الجمعة , مارس 29 2024

ماجدة سيدهم تكتب : طيب إيه رأيكوا في بامبر العفة

م الآخر ..الاغتصاب والتحرش فعل نجس ..واللي بيفعله نجس ..واللي بيحرض عليه ويدافع عنه ويبرره ويدعمه حتى لو بالسكات هو النجس الأكبر

المغتصب هو متحرش سابق حتى لو تحرش بنفسه ..طلع لقى نفسه في مجتمع له فكر وتراث نجس بامتياز ..ولقى كمان اللي بيؤيد الفكر دا وبيحمي النجاسة والأنجاس على المنابر والأعلام ومن جوه البيت كمان ..بالعكس بيرموا اللوم على الضحية ولبسها … .

فياريت يامؤمنين تخترعوا لنا بامبر محتشم أو حديد مفتاحه مع الأم ..أظن دا حل وسطي لاضرر فيه ولا ضرار( حرصا على مستقبل المغتصب في دنيا القرف )…

دا احنا لو رجعناحزام العفة بغرض نحمي البنات والستات من حالة السعار الفايرة اليومين دول حانحميهم من التحرش ازاي إذا كان كفن العفة نفسه ماعرفش يحمي ست واحدة في المحروسة ..

ماعلينا ..وسيبكوا كمان من علم وفكر شوية المشايخ بتوع المبررات وشروح المفاخدة والمداعبة وارضاع الكبير وأهل الحتة.. والالعن من كدا كمان ..واللي ضللوا اجيال كتير

السؤال بقا .. انتو فين يابتوع حقوق النسوان ..ازاي تقبلوا كل الانتهاكات دي كل يوم ولا حس ليكوا ولا خبر . بتتخرسوا ليه في كل حادثة تحرش واغتصاب واللي مررت العيشة وكان الأمر لا يعنينا ..

احنا مابنسمع بس غير صرخة ” لبعض “الأمهات المكلومة على ولادها ..لأنها بتوجع بس خلوا بالكوا من كلمة بعض ..لان لو اللي اتعرضت للاغتصاب بنت كبيرة شوية ماحدش بينطق من الأهل واللوم ينصب كله على البنت كالعادة .

معني كدا احنا مابنصرخ غير لما الأذى يصيبنا شخصيا ..نبقى كلنا كدابين بالصلاة على النبي كدا …

بكفاية شعارات وتصاوير .. بلا حرية بلا تحرر بلا نص المجتمع بلا نيلة ..على فكرة اغلب الستات اللي بيظنوا انهم مناضلات وبيطالبوا بحقوق وهمية للمراة كل مشكلاتهم مع الرجال فقط ..كمشاكل شخصية .. وعاوزين الاستقلال المادي تحت شعار ذاتي واستقلالي وحريتي ومن جوه جواري .. ودمتم ..ولكم في البرامج النسوية بالفضائيات خير دليل

ف مافيش حاجة اسمها مساواة وحقوق مرأة وأنت أصلا متأكدة انك عاجزة ..و مقتنعة وبتدافعي أوي بكونك عورة في كفن ..وانك نجسة ..وشيطان شهواني.. وناقصة ومن أهل النار.

ماهو مش معقول كل سنين الكفاح دي ومناضلات تروح ومنضلات تيجي.. وكتب تتطلع وتاريخ يسجل ..وندوات وفاعليات ..والنتيجة صفر بالعكس زي الزفت .الا اذا كان هناك فكر غير انساني معادي ومؤيد بتراث عتيق ومش عارفين نزحزحه بالفهم والعقل ..

ومش علشان عملتي لك عمل خيري مع شوية ستات شيكو ولا زورتي فصل خياطة وطواقي ولا وزعتي بطانيتين ولا كيسين مكرونة على غلابة في الشوارع واتصورتي مع ارملة بتقلي بطاطس على ناصية .. بقيتي كدا متحررة وتتكلمي في حقوق وفي منصب وبرلمان ..

اقسم بالقهر اللي اتقسم علينا لو طلعت مؤسسة نسائية واحدة أو نايبة واحدة وفجرت القضية وحولتها لقضية رأي عام المجتمع حايترج ويفوق من الغيبوبة اللي قتلته .. .نايبة واحدة أو مؤسسة نسوية ترفض وتصر بشدة على وضع قانون صارم وتطبيقه فورا للحد من كارثة حقيقية في كل حتة من شوارع المحروسة بتهدد أمننا وسلامتنا كلنا بلا استثناء وقتها هاقول فيه أمل بكفاية بجد ..لولا الجهل ماستباحت حماقة البهاليل والدراويش عقول اجيال وأجيال ضلت بجد

كل من يتعرض للتحرش أو الاغتصاب هو يخصني ..والمفروض يخص الدولة ..

شاهد أيضاً

يتساءل الجهلاء : أليس المحجبات مثل الراهبات؟

إسماعيل حسني الراهبة إنسانة ميتة، صلوا عليها صلاة الميت يوم رهبنتها رمزاً لمغادرتها العالم المادي، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.