ماجدة سيدهم تكتب : بدون نشر صور..
30 أغسطس، 2017 مقالات واراء
يعني لما أغلب الناس تهجم على شواطي شرم والغردقة وتروح الستات تنزل البحر بملابس محتشمة فاضحة فاضحة من فوق لتحت ..مابين عفريت البوركيني على كوم جلاليب مهزلة وميت قميص نوم فوق بعض والبناطيل الجبنز والكارينا الهباب …
ولما الرجال ينتشروا بعرض البحر والشاطئ بالملابس الداخلية باعتبارها مايوه أو ستر للعورة…. وبعدين تنتشر الصور الفضيحة على الملأ يراها القاصي والداني بطقم بفتة ملزق شارح تضاريس الجتة الحريمي واعجازات الفحولة ..تلوث بصري رفيع المستوى .. حقيقي مسخرة السنين ..
..ولما حضرتك تطلع علينا وبسحنتك دي وتزن ف ودانّا ليل نهار إن المايوه حرام وإن والبحر بيتحرش بالنسوان …في الوقت اللي دماغك كلها مايوهات قطعة وقطعتين وكل شواطء العراه كمان .. يبقى إنت والإعلام والمؤسسات اللي بتدعمك وتؤيدك وتروج لافكارك المهلبية تستحقوا تتوصفوا بإيه ..؟
. طيب لما العيشة حرام كدا ليه ساكتين على سكة المصايف وخليتوا الناس تعيش الكبائر وتفك عن نفسها بيومين سلف من طول سنة طحن.. صحيح السياحة الداخلية بتنقذ مايمكن انقاذه ..لكن الفنادق والقرى نفسها لطمت لما الخدود ورمت ..
دا غير الهجوم الوحشي على الأوبن بوفيه ..حانتكلم فيه بعدين …
طبعا من حق الناس إنها تصيف وتروح تتمتع بكل شبر في بلدها …دا حقهم ..بس ياحج بدل ما أحرم عيشتهم واحولهم باسم الدين لفضيحة مبلولة .. اعلمهم إن للبحر آدابه وإن المايوه هو لبس البحر الأجمل والأرقى والأكثر صونا للجسد وللنظر ايضا ..افهمهم إن الجسد مقدس مش عورة ومش محل طمع من أي عين على الاطلاق واعلم كل اخر ان اي واحدة على البحر بمايوه هي انسانة من حقها تسعد باجازتها .وإن أبسط حقوق الناس أنها تتنزه وتخرج تستمتع بالكورنيش والجناين والشواطء من غير تطقل من حد ولا فتوى خايبة من جاهل .. سلوك الناس ياحج هو تحايل على القمع اللي فرضه القهر والفقر وفتاوى التحريم …..
حاتقولي مش احنا اللي صورناهم ..صح ..لأن تصوريهم هو كمان تطفل وجريمة لكن للأسف الصور لها مدلول على حجم البؤس والبهدلة اللى تمثل انحدار السياحة وانحدار السلوك في مصربسبب عدم المعرفة والخوف ..بجد عيب ..الناس مش مادة للسخرية ..
أقسم بالله اللي عملتوه في حق السياحة وحق الناس البسيطة دي من تشويه وخلل أخطر من أي تفجير ارهابي .. انتو الإرهاب بعينه ..
..إنتو مش ضربتوا الجمال والسياحة بس .. انتو عريتوا شعب ..عريتوا مصريين وضحكتوا الغير عليهم ..لعنة الله على كل جاهل كان سببا في ترويع وتخلف وتغييب البسطاء حرمتوا عليهم أبسط حقوقهم في الحياة ..إنه يصيف مع أسرته ..بات الآن واجب محاكمتكم بتهمة ازدراء الإنسان وخيانة الطبيعة ..
..ياأهل الفهم والنور والجمال لا تكلوا أن ترفعوا التراب عن وجه مصر الجميل ..قوموا المنحنين بالخوف ..ادعموا البسطاء بالفهم والثقة ..اخبروهم أن الحياة حق و الجمال ثروة والحرية فطرة أزلية ..وأن الطبيعة الإنسانية تغلب مهما اشتدت قضبان التحريم
علموهم ولاتسخروا منهم ..فهم نتيجتكم القبيحة
جريدة الأهرام الجديد الكندية 
