال مطبوع

ونقدر نحدد أهم العناصر وفق الترقيم اللي في الصوره كما يلي :-

– خانه ( ١ ) بتكتب فيها اسم الشخص اللي إنت هتمضيه علي إيصال الأمانة ، يعني الشخص اللي خد منك الفلوس

– خانه ( ٢ ) بتكتب فيها عنوانه بالتفصيل من واقع بطاقة الرقم القومي بتاعته

– خانه ( ٣ ) بتكتب فيها رقم بطاقته بالكامل ( ١٤ رقم )

– خانه ( ٤ ) بتكتب فيها تاريخ صدور البطاقة ، وده بيكون في أعلي اليسار في خلفيه البطاقة ، عبارة عن الشهر والسنة

– خانه ( ٥ ) بتكتب فيها اسم حضرتك

– خانه ( ٦ ) بتكتب فيها المبلغ بالأرقام ثم بالحروف

– خانه ( ٧ ) بتكتب فيها اسم الشخص التابع ليك ، اللي المفروض هيستلم الفلوس من الشخص الموقع علي الإيصال

– خانه ( ٨ ) توقيع الشخص رقم ١ اللي استلم منك الفلوس

خانه ( ٩ ) البصمه بتاعت نفس الشخص اللي استلم الفلوس ، رقم ١

  • الخطوط الحمراء دي المكان اللي بتقطع منه أصل الإيصال عن كعب الإيصال
  • رقم ( ١٠ ) وده المفترض انه بيكون موجود في دفتر إيصالات الأمانة ، زي الشيكات كده

ملحوظات هامه :-

* الأفضل إن الإيصال كله يحرر بخط من وقعه

* ضروري جداً ان الإيصال كله يتملي في ذات لحظة كتابته ، وبنفس القلم ، يعني متمضيهوش إيصال علي بياض وتيجي أنت تكتب الصُلب بعدها بشهور

* ضروري تحتفظ بصورة بطاقة الرقم القومي لشخص الموقع علي الايصال

* متكتبش تاريخ علي الإيصال ، لأنك لو كتبت تاريخ ومر عليه ثلاث سنوات لم تُرفع الإيصال خلالها ، هتكون الدعوي سقطت بالتقادم ، وانا عارف أن فيه رأي فقهي بيقول أن العبرة بتاريخ الامتناع عن تسليم المبلغ وليس بتاريخ تسلمه شبيه بقائمة المنقولات كده ، لكن الاتجاه المضطرد في المحاكم أنه بعد ثلاث سنوات من تاريخ الإيصال المحكمة بتحكم بانقضاء الدعوي

* لو مفيش واقعة تسليم حقيقية لفلوس ، وكان الايصال مجرد ضمان لأي معامله ، فـ خلي بالك من حاجتين :-

اولا : المبلغ اللي انت هتكتبه يكون متناسب مع الواقع بقدر الإمكان ، يعني متكتبش أرقام مبالغ فيها وغير منطقيه ، يعني مثلا مينفعش راجل عاطل لا يعمل وحالته فقيرة يكتب إنه سلم شخص مبلغ اتنين مليون عشان يوصلهم لحد ، لأن الفكرة مش منطقية

ثانيا : الشخص في الخانه رقم ( ٧ ) ، لازم يكون من المنطقي إنك ترسله الفلوس عن طريق شخص الموقع علي الإيصال ، يعني مينفعش تكتب إن زيد استلم منك خمسين ألف عشان يوصلهم لزوجتك المقيمة معاك في نفس المنزل ، لأنها فكره غير منطقيه

هتقولي هو طالما وقع انه استلم يبقي خلاص !؟

هقولك لا مش شرط ، لإن فيه دفع دايماً المتهم بيدفع بيه وهو ( انتفاء ركن التسليم ) وده معناه انه بينكر أنه استلم منك الفلوس أصلا ً – حتي لو كان وقع علي الإيصال – وهيقول إن الإيصال ده كان ضمان لأي معامله أخري ، وهيعزز هذا الدفع – ضمن ما يعززه – بالمنطق ، زي مثلا إنه من غير المنطقي إن المتهم اللي من مكان بعيد يستلم منك فلوس عشان يسلمها لزوجتك أو ابنك المقيمين معاك في نفس المنزل

وفيه دفوع ثانية ممكن المتهم يدفع بيها التهمه عن نفسه ، والمحكمة تحكم ببراءته حتي لو كان الإيصال مذيل بتوقيعه

* وموضوع خيانة الأمانة ده فيها كتب ومجلدات ، لا يتسع المقام لشرح كل تفاصيلها ، لكن حبيت استعرض الطريقة المثلي لملأ بيانات الايصال لغير المتخصصين

والجريمه بتحكمها الماده ٣٤١ عقوبات ، والتي حددت لها عقوبة الحبس ( بشكل مطلق ) ، فـ يكون طبقاً لحده الادني ٢٤ ساعة وحده الأقصي ثلاث سنوات .

شاهد أيضاً

البرلمان يحدد أماكن تواجد ” التوك توك ” في قانون المرور الجديد ..

أمل فرجقال النائب يحيى الكدواني، عضو لجنة الدفاع والأمن القومي، بمجلس النواب: إن تقنين وضع …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *