الطائفية فى التعليم بمدرسة ٢٥ يناير الابتدائية فى العاشر من رمضان

جيهان ثابت

كتب رامى كامل على صفحته الشخصية العنصرية التى تمارس داخل المدارس المصرية ضد الطلاب الأقباط  قائلا

الحكاية كده برصد سريع ان شخص نزل استغاثة من مدرسة ٢٥ يناير الابتدائية فى العاشر من رمضان ان ادارة المدرسة جمعت التلاميذ الاقباط فى فصل واحد “سياسة الفصل العنصرى” و الفصل ده مفيهوش اى دكك او حتى سبورة للتعليم و مفيش مدرس بيدخلهم.
بعد نشر القصة فى احد الجروبات ظهر ان مدرسة احمد زويل فى العمرانية ماشية بنفس المنهج و لما الاباء راحوا المدرسة و مضوا تنازل عن حصة الدين لاعادة دمج الاطفال وسط اصدقائهم كان المدرسين بيشتموا التلاميذ المسيحيين و يعاملوهم بعنصرية.
مع النشر ظهرت وقائع تانية فى الفيوم و تحديدا فى طامية وهناك سقطوا التلاميذ الاقباط.

طبعا احنا مش متاح لينا نحصر كل المدارس لكن عندنا على الاقل توثيق بشهادات ناس عن الانتهاكات ضد الاطفال الاقباط بسياسات فصل عنصري و انتهاكات تمس ادميتهم او استهدافهم سلبا فى نتائجهم التعليمية وده يعد انتهاك واضح و صارخ ضد اطفال بينتموا لاقلية.

بتمنى اقدر اعمل حصر لكل المدارس لانى واثق من حدوث انتهاكات بالجملة خاصة ضد الفتيات القبطيات فى الثانوية و وصلنى عدة شهادات بكده هنشرها فى وقتها.
هل وزارة التربية و التعليم هتتخلى شوية عن مناهج الفصل العنصرى و تمارس نوع ما من الرقابة على الخطاب الطائفى و العنصرى فى المدارس ؟
هل الدولة هتدرك ان الارهابى الكبير اللى بيحرق و يقتل بيتربى فى مفارخ الفصل العنصرى على احتقار زميله “الكافر” فى وزارة التربية و التعليم ؟
التوثيق عندى و اسماء المدارس فى البوست و خالص تحياتى.
تحديث : ظهرت شهادة لاشخاص من السويس و مدرسة طه حسين الابتدائية ببنى سويف