الثلاثاء , أكتوبر 26 2021
ناصر النوبى مؤسس جميزه

للكبار فقط .. ناصر النوبى

ناصر النوبى مؤسس جميزه
                ناصر النوبى

عندى
قصيدة بتقولى اكتبنى
وبقولها لو انت قصيدة حلوة
ومتفائلة ورمانسية حكتبك
ولو انت قصيدة حزينة وفيها سياسة مش حكتبك
..اكتبها ولا مااكتبهاش
ولا استنى عليها شوية
ولا اقعد عليها زى الفراخ
ادفيها لغاية ما تفقص لوحديها
شكلى بدأت فيها ومش واخد بالى
زى قصص الحب اللى راحت
وخلصت وانا مش واخد بالى
حبيت وانا ومش واخد بالى
وعرفت المعنى فى لون لياليك
عرفاك عشقاك ليا انا بس انا
حبيت وانا مش واخد بالى
ونسيت وانا وموش واخدة بالى
ده مهما داريت او خبيت
بحبك ياغالى وياحنانى وياحنين
خلصت القصيدة
وبفكر اكتب توقيعى عليها وانشرها والناس الحلوة تعمل لايك او تعليقا
وانا اشكرهم وابعت لهم ورد ومزازيك وناس كمان تقول الله يافنان وناس تانية مش هاين
عليها تقرا شعر او تعمل لايك وكأن الشعر بيكشف الارواح وناس كتير بتخاف تواجه نفسها
وناس كتير بطلت تحلم وهات ياهرى وهات ياسياسة والانتخابات واللى راحوا واللى ما
راحوش ونتيجة الانتخابات واخبار الجرايد واللى حصل النهاردة وللصبح عمالين نكتب
ونتكلم وننفوخ فى قربة مخرومة واحنا اللى شايلين القربة
م انا قولت لك بلاش ياشاعر تكتب شعر فى السياسة و عدالة او حرية او طعمية
لان فى واحد ح يطلع يعلق ويقول ياعم انت بتحلم وواحد تانى يقولك ولا ٥٠٠ سنة مفيش
فايدة ولا فى حاجة حتتغير حتعمل ايه لو بطلت تحلم وتغنى
وتعمل زى كل الناس اللى بتنام وحاطة بطيخة صيفى فى بطنها
وملهاش دعوة باللى بيحصل !!
ولا اقولك حاجة صاحبك اللى بيكفر بالتفاؤل والتشاؤم
وعمال يصرخ ويقول انها حتغرق وهو قاعد فى بانيو خمس نجوم
المهم ان النار متحرقش مؤخرته لانه راح لبلاد الواق الواق؛!
والتانى اللى بطل يتكلم معاك خالص وبس يشوفك يدفع الايجار القديم
ويجرى بسرعة الفهد ويتحدث معك خمس دقايق فى الشهر!!
وصاحبك اللى من ساعة ما راح الى بلاد الرمال
كل كلمه يقولها قال الله وقال الرسول والفن حرام .
وان الله ارسل اليه رسل الحق لهداية البشر الكافرين
وهو اول واحد يكفر بالصداقة والعشرة !!
والست اللى طالع لها شنبات اللى مطلعه دينك
لانك لم تعجب بها او تؤانس وحدتها او تبخرلها مكتبها بعيدان العود والعنبر
وتجلس تحت مكتبها مثل فلاح كفر الهنادوه
وتعجن لها عجين الفلاحة شفعات فى فيلم شباب امراة!!
وتقولك انت بتتحدانى !!
ولا سواق التاكس المكتئب اللى لما بيقولك ادخل شمال قولت لوه ادخل شمال راح مضايق
منك وهات ياعتاب من ورا نضارته السوداء
وهات با توبيخ ازاى وازاى تقوله ادخل شمال وتقوله انا متأسف ياعم؛؛!
ويقولك يعنى لو مسألتكش ندخل شمال كنت حتعمل ايه؟!
قولت ليه كنا حنتسوح والبركة فيك وف عبقريتك ياباشمهندس!!
ويقولك اما مش باشمهندس انا باشا وهات يا انفعال..
والتانى يقولك انهم طلعوه من الجيش علشان كان احسن غطاس فى مصر
وانه بعد المناورات مابين مصر وامريكا قال للقادة انتم بتعملوا ليه مناورات مع الامريكان؟!
فردوا عليه انها اوامر عسكرية فراح قلع لهم البدلة وطلع من الجيش وساب الجمل بما حمل
والتانى ول امبارح فى الزمالك قالى انه اغنى واحد فى مصر وان ساويرس اخد ارضه منو
وبنى عليها فندق فيرمونت وتقوله معقولة الكلام ده؟؛
والمشوار يخلص وتدفع عشرة جنية وتجرى من التاكسى !
وترجع لقصيدتك تانى والغزل والرومانسية
وعم انور راجل عاجوز وطيب قاعد امام اتيليه القاهرة وتدخل مستشفى المبدعين وتلاقى
عمرو قافل البوفية علشان ابوه توفى رحمة الله عليه والراجل العفش اللى اسمه احمد يقولك
ممنوع ان الشاى بتاع سيد يدخل الاتيلية فتروح تقعد عند سيد وتبدا كلاب الجراج فى النباح!!
ناصر النوبى

شاهد أيضاً

المنسحبون من مشاهدة فيلم ريش اساءوا لأنفسهم وشككوا فى قدرات حكام مهرجان” كان “

أشرف حلمى أثار انسحاب عدد من الفنانين قاعة عرض الفيلم المصري “ريش” في مهرجان الجونة …