الجمعة , مارس 29 2024
ماجدة سيدهم

لا..رجالة المحروسة مش برياله .. ثورة لاستعادة فخامة الرجولة للشارع

يا أهل المحروسة الرائعين ..فوقوا وكفاية عيشة عار وقلة قيمة .. لازم تعرفوا وتفهموا كويس أوي إن أقذر حرب وأخطر جريمة إنسانية وأخلاقية تعرضت لها المحروسة على مدار تاريخها هي إصابة رجالها في مقتل

لما فلح رواد الجهل في تحويل رجال المحروسة إلى مجرد فحول بريالة مطلوقة في الشواع ترازي في ستات المحروسة ما بين تحرش وتلصص وذبح بحجة إن دي من سمات التقوى المفرطة

يارجال المحروسة الفاخرين اعرفوا أنكم من البداية أنتم الهدف والقصد

خدعوكم واستغلوا الخوف والدين وضحكوا عليكوا لما شاورا علينا احنا الستات وأوهموكم إننا كتلة من المفاسد هدفها تشغلكم وتفسد صلاتكم وتحرمكوا من نكاح الجنة

علقوا لنا المشانق ودهنوا حياتنا بالاختزال أدام عنيكم احنا ستات المحروسة العظيمات

أمهاتكم وزوجاتكم وحبيباتكم .. شوفتونا بننتهك أدامكم كل يوم وبنتعرى كل يوم بالفتاوى المخزية والتحريمات

غير المنطقية ولبسونا السواد ووافقتوا وصفقتوا لهم كمان

والنية من الأول هي سرقتكم أنتم وتدمير رجولتكم أنتم واختزال فخامتكم أنتم وتشوية وسامتكم أنتم

وانتزاع شرفكم وتحقير نبلكم وتحضركم ووطنكم ومهارتكم أنتم واللي كان مشهود لكم بكل عظيم وتميز

وراقي وخلوكم مجرد ذكور بريالة ..أيوة بريالة ( اللي ريقه بيجري)

اتوصفتوا بكدا وعلنا وسكتم .. ماتزعلوش من الحقيقة لما يخلوا أعظم بطولاتكم انكم تجروا بلا أي مخ

ولا شرف تلاحقوا خصلة شعر ..شنطة حمرا ..شراب بيح ..تاتو ..بنطلون جينز .. دا كل ستات العالم غير محجبات و بشعورهم وماحدش ريل وراهم يعني .. جرالكم أيه يا شباب ورجال المحروسة العظام

إزاي قبلتوا على أنفسكم تبقوا خطر وفضيحة وفعل خادش للحياء ..إزاي قبلتوا على نفسكم الإهانة وتبقوا مزحة للعالم من بعد ما كانت ليكم الريادة

بصوا فتشوا جواكم بإنسانية شوية وشوفوا بقيتوا مين .. بقيتوا بريالة .. أنتم مدركين حجم المصيبة.؟!

أقول إيه يا ألف خسارة على الرجولة اللي خضعت وسكتت .. لأ دا مرفوض تماما ورجالتنا مش بريالة ..

وأنتم ياستات المحروسة العظيمات إزاي قبلتوا ولسه بتقبلوا المهانة والإهانة على نفسكم كل يوم وسمعتوا يتقال على أزواجكم وأولادكم وأخواتكم أنهم مجرد شوية متسكعين بريالة وسكتتم

هل دا العادي مثلا ولا موافقة ضمنية ..؟! . إزاي قادرين تعيشوا جوه بيوت فيها ذكور تافهة وفحول بريالة وشايفنكم أنتم الستات اللي طافحين الدم مجرد شوية ذكايب وقفف وناقصين ونجسين ومش محل ثقة ولا احترام ؟

دا عار في حقكم جدا .

طيب تحترموهم إزاي..؟ تتكلموا معاهم في إيه وإزاي ..تربوا ولادكم وبناتكم ازاي وبتعلموهم إيه ..؟

عرفتوا إننا كلنا كدابين وكلنا خايفين وبيوتنا كلها خربانة وأجيالنا كلها في الشوارع تايهة وضايعة

دا احنا كنا بنتحسد زمان على رجالتنا وشبابنا اللي كان يشرح القلب ..كنا بنسمعها بيتقال عليهم المصري هو الرجولة والجدعنة والدعم والوسامة وابن الأصول وابن البلد المتربي الشبعان واللي بيحمي بيته ويحترم مراته وأي ست .. دا كان بيناديكي بالست قبل ماتبقى الحجة ..

* مش آن الآون يا ناس المحروسة الطيبين نفوق كدا ونفكر شوية .. ونرفض مرة.. ونعتذر لنفسنا على عيشتنا المهينة ونصلح اللي عملناه في حق نفسنا .. طبعا نقدر دإحنا برضه المصريين العظمة اللي الإنسانية جوانا لسه مامتتش لسه بتنبض بالخروج من المأزق المهين

لن يأمن الشارع ولن يستقيم ويسعد ويضوي ويرتقي إلا بعودة فخامة وعظمة ونبل الرجولة للشارع المصري من تاني ..واللي حتما لن تزدهر إلا برفعة وذكاء حضرة الأنوثة ..

ثم تأتي نظافة كل شيء .. دي قضية كل مصري شريف ومدرك .. ست وراجل .. رجالتنا مش بريالة ..!

شاهد أيضاً

يتساءل الجهلاء : أليس المحجبات مثل الراهبات؟

إسماعيل حسني الراهبة إنسانة ميتة، صلوا عليها صلاة الميت يوم رهبنتها رمزاً لمغادرتها العالم المادي، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.