الجمعة , مارس 29 2024

أيوه أنا تعرضت للتحرش

بقلم / ماجدة سيدهم

أولا لازم نعرف أن التحرش هو أسرع مشروع مستقبلي للاغتصاب

السطور دي موجهة لأي حد بينتقد لبس البنات ونقوله “افترض البنت دي بنتك أو أختك أو مراتك . فيرد بثقة بنتي ملتزمة وأختي ماتخرجش كدا من بيتها ..”

أحب أقول لحضرتك ..لأ .. البنت أو الست دي هي فعلا بنتك ومراتك وأختك والست والدتك كمان . بس الصدمة والقرف والقهرة والحزن بتقتل فيهم حتى الرغبة بالحكي ..ولو افترضنا أنهم قالوا لسيادتك ..حاتعمل لهم ايه .. ؟؟؟؟.. اقولك …مش حاتعمل حاجة ..(ودي نتكلم فبها بعدين)

النوع دا من البشر حتى لو مافعل التحرش كتصرف لكنه متحرش خطير من جواه ..ودا ألعن ..

فلما تكون متحرش وتنتهك جسم أي واحدة وتستغل أنها من ربكتها وخوفها مش حاتنطق وتسكت.. ومش حاتعرف تدافع عن نفسها .. لازم تعرف أن فيه واحد محترم ومؤمن زيك برضه بينتهك جسم اللي يخصك ..وبرضه من الصدمة مش حاتنطق وتعيش انت عادي جدا تنتقد في لبس بنات الناس ..

فهمت ..؟ نقول تاني .وعلشان نكون واقعيين شوية ..كام واحدة فيكي يامحروسة ماتعرضتش للتحرش .بأي صورة كانت .. دا من أول الرضيعة أم بامبر حتى العجوز أم بامبر برضه . يامؤمن دا انتو مش عاتقين حتى نزيلات المشفيات ولا أصحاب القدرات الخاصة ..و والظريف كتير من المتحرشين آخر وجاهة

التحرش اكتسح المدارس ..الدروس الخصوصية .. الجامعات ..المشفيات ..المصالح الحكومية المصاعد ..محلات ..نوادي ..كافيهات مواصلات ..شوارع . افران …أسواق ..جوه البيوت ..ولا حضرتك حاتعمل مش واخد بالك .. دا المحجبة المسكينة أكتر واحدة بتتعرض للتحرش من واحد زي حضرتك حتى لو حاتلاحقها بعينك ..

طيب عاوز تعرف يامؤمن إيه اللي بيتعمل في البنات والستات من المتحرشين ولا أنت عندك فكرة ولا أنت خبرة ..من أول الكلام الجنسي الرخيص .. الايماءات المبتذلة ومداعبة الأعضاء التناسلية لحد مد ايدك اللي عاوزة قطعها على المؤخرات والصدور أو بين الفخذين ..ايه مستغرب ..مش عارف بيتعمل ايه في الموصلات لما دكر مش على بعضه يرمي تقل جتته كله على الغلبانة اللي قاعدة مضغوطة جنبه .. ولا ازاي بتستغل حضرتك الصغيرين وانت بتلاعبهم أو بتعلمهم ركوب العجل أو السباحة ..او حتى بحجة انك بتأكلهم …(خللي بالكوا من أطفالكوا..)

ولازم تعرف ان اللي بتتعرض للتحرش .. بيتكسر جواها كل شيء يفكرهها أنها إنسانة لها حق تعيش ..انت اللي كسرته …بتنطفي فعلا ..بتمرض ..بتخاف ..بتفشل ..مش بتركز ..بتكره..تعاني الارق وعدم الثقة بالنفس ..بتسرح وبتنزوي وتدبل ..مش كفاءة رغم أنها ممكن تكون متعددة المهارات ..معاك ومش معاك ..ممكن تكون بتتكلم كتير علشان تخمد صوت الكسرة جواها وحقها اللي ماعرفتش تاخده وقتها ..فعلا بتكون مهزومة ..

