الإثنين , يناير 13 2020
الرئيسية / مقالات واراء / د. إيـهاب أبـو رحمــه يكتب: مـش كفايــة كـده ؟؟.
د.إيهاب أبورحمه

د. إيـهاب أبـو رحمــه يكتب: مـش كفايــة كـده ؟؟.

اعذروني يا جماعه هكتب بالعامية عشان طفح الكيل بجد والله و الموضوع زاد عن حده .

ما هو مش معقول كل شويه نلاقي واحد يعصر دماغه عشان يلاقي حل لمشكلة طفشان الأطباء في مصر فيكتشف حل رهيب عجيب مره نمنع سفر الاطباء مره نرفض استقالاتهم مره ندفعهم فلوس تعليمهم و كأن المشكله في الأطباء ولاد التييييت دول اللي مش عاجبهم الأوضاع الماديه الهايله و المرتبات الخياليه طبعاً في بلدنا بمقارنتهم بالمهن الأخري و كمان مش عاجبهم و طمعانين في مرتبات أعلي فبيطفشوا بره مصر بقا .

💥إزاي يا جدع انت وهو مرتباتكم أعلي مرتبات في البلد و مش عاجبكم بلاش طمع بقا و افترا و ادفع الدين اللي عليكم لبلدكم اللي صرفت عليكم دم قلبها ولا عمرها أخدت منكم ولا من أهاليكم ضرايب ولا أستقطعت من مرتباتكم أي فلوس عيب كده والله !!.

بص بقي يا معلم أنت و هو نحسبها بالقلم كده أنا شخصياً بعد ١٥ سنه طب مرتبي ميوصلش ٣٥٠٠ جنيه و اللي بقاله ٧ سنين وأهو جنبي أهو منفوخ محصلش ٢٥٠٠ جنيه أه والله زي ما بقولك كده يعني أقل من عامل نظافه في أي بنك مصري مش هنقول أجنبي و ليه نقول بنك ، في عامل نظافه كنت بدردش معاه كده عن ناس بتغسل العربيات بقوله الناس اختفت فين يمكن الشركه بتديلهم مرتبات تعبانه قالي لا والله بياخدوا ٣٠٠٠ جنيه في الشهر و بيوفرولهم سكن كمان ببلاش بقوله طيب متروح ف الشركه دي طالما الدنيا كويسه كده قاللي لا أنا مرتبي أحسن !! طبعاً ربنا يباركله بس أهو ده حال أطباء مصر رواتبهم أقل من رواتب عمال النظافه اللي طبعاً يستاهلوا أكتر من كده بس المشكله مش فيهم المحزن هو وضع الأطباء اللي خلاص مبقاش لهم تمن ولا قيمه .

لما تبقي دكتور طفحت الدم في سنين طويله و تعليم اتذليت فيه و في الأخر يومية سباك اللي هي كام ساعه أعلي من تلت مرتبك و عامل نظافه بيرجع يبات في بيته مرتبه أعلي منك مش هقول بقا ظابط شرطه ولا جيش و لا وكيل نيابه ولا محاسب ولا أي حاجه في شركات الكهربا و البترول ولا حتي تليفونات !!.

💥يا تري جهابذه البشر اللي مش شادين حيلهم علي حد غير الأطباء فكروا يعرفوا ايه هي أوضاع الأطباء و إيه أحوالهم الماديه ولا بس قاعدين يحسبوا عدد كشوفات كبار الأطباء أو النصابين منهم و شغالين بس ينقوا علي اللي داق الذل و المهانه منهم في غربه عشان يرجع يعيش في حياه معقوله و هم نفسهم مفكروش مره يعرفوا عددهم كام دلوقتي و هربوا فين و ليه ؟؟.

يا تري يعرفوا انه نهاية الخدمه متجيبش ٢٥ ألف جنيه في الوقت اللي ملازم نهاية خدمته مئات الألوف ، ده حتي معاشهم اللي هو حقهم قانوناً مستكترينه عليهم مع أنهم دفعوه من دمهم وعاوزين يربطوه بوقف مزاولة المهنه !!.

