الإثنين , يوليو 6 2020
نورا فريد ميخائيل

نورا فريد تكتب : ثقافه مجتمع

مالكوا بيها بس البنيه…

يامجتمع ذكورى مليان بليه

فيكوا العبر والنقص والكبر

والآخر تقولوا عليها تعبان وحيه

دى ربنا خلقها زيها زي الولد

وأحيانا أحسن..دا ربنا إدهاله هديه

عمرها ما كانت ناقصه أو كماله عدد

شفناها قاضيه.. رئيسه ودبلوماسية

كتير بتكون عامود البيت والضهر والسند

تصرف علي بسلامته وتديله الماهيه

وسيادته مأنتخ تقولش قاعد ف التكيه

مالكوا بيها بس البنيه…

يامجتمع ذكورى مليان بليه

زمان كنتوا بتوئدوها حيه

وف البيت تخدم أخوها وآخرتها

تلبس قبقاب وطرحه وجلابيه

وف عصر التكنولوجيا ليه عايزين قهرتها

وتقولوا لبسها هو سبب كل رزيه

ماهو بسلامته من سفالته

مش راحمها حتي لو لابسه ومتغطيه

متقولوله يغض البصر ويرحم أم البشر

من عنيه ويكون فى قانون ف البلد ديه

مالكوا بيها بس البنيه….

يامجتمع ذكورى مليان بليه

غيروا شويه بقي من ثقافتكم البهيميه

وانظروا للمرأه نظره محترمه أدميه

يمكن ربنا يرضي عليكوا..و تطلعوا لقدام شويه

وتوصلوا زى الشعوب الي وصلت للعالميه

وتشوفوا الإنسان انسان لا هو راجل ولا بنيه

عمله بس اللي يميزه ويديه الاهميه

العالم كله بيخترع وينتج وينجز

واحنا دماغنا مركزه ف لبس وخلع البنيه

يامجتمع ذكورى مريض ومليان بليه

شاهد أيضاً

هل يحق لأردوغان تحويل آيا صوفيا إلي مسجد مرة اخري ؟!

هاني صبري- المحامي يُنظر مجلس الدولة التركي أعلي محكمة إدارية هناك في طلب منظمات عديدة …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *