السبت , يونيو 6 2020
حمدى الجزار المحامى

الشعب الحشري ( ٥ )

حمدى الجزار المحامى
حمدى الجزار المحامى

بقلم : حمدى الجزار
دعوا الخلق للخالق في لحظة كده حبيت اعلق على بعض التصرفات الاخلاقية المستحدثة في مجتمعنا وقولت مع نفسي اكتب مقال صغير كده وبعدين قولت اكتبه باسلوب سلسلة مقالات الشعب الحشري احسن لان الكلام اللي هقولة لازم كل واحد يفهمه كده ببساطة ،، قال ايه بقى السنة دي مات كده ييجي سبعة او ثمانية فنانين قولنا اعمارهم ومحدش هيموت ناقص عمر همة الفنانين ايه يعني اهم ينتموا لفصيل البشر والخلق وليهم عمر محدود عند المولى عز وجل ،،كل ده عادي بس اللي مش عادي بقى اننا نسمع بقى شوية فتاوي من شوية قليلة من الشعب الحشري قال ايه معرفشي مين مات ده ربنا هيدخله جهنم حدف واسمها ايه برضوا اللي ماتت هتكون عبره لغيرها من الفنانات علشان يعرفوا ان النار منتظراهم همه وامثالهم ،وان فلان ده انشاء الله ربنا هيرحمه ليه هوه كان عمل ايه غير البوس والاحضان وايشي ايه وابصر ايه في افلامه أو افلامها وليعودذوا بالله ،،وان كل حاجة اخوانا البعدا المفتيين اللي على الفيس بوك والبتاع التاني ده تويتر بقوا خلاص من رجال الفتوى ،، يا اخي انتوا وهوه جاتكوا ستين داهية تاخدكوا وتاخد اشكالكم العكرة سيبتوا كل حاجة وبقيتوا تدخلوا الجنة والنار بمزاجكم بقيتوا حتى عارفين واعوذ بالله اللي ربنا هيعملوا في الاخرة ان هيدخل ده النار ودي اسفل السافلين وان ده هيدخل الجنة ،، نهاركم اسود زي وشوشكم وبتقولوا كده وجاتلكم الجرأة تتكلموا عن الجنة والنار كده بسهولة وبتعتبوا على الفنانين انهم عملوا شوية مشاهد فيه شوية قلة حيا ،، بس يابن الفالحة انت وهوه وهيه الفنانين مقدروش ييجوا ويتكلموا في الاخرة والعذاب والثواب والعقاب ،،وبعدين نسيتوا ان ربنا غفور ورحيم ولو جاء ابن ادم ملئ البحر خطايا من غير شرك وكفر تاب الله عليه ،،ونسيتوا ان علاقة العبد وربه لايعلمها الا ربه ،،ياناس ياهوووووووووا كفاية بقى تدخل فيما لايعنينا وده مش اي تدخل دي علاقة الرحمن الرحيم بعبادة ملكوش دعوة ياشوية حشريين واذكروا محاسن مواتكم ، وبعدين نطلع بقى بشوية كلام فاضي تاني وقلة أدب واسلوب مستفز ونحشر نفسنا في علاقة ممثل بيجوز على سنة الله ورسولة امام الناس كلها يعني الراجل داخل البيت من بابه وفي الحلال اهو ،،بس نقول ايه بقى نسيبه في حاله لا إزاي لازم نحشر مناخيرنا حتى في الحلال كمان ونطلع فيه العيوب المستخبية قال ايه دي العروسة من عمر بنته واصله كبير عليها واصل مش عارف ايه ولا ايه ونكدتوا على الراجل في ليلة حلوة بالنسبالهم وكلام وشتيمه واسلوب قذر نكتبه على صفحات النت والنتوت وصور مش عارف عاملة ازاي ،،، ونسيت ياخويا انت وهوه وهيه البلاوي اللي كانوا عاملين فيها انهم رجال الدين الوحيدين اللي في البلد ان اغلبهم وخاصة كبار السن كانوا متجوزين من بنات في عمر احفادهم مش بناتهم وكانوا بيقولوا ده جواز على سنة الله ورسولة اسوة بحبينا محمد والصحابة والتابعين ولا ده كان حلو ليهم علشان بدقون وعيب للراجل علشان فنان ، ايه اللي جرى يامصريين مكنتشي دي اخلاقنا ولاطباعناولا اسلوبنا ،، جري ايه ياشعب ياحشري صحيح احنا حشريين بس الكلام ده مينفعشي يتقال ولاينعاد لانه كلام في الدين والاخلاق ،، جرالنا ايه ياولاد مالنا كده نسينا كل الحلو والزمن الحلو وبقينا ناكل في بعض وناكل لحم اخواتنا ميتا ومستحليين كمان لحمه ،، جرالنا ايه بقينا نحشر نفسنا في اللي ملناش فيه ،، ياخوانا حرام عليكم ،،، ودعوا الخلق للخالق

شاهد أيضاً

د. عاطف المصري

الأهميه والأولويه

قد نري في كثير من الأحيان ان لم يكن دائما أشخاص لاقيمه لهم بجميع المقاييس …