جريدة الأهرام الجديد الكندية مقالات مشابهة
بقلم / ماجدة سيدهم
ومقطع منتشر لشابين مثلا بسخرية دور لرهبان وماتلاه من مقاطع أخرى بالاعتذار .. وعليه طالبت العديد من الأصوات بمحاكمتهما بتهمة الازدراء كما هو الحال بصبية بني مزار …
أولا.. هذا ليس الفيديو الأول.. فقد سبقه فيديو لبعض الشباب يسخر من القداس الكنسي باللغة القبطية ..
ثانيا والأهم ..كم هو محزن ومبكي جدا ما وصل إليه حال شبابنا حتى الضياع والتفاهة والتغييب ( والله حزنت ) اللي المفروض أنه شباب بيمثل المستقبل ..لكن للأسف هم نتاج القهر والفقر و غياب الفكر وضحالة الثقافة اللي بتمثل وتطابق مرحلة التوكتوك بالتمام
*قالوا في فيديو الاعتذار وهم في حالة من الخوف طبعا ..احنا كنا بنهزر وهما ( يقصدوا مين ب هما ) اللي لبسونا كدا كومبارس (كومبارس عن فيلم إيه يعني )
*وبعدين بيقولوا أنهم مش عارفين دا لبس إيه أصلا ولا اللي علقوه على صدرهم دا إيه (القصد هو الصليب ), ..ودي في حد ذاتها كارثة وطعنة في حق الدولة .. لأن المفترض لو إحنا في دولة مواطنة أننا بنقرب من بعض ومن ثقافة بعض لأن المفروض أننا عايشين على نفس الأرض مش أغراب ولا خصوم ..دا المفروض وزي ما المسيحي عارف يميز لبس الشيخ والمنتقبة والمحجبة والصوفي والسلفي .. مفترض كمان أن المسلم (خاصة الأجيال الجديدة ) يكون عارف لبس الكاهن والراهب والراهبة أو على الاقل يعرف علامة الصليب كرمز مسيحي مميز جدا..(يعني لما البعض يسب ..يلعن صليبك .. كدا بيكون الصليب معروف في السب بس … ماعلينا )
علموا الشباب وفهموهم انهم مش عايشين وحدهم في الكون ..فيه ديانات وثقافات وعادات مختلفة .. مش عيب صدقوني ولا جريمة ولا حرام .. دي الف باء ثقافة ووعي .( .الاعلام والدراما والتعليم )…زي مصر زمان لما كانت حلوة ..بيت واحد وطبلية واحدة .. لما كانت الناس بتشارك بعضها حتى في الأصوام والشيوخ والكهنة كانوا بيدخلوا بيوت بعض للتزاور ..بجد ألف خسارة
. المسافة لما بتبعد أوي بقصد وجهل يبقى مستنين شكل شباب االمستقبل يكون إيه
* وبعدين خلعوا الذقن والشارب في الفيديو كدليل أنهم كانوا بيمثلوا ..طيب ماهو معروف أنه تمثيل ..مش دي القضية ..القضية أخطر من كدا .. الشباب دا حاله يحزن .. ودول ملايبن كتيرة مقتولة ..قارنوهم كدا بأي شباب تاني في العالم المتحضر وأنا مش حاتكلم .. شوفوا بس الفرق في كل شيء من اول النضج والادراك حتى المظهر العام ..
ياسادة..مقاطع السخرية والاعتذار المحزنة دي فيها توجيه اتهام مباشر للدولة ..لما ملايين من الشباب مغيب بالتمام ..ومش عارف يمينه من شماله ..ولا الجد من للضحك.. ولا عارف هو عاوز ايه وعايش ليه.. وليه هو كدا في حين اللي في مثل عمره بالغرب مش كدا خالص …
ياسادة ..فين الشباب وفين دورهم من خططكم وقضياكم ومشاريعكم ومؤتمراتكم بدل ماتسيبوهم فريسة للضياع والجهل وكل واحد جاهل يلعب بعقلهم شوية ..اهتموا بيهم ..نموا قدراتهم ..وظفوا طاقاتهم ..كفاية مشاريع التوكتوك وثقافته.. ارحمونا ..
كنتم فين من أول فيديو ازدراء من سنة …كنتم فين من أول فتوى ازدراء من سنين واللي بتشتعل يوم بعد يوم وزرع الكراهية على كل المنابر .. كنتم فين والفجوة بتزيد بالعلقم ..وأنتم فين الآن من مجتمع منداس تحت نعال الخرافات والفوضى والخوف والفقر ..من الذي يجب أن يحاسب …المفروض أن فيدويهات الشباب دا تكون مؤشر خطير تنبته له كل أجهزة الدولة بالتوعية والاستثمار .. لأن الشباب أضخم رأس مال مضمون لبناء نهضة بجد ..لو عاوزين
نعم ..أنتم المتهم الأول في ضياع المستقبل …وأنتم من سمتحم لجهلاء للعبث بعقول الشباب وحشوها بكل ماهو سام وضد الحياة .. مش كفاية الفقر والقهر عليهم
اقبضوا على الدولة بتهمة ازدراء الشباب ..
