الجمعة , أبريل 22 2022
أخبار عاجلة
ايهاب صبرى

حوار افتراضى بين مواطن وقاضى .

بقلم : ايهاب صبرى
جلسا فى المسجد على مقربة من بعضهما من بعد المغرب فى انتظار اذان العشاء فتجاذبا أطراف الحديث .. وبدأ المواطن فى تعريف نفسه قائلا :
اسمى كادح وعايش فى البلد دى بقالى كتير كنت بحلم بالتغيير وعلشان كدة وقفت من كام سنة فى الطوابير والمرة دى لما اتأكدت ان مفيش فايدة رحت مقاطع الانتخابات .
ولما وقفت فى الطوابير يا كادح كنت بتحلم بايه ؟
حلمت ان ابن جارى يتعين فى النيابة اصل الواد شاطر وطول عمره بيطلع الأول .
وحلمت كمان مشفش اللى حصل لعم مغاورى بيحصل لحد تانى من شعب مصر الغلبان .
مين عم مغاورى ده يا كادح وايه اللى حصل له ؟
عم مغاورى ده راجل غلبان مات فى التاكس واحنا بنلف به على مستشفى نلاقى له فيها سرير وطبعا امكانياته ماتسمحش بمستشفى خاصة ده ساكن فى حتتى .
ها وحلمت بايه كمان يا كادح قول انا سامعك أهو
وحلمت كمان يابيه بان القصاص يكون هو المعيار فى البلد دى مش تسعيرة خمسة الاف جنيه لكل شهيد .
يا ابن الايه يا كادح ده انت بتقول كلام بسيط بس يتوزن بميزان الدهب .. قول .. قول وايه كمان ؟
اسمحلى انا اللى اسألك سؤال يا بيه
طبعا اتفضل بس ياريت يكون سؤال واحد لانى عايز انا اللى اسمعك
هما ليه الداخلية يقدروا يأمنوا لجان كتير ف كل المحافظات وبيرفضوا يأمنوا مباريات الكرة اللى هى سبب سعادتى أنا واللى زيى ؟
ولا اقولك يابيه بما انه سؤال واحد ممكن اغير السؤال
هو ليه سعر المتر فى البلد دى مجنون زى القوطة ؟
متر ايه يا كادح .. انت حتخرف ولا ايه ؟
أبدا يا بيه انا بسأل عن سعر متر الأرض اللى فى الساحل سعره بجنيه للناس المحترمين وللشقيانين سعر متر الارض علشان المدفن بيكون بالف جنيه ؟
ولا اقولك يابيه …. اخر كلام حسأل حضرتك
امتى يابيه نقعد قدام التليفزيون ونسمع كلام واقعى وحقيقى ومفيد ؟
بس قبل ما تجاوبنى ممكن اتعرف على حضرتك .
أنا المستشار سعيد رئيس محكمة .
وهنا يظهر التوتر على كادح ويتلعثم قائلا اوعى تصدق اى حاجة من اللى كنت بقوله يابيه انا كنت بهزى السبب الحقيقى لعدم نزولى الانتخابات انى بحب الريس جدا ومرضيتش انزل اى انتخابات بعد ما انتخبت سيادته وكمان مش عايز برلمان ييجى يضايقه او حد يعارضه وبعدين برلمان ليه يعنى ؟؟؟ دوره يعنى حيكون ايه ؟؟؟


انا واثق فى الريس وقراراته العبقرية وخططه المستقبلية وكمان الوزراء والمستشارين مفيش أحسن من كدة .
المستشار بنبرة حادة .. انت بتكذب يا كادح ولو مقلتش السبب الحقيقى اللى خلاك تقاطع انا ححبسك … قول ما تخافش بس قول الحقيقة .
اقول يا بيه ؟
قول ما تخافش
قال كادح وعيناه مختنقتان بالدموع ما لقيتش واحد مختلف عن كل اللى فاتوا وممكن يجيب حق كل الناس اللى ماتوا .
وهنا نطق الحق ورفع اذان العشاء .

شاهد أيضاً

صانع الخمر

هيا يا رفاق اسرعوا ..فشوارع المدينة مهيئة اليوم للزحام والتطلع للعبور الأعظم .. هلموا لنتابع …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *