الجمعة , نوفمبر 29 2019
أخبار عاجلة
الرئيسية / مصريين بالخارج / هام جدا للأباء والأبناء بوست سنوي يعاد نشره للتوعية
محفوظ مكسيموس

هام جدا للأباء والأبناء بوست سنوي يعاد نشره للتوعية

بقلم / محفوظ مكسيموس

عزيزي الأب ، عزيزتي الأم أرجوكم بلاش:
١- بلاش تعاقبوا أولادكم بالضرب على الوجه لإنك بتخلق جواه صغر نفس و خنوع مع مرور الوقت ممكن يتحول من راجل محترم لمجرد مسخ .
٢- بلاش حضرتك تستخف بدماغه و توعده وعود كاذبة علشان تراضيه لأنك من غير ماتحس بتعمل حاجتين أسوأ من بعض أولا بتفقده ثقته فيك و بتعلمه ( الكذب ) .
٣- بلاش تفرض عليه ألعابه وأنشطته و ذوقك ف اللبس علمه يختار و يصنع شخصية مستقلة و هو طفل علشان ما يجيش اليوم اللي تحس فيه بالذنب ع الفاضي.
٤- أوعي تعلمه حاجة إنت بتعمل عكسها علشان حضرتك ببساطة بتأكدله إنك مزيف و صاحب شعارات حمضانة.
٥- أوعي تناديه بألفاظ مهينة حتي كنوع من العقاب و خاصة ( غبي، حيوان ،حمار،…..إلخ ) لأن حضرتك إما تعوده إنها ألفاظ عادية و تصيبه بالبلادة و دي مصيبة إما إنك تعلمه إستعمال الألفاظ ويبقي ( قليل الأدب ) و هذة مصيبة أعظم
٦- بلاش تقطع في الناس و تنم عليهم قدامه لأنك بتعلمه نفس المرض . إمتدح الكل قدامه هيحبهم و يحترمك إنت.
٧- إوعي تتعامل معاه علي إنه ( دمية أو لعبة ) إحترم وجوده وإوعي يشوفكم في العلاقة الزوجية الحميمة. محبكتش إستني لما ينام لأنها مأساة إنه يعتبر ده عادي قبل سن الإدراك.
٨- إوعي تحس إنه إنطوائي و تقول عادي وتنفض لا ( التوحد ) يتعالج لو لحقته بجلسات نفسية في البداية وإلا هتضرب رأسك في الحيط وتقول ياريت.
٩- إوعي تشوفه مابيتكلمش كويس بعد ٣٠ شهر و تسكت بسرعة خده لدكتور نفسي أو متخصص ( تخاطب ) لأن ممكن يكون لسانه مربوط و دا شائع جدا و علاجه سهل عملية جراحية صغيرة و ممكن يكون بسبب إنكم مبتتكلموش معاه ودا وارد جدا.
١٠- أوعي تتخانقوا قدام العيال لأن التفكك الأسري مش بس طلاق و إنفصال و هم بيستوعبوا كل حاجة و بيخزنوها في ذاكرتهم و بتكون ملامح شخصيتهم .
١١- أوعي تلغي شخصيته قدام نفسه أو قدام الناس علشان ده هيصنع منه تابع وغير مستقل.
١٢- أوعي تفرض عليه لعبة معينة أو حضانة معينة لو محبهاش غيرها وهو شايف أحسن منك بكتير.
١٣- أوعي تعاقبه بإنك تدخل أوضة وتقفل عليه و تسيبه منهار لأنك بتأذيه نفسيا جدا .
١٣- أوعي متحضنهوش ع الأقل خمس مرات في اليوم .
١٤- أوعي تعامله إنه مش فاهم حتي لو فعلا مش فاهم .
١٥- أوعي تسيب قرايبك بعد سنتين يشيلوه ع الحجر ( خطير جدا ) لأي سبب نبه ع الكل بلاش حتي لو هيزعلوا منك ( صحته النفسية أهم بكتير من زعل قرايبك )
صديقي و صديقتي الأعزاء قرار إنك تبقي أب أو أم قرار مصيري جدا وتأكد إنك بقرار الإنجاب قررت إنك تخلي قلبك متجول خارج جسمك . طفلك مسئوليتك وهتتحاسب عليه قدام ربنا وصدقني لو أسأت له عمره ما هيعرف يحبك بجد وهيندم إنك والده أو والدته . إهتموا بيهم وهم صغار هيهتموا بيكم جدا وأنتم كبار و عواجيز.
١- بلاش تخلي طفلك يتفرج ساعات طويلة علي كرتون علشان ترتاح من زنه.
٢- بلاش تخلي طفلك يتفرج علي أفلام عنف و رعب .لأنها بتخلق جواه عدائية و عنف بإعتبارهم بطولات.
٣- بلاش تفرض علي طفلك صيام كنوع من إنك تعلمه دا إسمه هبل ( أكل طفلك وناوله ) دا طفل وربنا هيبقي مبسوط جدا بيه.
٤- بلاش تعنف طفلك في الكنيسة علشان بيعمل دوشة ( خليه يحب المكان وبكرة هيحترمه جدا بدل ما ترسمله صورة إن الكنيسة مكان للعقاب )
٥- بلاش تتعامل مع طفلك علي إنه لازم يتعلم تحمل المسئولية والكلام الفاضي ده. شجعه وساعده إنه يكون مبسوط وإعرف إن المسئولية مش دروس و وعظ .
٦- راقب تصرفاته بذكاء وإحترم خصوصيته جدا ودايما تناديه بإسمه .
٧- بلاش تحط طفلك في مقارنات مع حد وتقلل منه . شجعه و أدعم إمكانياته و قدراته فقط.
٨- أوعي تحط لإبنك قدوة معينة ولا مثل أعلي لأنك كدة بتحصره وبتحددله إنه يحقق لك طموحك انت مش هو يعني حضرتك بتلغيه.
٩- اوعي تشوف إن معندوش أصحاب وتسكت وتقنع نفسك إن كدة كويس لا إتكلم معاه وشوف إيه المشكلة و ساعده لأنه ممكن يكون خجله كبر وخلق جواه إنطوائية ودي بداية مشكلة نفسية ممكن تكبر جدا لو كبرت دماغك.
١٠- أوعي تحرجة قدام ضيوف ولا أصحابك بحجة إنك بتعلمه الأدب . هيكره الإجتماعيات بسببك وهيكره صحابك
١١- أوعي يجيبلك حاجة و متشكروش حتي لو كانت فردة شرابك شكرك ليه تشجيع وهتخليه يبقي عايز يخدمك بشغف وهيتعود يشكر كل حد قدمله خدمة.
١٢- بلاش تحكيله عن الموت إلا بعد ٦ سنوات ولو رفض أجل كمان لكن لازم تحكيله .
١٣- أوعي تلبس ولدك لبس بنت ولا بنتك لبس ولد دا إسمه هبل وبتفقده إنه يتعرف علي الفرق بسرعة . علميا طفلك مبيعرفش إنه ولد ولا بنت إلا بعد ٣ سنوات بس انت ممكن تخليه يعرف بعد سنتين بس.
١٤- خليه يشوفك وانت بتقرأ وتصلي و تسمع موسيقي و أفلام و بتلعب و خليه يشاركك لو هو حابب بس بلاش تفرض عليه.
١٥- أوعي تفهمه إن الدين ضد العلم ولا ضد الفن ولا ضد الرياضة . خليه يحب الحياة ويستمتع بيها .
١٦- أوعي تفرجه علي أفلام شهداء في سن صغيرة بحجة الدين . حضرتك علمه إن الحياة منحة من ربنا و مش رخيصة و أجل كلامك عن الشهادة لسن يستوعبك و يناقشك فيه.
١٧- أوعي تشوفه بينام كتير و تسيبه علشان ترتاحوا منه . لو نام أكتر من ١٠ ساعات في سن بعد السنتين صحيه وإتكلم معاه.
١٨- علمه البساطة في كل حاجة و فهمه إن المحبة أهم من أي حاجة.
للحديث بقية……… وأتمني إن السلسلة تكون مفيدة للكل. دمتم أباء رائعين و أمهات جليلات.
من ذكريات ٢٠١٧.

شاهد أيضاً

بمناسبة عيد ميلاد دكتور مجدي يعقوب

بقلم / محفوظ مكسيموس لم يبني كنيسة أو مسجد ، لم يعتلي المنابر لإلقاء خطب …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *