الأحد , أبريل 24 2022
ماجدة سيدهم

الوجع بقا بالكوم .. وغياب الأحباب بقا كل يوم ..

الأخبار كلها مزعجة والعالم بقا يخوف ..مافيش حتة آمان نهرب ليها .. والغياب بقا أعمى وقاسي علينا أوي .. بياخد اللي في سكته من غير مخ ولا استئذان .. لا بيرحم ولا بيقدر ظروف ..ولا بيهمه كام واحد فينا هايبات مغموم.. وفي غمضة عين فجأة لقينا نفسنا كبار

كل الحكاية احنا النهاردة هنا .. وبعد امتى ..ما اعرفش .. هانكون هناك … هانسيب أماكن وشوية صور وذكريات يحكوها عننا ويقول علينا اللي كان ولما الحزن يكون أكبر من كل الكلام غصب عننا بنخاف .. بننسحب بعيد وننزوي .. وفينا حاجة من جوة بتنحني ونتمنى نعرف نبكي أو نحكي علشان نقدر نقف من غير غصة والشيلة على الظهر تقيلة لسة …فبلاش نشيلها والنفس فينا مكتوم ياااه .. أد إيه الغياب بيوجع .. أد إيه محتاجين لبعض ..نطبطب أوي على بعض.. نرحم بعض .. دا الضحك والهدوم ياما بيداري هموم

هانكمل حتى لو الضحكة ناقصة ..هانكمل باللي فضل مننا واللي اتبقى من حلمنا حتى لو هو فاضل يوم .. بس علشان خاطري بجد ..نطبطب على بعض بجد .. دا كوم الدموع اللي جوه مايقدر عليه غير لمسة أو كلمة طيبة بجد .. دي مجرد كلمة مش أكتر لأن مافيش عكاز نتسند عليه غير بعض .. يارب ادخل حياتنا أكتر لحتى نكون طيبين مع بعض ونقدر نكمل رغم الزمن الصعب صباح آخر أخضر رغم كل شيء ..

شاهد أيضاً

المسيح قهر الموت .. وبقيامته أعطانا الحياة والنصرة والخلود

هاني صبري قام المسيح من بين الأموات بجسده الذي وُلِدَ به وصُلِبَ ومات ولم تكن …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *