الجمعة , يناير 31 2020
الرئيسية / مقالات واراء / اسمعوا واعوا
ميلاد ثابت إسكندر

اسمعوا واعوا

عارف السـر إللي مَخـفي

جـوَّه صندوق الأزاز ؟!!

إللـي رايـح جـاي شايـفُـه

أي واحــد فـيـنا عـارفُــه

الأزاز شــفــاف وكاشفُـه

والاسم أهو سر وخلاص

عـارف أنك مـش فاهـمني

وبتسـخــر مني وظـالـمني

بس اهــدا بلاش تلـومـنـي

هَحكي القصة من الأساس

بـلـدي بـجـد الله مـاليـهـا

خيرُه إللي مالوش حدود

فـتـش عـنهـا هـتلاقـيهـا

كنز للمصريين مرصود

بحر أبيض وأحمر يامان

نيـل بطعـم الخـيـر زمان

أرض خَــضـــــرة

صَـــحـــــرا نادرة

فيها رملة كهرمان

شمـس فـوقـنا مشَـعـشَعـة

ريـح قــويــَّـة مســمَّـعــة

والطـبـيـعــة مــتـدلـعـــة

مافيش زلزال ولا بركان

آثار عـظـيـمـة مـاليــه الـبـلـد

تماثيل متاحف من غـير عدد

بـجـد أنا خـايـف م الـحــســد

راح أمسك ف الخشب كمان

بس هحسد أيه يا حسرة !!

دي الحقيقـة عكـس ذلك !!

أيوه رغم الخير ده كلـه -$-

المصري كائن مُتهاـلك !!

عايـش كل يـوم بـيـومُه

الفقـر بـيـنـخـر عـظامه

والجهـل مـزوِد هـمومُه

والـتُجار ماسكين لجامُه

هيبيـع علشانهم هـدومُه

ده العقل اتبرمَج نظامه

بـيـتاجـروا في كل الخلايق

تلـفـيـق للـمـاضـي بـدهــاء

تـزيـيـف مع قـلـب الحقايق

أصَّلـوا فـي الشعـب الغباء

مصر إللي التاريخ رسمها

شمس ساطعـة بالحضـارة

حـيَّـرت الـدنيـا بعـلـومـها

كـانـت للعـلـــم الـمَـنــارة

إللي خيرها سد جوع الناس

وفـــــــــــــــــــــاض

وقت ما الجوع كان شديد

والأمم خالية الوفاض

مصر أحمُس مصر مينا

مصر مدنية مدينة

مصر كانت فلك نوح

للأمان مرسي ومينا

مصر يعني الله تَجَلَّى

فوق جبالها في قلب سينا

استلم موسي الوصايا

كانت للشرع البـداية

لسه فاكرين الحكاية ؟

ولا هتقولوا نسينا ؟!؟

مصر إللي يسوع باركها بالزيارة

من شــمــالهـا لجـنـوبها

علمت رجله ف دروبها

سجـلـتْ بلدي في كتبها

رحـلة مسارها الطهارة

تَـوَّجهـا بأجـمـل عـبـارة

صارت للمصري منارة

” مبارك شعبي مصر “

لكن فين البركة راحتْ ؟!؟

لـيه بقـينا شعـب شاحت ؟؟

عـيـشُــــه من كـل الأمـم

خارت خلاص كل الهمم

ماتت فينا الإنسانية ونكسنا خلاص العَلَم

ذهبت الأخلاق مع إللـي عاشـوا من زمـن

ولدغنا سم الصحاري لما زحفت ع الُمدن

اسـتوطن فينا التخـلـف والبـلادة والعَـفـن

فين ثقـــافـــة الـجـدود ؟؟؟

الحضارة والحياة والخلود

ليه غـباءنا مالـوش حدود

ليه نسينا ليه بقينا للفساد والدمار

ديناميت بارووووووووود

للتعصب والتحزب ولنار الفـتنة وقـود

الإرهــاب من عندنا

مَروي بمَّيــة جهلنا

متربي شارب حقدنا

إللي صار بعد التصَّحُر طبعنا

بعـد ما إتعـودنا نكـره غـيـرنا

بقـينا نكـره نـفـسنا

نكــح الـشـيطـان عـقـول البشر

حـمـلـتْ مبادئه صارت أشـَّـر

بـقـيـنا علي العالم خطر

أشـد من نووي إنشطَّـر

والـدم سـايـل م الأبـريـاء ،،، زي الـمـطـر

الحب والخير والجمال معاني فينا بتحتضر

كفَّرنا كل الإنسانية :حتي الفنون وإللي ابتدعها ياعالم كَـفَـرْ

للموسيقي قطعنا الوتر

وإللي باقي من جدودنا من أثر برضو إنكَسر

أبو الهول إللي ساكـت من سـنين فجأة شَخَــْر

والشخرة كانت قُنبلة ، هزت ضمير الإنسانية

إلا إللي بالدم رويان واتسَــكَــرْ

مناخيره وقعت من كتيرررررر

ريحــة العـفـونة ،، إللـي طالعــة مننا

من رذيلـة بنحتـضـنهـا ،، فـــي قـلبنا

من ثقافة موت بغيضة إحتلت أرضنا

وإللي أخطر من ده كله بجهلنا

بنعلي صـوتنا بنفتخر بخـزينا

وبنـفـتـكــر إننا بنـخـدم ربنا

!!!!!!!!!!!!!!!!!!!!!!!!!!!!!!!

وهو ده السر إللي مَخفـي

جـوَّه صندوق الأزاز ؟!؟

إللـي رايـح جـاي شايـفُـه

أي واحــد فـيـنا عـارفُــه

الأزاز شــفــاف وكاشفُـه

والاسم أهو سر وخلاص

**************

ميلاد ثابت إسكندر

فنان تشكيلي

شاهد أيضاً

فى الغربة حتتعلم ميفرقش معاك حاجة

بقلم محمد نبوى الميزة الوحيدة فى #الغربة .. بعد ما بتعيش سنين هناك ما بيفرقش …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *