الخميس , سبتمبر 19 2019
الرئيسية / مقالات واراء / جرائم المجتمعات المقهورة
ماجدة سيدهم

جرائم المجتمعات المقهورة

الكاتبة والأديبة : ماجدة سيدهم

تعليق عن خبر قيام دكتور بالقاء طفل رضيع بالقمامة عن علاقة غير شرعية

أولا .. دا دكتور يعني واحد من متفوقين الثانوية العامة اللذيذة والهوس المعتوه بكليات القمة الألذ …

وأنه لازم يبقى دكتور قبل مايبقى بني آدم وإنسان محترم .

* ثانيا الخبر بيقول علاقة غير شرعية.. ودي في عرف مجتمعنا الطاهر والمثالي يعني مش متجوزين على إيد مأزون وشهود وهيصة وزمبليطة ..يعني فضيحة ودا على أساس أن علاقات الزواج الرسمي كلها زي الفل ..

وطبعا الطفل دا عار ولازم يترمي بعاره ..وبكدا يطلع الأب والأم في منتهى الشرف والالتزام قدام الناس الحلوة ..ولامن شاف ولامن دري ..


*ثالثا..الخبر بيقول أنها عاملة بعيادته ..يعني بنت غلبانة ممرضة أو عاملة .. المهم من مضمون الخبر نعرف أنه هو اللي غرر بيها واستغل رقة حالها بدليل أنه هو اللي نفذ الخطة من أول استدراج وأول حضن أغتصبه في الضلمة لحد آخر الزبالة ..


ولأنه مش جدع .فلازم يتخلص من البلوة دي ..سمعته مهمة برضه ..ويمكن رمى لها قرشين علشان تتخرس ….ولأنها هي من نفس المجتمع اللي مابيرحمش ولأنها وثقت فيه وتخلى عنها فمش ممكن تدافع عن رضيعها خصوصا وأن الأب مستحيل يعترف به


*رابعا ..الخبر بيقول” الدكتور الفاشل..” رغم أنه دكتور قد الدنيا ودحيح مذاكرة وعنده عيادة .. المهم ياسادة كام فاشل غيره في كل مجال بس لسه مستوربن ..دا كل يوم بنشوف حكايات وحكايات لفسدة وفشلة وفي مناصب ابهة


* خامسا .الخبر بيقول أن الرضيع اترمى في بين أكوام القمامة ..دي اللي هي فين بالظبط ماهي كلها بقت قمامة في الشوارع وقمامة في المخ وياما أطفال كان عفن أكوام المخلفات دي أحن واشرف عليهم من مجتمع طاهر ومثالي ..


طبعا حضرته ماكنش على بعضه لايعرف يعني إيه علاقة بين اتنين ..ولا اتربى على الرجولة وشرف المسؤولية .. على الأقل قدام موقف زي دا المفروض حايتصرف برجولة كأي إنسان مسؤول عن تصرفاته .. لكن للاسف طلع مجرد ذكر في حالة هياج مستمر .. وأمثاله كتير جدا ..


أي علاقة بغير حب ونضج واحترام ومسؤلية هي علاقة غير شرعية حتى لو بقسيمة جواز .. حتى لو بينهم عشر عيال ..تفتكروا البيوت التعيسة دي ممكن تعرف تربي بني آدمين ..اكيد الخلفة حاتكون على شاكلة الدكتور دا


سادسا ..الجرايم اللي من النوع دا أغلبها بيكون بين أوساط اجتماعيا متواضعة الحال . لكن لما بتحصل بين ناس المفروض ،(المفروض ) أنهم أكتر وعي وتعليم وثقافة ..يبقى لازم نعترف بمصيبة كبيرة وهي أن الأتنين ليهم نفس العقلية المتخلفة ونفس الفكر اللاخلاقي لنفس المجتمع الطاهر والمثالي اللي هو أصلا تربية شيوخ الهوس بالجنس اللي بلا أخلاق ولا قيم. ولا جمال وكمان تربية اعراف اجتماعية بتدفن أي طفل خارج إطار الزواج لكن ممكن يخلفوا مليون طفل شرعي هربان من بيته النموذجي.. علشان بعيش تحت رحمة الكباري الشوارع ..


أخيرا شكرا للمباحث اللي حددت هوية الأم ..وشكرا كمان لو حددتوا إيه هي هيويتا بالظبط اللي اغتصبت من كتر فوضى الأخلاق ووضاعة المفاهيم الذكورية الخربانة ..وازاي تكيفنا كدا مع كل السوء والوضاعة والقسوة دي ..هو احنا ليه مش بني آدمين . ليه مش جدعان ..ليه مش بنخاف على بعض وبندوس على بعص ..لسبب بسيط أننا تربية الخوف والنجاسة والعيب والحرام والكدب كل دا مش مهم بس المهم تتخلص من طفل خارج الزواج ..


امتى تقبضوا علينا وعلى اللي خللي ناس كتير مننا عبارة عن صورة مجسدة للخوف وقلة الضمير والقبح والفشل ..

شاهد أيضاً

رأس السنة المصرية”

كتب : محمد السيد طبق مع شروق شمس اليوم الحادي عشر من سبتمبر يحتفل العالم …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *