الجمعة , مارس 29 2024
عبدالرحمن السموري

(كإنه ماكانش)

اهداء الي كل اللي مش نايم
علي سريره لا قاعد حتي ولا قايم
علشان فجأة بقا فاهم
فحورات الحياة والكون
بيسرح جوه نور تليفون
علشان ينسي وماهوش ناسي
عايش وروحه بتقاسي
وده أساسي
لانه كان فيوم مجبور
يصارحك ويقول كلام منثور
خايف تبني بينكم سُوَر
قبلك ياما عاش فالدور
راجل صاين قلبه يوم للنور
وليه خلتيه مكسور ؟؟!!!
علشان جاتله الجرأة ماخفش
وقالك انه حبك قفش
لكن أيد واحدة متصقفش
كلامه معاكي كإنه ماكانش
كإنه هزار وحبة آلش
كان بيكلمك فالزيطه
اخدتي كلامه وعلقتيه فنص الحيطه
وبروزتيه بكام برواز
برقه جوه قلب ازاز
عشان تتباهي نفسك بيه
كان ببراءة مادد ايده
لوحدة ماليه كل عنيه
وجيتي فعلا انتي عليه !!
فيوم قابله راجل ذوق
وقاله اهدي يابني وفوق
كتبنا زمان كتير اشعار
وحزن كان فليل ونهار
موصّلناش فيوم لقرار
الصمت ساعات بيداري كلام
مبنعرفش ازاي يتقال
مستحيل يكون اوهام
اتقال فوصفه مية موال
وانت يابني عينيك فضحاك
اليأس عشش جوه صباك
هي يابني اكيد آلماك
سابت حزن اخدته معاك
كل ده عشان نسّياك !!!
انسي وراجع من جواك
لرب عالم كان وياك
وارمي حزنك كله وراك
كإنه ما كانش
كلمات:د/عبدالرحمن السموري

شاهد أيضاً

ليلة أخرى مع الضفادع

في ضوء احداث فيلم الوصايا العشر بشأن خروج بني اسرائيل من مصر التى تتعلق بالضربات …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.