الإثنين , يونيو 8 2020
رشا خالد

كيف تجتازين شهر اغسطس.

رشا خالد
رشا خالد

كتبت رشا خالد
قبل أى حاجة لازم تعرفى أنك بتعملى كده علشان ولادك قبل اى حد لأن لو بعد الشر جرالك حاجة جوزك حيطنشهم .. كل شويه قولى لنفسك أنا بضحى و أوعى حد يضحك عليكى و يأنب لك ضميرك..
1- التونه و الجبنه بيضا و العنب او البطيخ .. دول حاجات اخترعوها مخصوص لأغسطس تعمليهم بالتبادل لحد يوم الجمعه تجيبى سمك مشوى و ربنا يقدرك على الرز .
2 – ممنوع منعا باتا تشغيل الفرن لأى سبب كان .. مفيش مكرونه بشاميل و لاصينيه فراخ و لا حتى كيكه أوعى أوعى أوعى حتدخلى فى غيبوبه جوة لو جوزك صمم دخليه المطبخ 3 ثوانى و هو نفسه حيبطل يطلب ميه حتى .. المطبخ ده مثلث برمودا اوعى تدخليه الداخل مفقود و الخارج مولود لو دخلتى اخرك التلاجه البوتجاز فيه سم قاتل اوعى البوتجاز انا حذرتك .
3 – مفيش تنشير بالنهار أغسلى بالنهار و نشرى بالليل فى الطراوة لسببين أن ممكن بالنهار الشمس تسيحلك دراع يرضيكى تبقى بدراع واحد ؟ و السبب التانى أن احتمال كبير الغسيل ينشف فى الغساله لوحدة من كتر الحر انتى بس ابقى افتحى باب الغساله و طبقى على طول
4 – مفيش حاجه اسمها خروج ده نفس الناس لوحده يجيبلك تشقق فى الجلد .. العيل اللى يقولك عاوز اتفسح اقتليه
5- بحر ايه و بسين ايه اللى مليانين زحمه كلور و ساعات بيعملوا فيهم بى بى كمان .. البانيو مش للحما بذمتك بتستحمى فيه كام مره ؟؟ استعمليه حللى الفلوس اللى ادفعت فيه لبسى العيال المايوهات و اديهم الجرادل و سيبيهم يهيصوا و ابقى امسحى الحمام فى الاخر طلعيهم لما يوصلوا لمرحله القراصيا و تلاقيهم كرمشوا
6 – ممنوع العزومات منعا باتا الا لو الناس اللى جيالك حتجيب اكلها و اكلك معاها و معندهومش مانع يقعدوا لوحدهم علشان مفييش تكييف غير فى اوضه النوم و انتى معندكيش استعداد يدخلوا .. الاوضه صغيره مش هتستحمل
7 – السرير سريرك و الاوضه اوضتك جوزك جايب السفره أوعى تنسى المعلومه دى .. مفيش حاجة اسمها وطى التكييف مش عاجبه يقدر يروح السفره علشان يتسلق في الحر
8 – فرش الشقه تتخذى فيه سياسه البلبصه .. شيلى السجاد شيلى النزلات بتاعه الستاير شيلى المفارش خلى الهوا يخبط فى اى حاجه بلاش الحاجات اللى بتدفى دى لو قدرتى تبيعى العفش و تقعدى على البلاط يكون احسن
9 – مش عيب ان العيال تقعد طول النهار بالمايوة الجو حررررررررررررررررر اتقى الله . و متنسيش تحلقى زلابطه الشعر بيحرر
10- اخر حاجه الجو حر ضغطك بيوطى عاوزه حاجه حادقه بس بعدها نفسك فى حلو و بعدها نفسك موعت فتديها حاجه حادقه و تدوخى تاكلى حاجه حلوة .. انسى الرجيم و الهبل ده دلوقت ايس كريمك فى ايدك عصيرك فى حضنك اللى يقولك تخنتى اقعدى عليه اعمليه خداديه و اخلصى .. حتى عدد الناس يقل يمكن الهوا يزيد

شاهد أيضاً

د. عاطف المصري

بدون تطبيل

سبق وعلمنا أن القياده السياسيه رصدت مبلغ مائة مليار جنيها لأزمة كورونا و ظلت تنادي …