أهالينا دفعوا أرقام كبيره في تعليم الطب من كتب و مستلزمات بمئات و يمكن ألاف الجنيهات و غيرنا كان مقضيها كافتريات و لف في الشوارع و احنا شبابنا ضاع في كليه مش بترحم و دماغنا باظت من شغل الليل و سهره و ساعتنا البيولوجيه اتلخبطت مئات المرات ويا ريت عاجب ، طب ايه مش كفايه كده و ترحمونا من اقتراحاتكم دي ولا إيه؟؟.

طيب الباشا يعرف إن الوزاره نفسها اللي بتدي الدكتور بتاعها ملاليم في الشهر و راتب لا يتعدي ال٣٥٠٠ جنيه شهرياً بالنبطشيات و الحوافز و السلطات هتديله ١٠٠٠ جنيه علي النبطشيه اليوم الواحد لو استقال منها واتعاقد معاها ؟؟ يعني عندها نوعين إما متعاقد و ده يومه(٢٤ساعه) ١٠٠٠ جنيه و عبد ثابت ب ٣٥٠٠ جنيه عن كل الشهر !! .

طيب سعادته يعرف إن نفس الوزاره دي عدد أطباء تخديرها و عنايتها تقريباً ١٢٠٠ دكتور و مبترضاش تديهم أجازات عشان إمتحانات و دراسه اللي هي علي حسابهم ؟؟ طيب إيه الحل تفتكر سياتك ؟؟.

أه اتعلمنا في بلدنا اللي بنحبها زي ما أي حد اتعلم أهالينا كانوا بيدفعوا ضرايبهم عشان تعليمنا زي ما احنا بندفعها دلوقتي و علاجنا و تعليم عيالنا مش مجاني كمان و يمكن سنين كليتنا طويله بس غيرنا كان بينام في الكليات و محدش حاسبه زي ما انتم جايين تحاسبونا ، لا حضرتك إحنا دفعنا كتير و كتير من عمرنا و من صحتنا برواتب ضعيفه معدومه و من حياة أهالينا و متنساش أن الأطباء شالوا البلد في أصعب ظروفها من أول يناير و كل الأحداث اللي بعدها و طول عمرنا عايشين في الدم و ريحته في الوقت اللي غيرهم في تكيفات و علي مكاتب و بياخدوا أضعاف رواتبهم .

بدل ما تحاسبوهم علي استقالتهم حاسبوا وزارتهم اللي مش بتديلهم رواتب تحترمهم و كمان طعنت حتي علي بدل العدوي من ١٩ جنيه لألف جنيه في الشهر ، حاسبوا الوزاره اللي بتطفش أولادها منها و بعدين ترجعهم بتعاقد بعشرات الأضعاف .

أوعي تكون فاكر أننا غاويبن غربه و ذل من اللي يسوي و اللي ميسواش ولكن الظروف حكمت و بتحكم و افتكر أننا حتي في غربتنا احنا السند الأكبر بالعمله الصعبه لبلدنا الحبيبه مصر في الوقت اللي ناس شغاله بتفكر تضييقها عليهم ازاي كمان و كمان زي سعاتك .

طب إيه مش كفايه بقا و حضرتك تشتغل علي الأسباب عشان تحلها ولا هنفضل كده بندفن راسنا في الرمل و المشكله تتفاقم زياده و زياده؟؟ أو سيبوهم بقا يستقيلوا يسافروا يطفشوا ملكمش فيه ، سيبوهم يسعوا و يشتغلوا في مكان يأكلهم عيش شويه ..

استقيموا يرحمكم الله و كفايه ….

شاهد أيضاً

استشعار الحرج عن نظر قضية “مجدي مكين” قانوني، والعدالة البطيئة ظلم

هاني صبري – المحامي قررت محكمة جنايات القاهرة المنعقدة بعابدين، التنحي عن نظر محاكمة ضابط …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *