الأربعاء , أغسطس 17 2022

الشعب الحشري ٢ .

حمدى الجزار المحامى
حمدى الجزار المحامى

بقلم / حمدى الجزار
بصراحة وبعد ما اتفقنا اننا نكون حشريين ونتدخل في اللي ملناش فيه فضلت يومين بسكت في نفسي واقولها بلاش اسكت احسن يالساني ،،ولكن بقى مفيش فايدة قعدت اتفرج واقرأت تعليقات واسمع ردود على حكاية الوزير اياه بتاع تعيين ابن الزبال ولقيت الحكاية بتكبر وبتكبر كاننا اول مرة نسمعها او نعرفها وفجأة كده الكل قعد يحدف بالطوب على سيادة الوزير ويقولوا المجنون اهو زي العيال الصغيريين في القرية وياخسارة الراجل ملقاش حد يحوش عنه لحد ماجري واستخبى ورا الاستقالة اللي هيه البيت المهجور لكل اخطاء المسئولين الكبار ،،
والناس كانها في فرح العمده كل واحد جاي يضرب عياريين صوت في الهوا تحية لارضاء العمدة احسن يقولوا عليه مجاش وحيا العريس ابن العمدة ،،
الغريب بقى في الموضوع ان العمدة عنده عيال كتير لسه فرحها مجاش وبرضوا بيقولوا نفس الكلام ،، يعني ابن العمدة الظابط مش بيعين ابن الزبال ولا ابن البقال ولا ابن البوسطجي ولا ابن الشيال ولا حتى ابن الموظف ابو قلم الغلبان ولا ابن المدرس ابو كشكول الكحيان ،، ومش ابن العمدة ده وبس،، لا واخوه التاني بتاع الخارجية ده ،، ولا حتى اختهم البت الحلوة المذيعة دي كمان،،، ولا حتى اخوهم الصغير اللي بيشتغل في البنك ده هوه كمان مش بيعين حد عنده الا ابن شيخ الغفر ومحاسيبه ،، وياريت تيجي على كده وبس ده حتى مش بيعينوا ولا اولاد اخوه ولا اولاد اخته ولاابن عمه ولاخاله يعني كل اولاد الزباليين واشكالهم اللي قولنا عليهم ملهمشي مكان عند العمدة .
والناس عارفة كده كويس وحافظة الدرس بس اهو جت فيك باوزير المظاليم ماهو بصراحة انت غلطان جاي كده علني وتقول في ميكرفون الفرح وتلم عليك الناس اهي جت فيك انت والكل عامل فيها من هناك .
بس عايز اقول للعمدة وولاده متحبكوهاش اوي كده ده كل الرؤساء اللي فاتوا وعدوا علينا ييحي من ستيبن سنه كده ،، كانوا ولاد الناس البسيطة دول واحد كان ابوه بوسطجي وبقى زعيم أد الدنيا ،، والتعلب الكبير اللي وقفتله الناس وتحييه لانتصاراته كان ابن راحل غلبان ،،، واللي حكمنا ٣٠ سنة واتحكم فينا كلنا حتى في العمدة واولاده كان ابن راجل بردو بسيط ،، علشان كده وحياة ابوكم كفاياكم بقى علشان انتم مسختوها اوي وعرتونا وسط الخلق .
ويارب بقى ياولاد العمدة تاخدوا درس من اخوكم الكبير ياعيني اهو كان جاي علشان العدل ،، الناس هيه اللي حكمت بالعدل .،، فخلوا بالكم بقى احسن اللي جاي اصعب والناس المرة الجاية مش هتحدف بس بالطوب وتيجي تضرب عياريين في الهوا،، وعامةربنا يستر احنا قولنالكم النصيحة وخلاص
وبعدين قبل مامشي عايز افكركم ان حتى اللي بيعين ابوكم العمدة مبيعجبوش الحال المايل وعلى طول هيجريكم تستخبوا في بيت الاستقالة المهجور .

شاهد أيضاً

عزاؤنا واحد ..كنيسة أبو سيفين والمحبة بين الأخوين

اعتصرني الألم وتناوبني الوجع لحريق كنيسة أبو سيفين وليس انا بل كل نفس سوية وكل …