جريدة الأهرام الجديد الكندية 
مقالات مشابهة
حبة مطر
•••••••••
حبة مطر نزلت على خد الفقير
من سقف بوص مايل وبيغطى الحيطان
صَحت فى عز البرد طفل وكان بريء
كان نفسه يحلم بس نام بالليل جعان
والبرد كان م الناس أحن كتير عليه
كبر وشاخ فى الهم من قبل الأوان
بص بوداعه لأمه بالرعشه اللى فيه
ورجع يحاول جوه أحضانها ينام
وأبوه فى عز البرد راح بدموع عينيه
وبكل عزة نفسه خبط ع الجيران
مافتحش ليه غير بس جار كان ليه فقير
حاسس بألمه وقلبه كان مليان حنان
وكل يوم عن يوم دموع الناس تزيد
وياما ناس مساكين وبتدارى الحيطان
مين اللى يعطف أو يحن على الفقير
أو يقسم اللقمه اللى جتله مع الجعان
يستر من البرد اللى جاى جسده الضعيف
ويعيش بشكر تملى ع الخير مهما كان
حبة مطر نزلت على خد الفقير
من سقف بوص مايل وبيغطى الحيطان
كلمات وأشعار : مــارى تــــامر