أما إذا قدرت وتخطت ازمتها بعد سنين كتير فبرضه بتسيب علامة كبيرة أوي ..ومابنعرفش نفسر أحيانا بعض التصرفات غير المنطقية لأن النزف من جوه ماحدش شايفه غيرها ولسه بتتوجع أوي مع نفسها

للأسف احنا ماعندناش مؤسسات متخصصة لتأهيل البنات والستات نفسيا اللي بيتعرضوا للتحرش والاغتصاب..لأن عندنا أولويات في بلادنا المؤمنة الملعونة بالصلاة والعمى والطرش ..وتظل البنت تكبت في نفسها وتبلع قهرتها وهي ونصيبها ..

آخر حاجة عاوزة اقوله للمتحرش ..لما تمد ايدك اللي لازم تتقطع ألف حته وترجع تمسك بيها المصلية والسبحة.. وفمك اللي بتخرج منه كل القذارة والأدعية والأذكار ..كل دا اسمه نجاسة مش تحرش ..ايوه دي نجاسة ..

يعني سيادتك دكر نجس بامتياز ..ومالكش زي ف العالم كله ..شوف كام نجس في المحروسة احنا الستات بنعاني بسببه ..

أنا دلوقت راضية حكمكوا ..لو صدقتوا أن اغلب ستات مصر مش حاقول كلهم تعرضوا للتحرش . ياترى حاتحكموا على أي متحرش بإيه … الفرم ..الحرق ..مناسب على فكرة ..ومش حانترحم على حد …حانزود البنزين .. دي القهرة في عيون البنات وهي بتحكي تطير النوم وتحزن القلب ..

والوجع في سكات الستات اللي بقوا جدات بسبب تحرش حصل زمان ولسه بيتعرضوا ..خلاهم حزانى حتى وهم بيضحكوا وفعلا شايفين الموت راحة.. كفاية ..بقينا بلد سمعتها تكسف ..

عاوزين نعيش مرتاحين ..صعبة دي!



شاهد أيضاً

يتساءل الجهلاء : أليس المحجبات مثل الراهبات؟

إسماعيل حسني الراهبة إنسانة ميتة، صلوا عليها صلاة الميت يوم رهبنتها رمزاً لمغادرتها العالم المادي، …

2 تعليقان

  1. زعفران ابن زعبوط

    يسقط مجتمع الانحطاط. هذا الرجل أيضا ضحية لمجتمع منحط ويرضع ثقافة الانحطاط ..هوتخلى عن ابنتة فى محنتها وعقلة المريض بسبب الثقافة المريضة والمنحطة يصور الضحية كأنها السبب .سيدى الرجل ذو الثقافة المنحطة …المسئولية كلها تقع على الشباب المنحط صاحب الثقافة المنحطة والأخلاق المنحطة ولا تقع على ابنتك أى مسئولية حتى لو تمشى عارية فى الشارع ..ليس من حق أى واحد أن يتجرأ ويخدش حياء أى انسانة حتى لو كانت عارية ملط ..يجب تعريف الأشياء تعريفا صحيحا حتى تستقيم الأمور . هذا الشباب المنحط والمتحرش لو يسافر الى الخارج سوف تجدة يلتزم الأدب بالجزمة القديمة …هو نفس الشباب الذى سرعان ما يعود الى بلدة ويعود لمارسة التحرش والانحطاط …جذور المشكلة فى ثقافة الدين المنحط والشيوخ الأأكثر انحطاطا والذى يخلق مجتمعات منحطة . انتهى

  2. ما هي العلاقة بين اي دين وكلها تحض علي سمو الاخلاق والارتقاء بالانسان من مرتبة الحيوانية والشهوانية وبين حرية الجنس والشذوذ اللتي تؤمنون بها ويريد الملحدين والمنحليين ان يجعلوها الها للبشر..فالانحطاط والنجاسة هي دينكم وديدنكم. ايهما منطقيا يدعو الي التحرش ايها الابله

اترك رداً على Ayman إلغاء الرد

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.