مصرى الهوى أنا …. والصبغة قبطية
وجذورى متشعبة ..فى الأرض عمقية
وجلدى من طميك … ودموعي نيلية
ولا كنت يوم عربى .. ولا جينة تركية
فى كل شبر فيكى …. يامصر دم سال
ودفعنا كتير وكتير فى إسم قبطى مال
وفى أى لحظة كان . قتيلنا ملوش دية
يامصر يا .. ياأمنا ..خطفوكى عنوة مننا
قسّوكى علينا كلنا مع إننا
غمسنا دمائنا بترابك
مزجنا عرقنا بشرابك
وصبرنا فى ضيقنا وذلنا
مصرى الهوى أنا … وضلوعى من طينك
وعجينتى من نيلك وجريت فى شرايينك
ولا زالت مفرداتك تجرى على لسانى
بيسمعها الجميع .. القاصى والدانى
ألحان فراعينك اللى .. هزت معابدهم
فى صلاتى باتلوها .. وبتشنف ودانى
وف تصنيف المواطنة .. ترتيبى كان تانى
مواطن تانى أنا ليه ؟؟؟؟؟؟؟؟؟
وأخذوا مكانى أنا ليه ؟؟؟
حطونا ف دماغهم .. ولا احنا ف دماغنا
جعلونا أوجاعهم .. ونسيوا أوجاعنا
قدام عنينا قالوها .. وخرقت اسماعنا
مش عاجبك إمشى إرحل .. يالله ابتعد عنّا
أى مهاجر فى أرضك .. يامصر لازم يحبك
ويكون ولاؤه ليكى .. .. مش يتفشخر بسبك
وف أول مقلب زبالة … يجري بيكى يكبك
محدِش يزايد عليّ .. فى حبى أنا ليكى
ويعمل حامى حماكى .. ويدمر مبانيكى
لأن حبه ليكى .. مش برضه زيينا
مصرى الهوى أنا … والصبغة قبطية
وجذورى متشعبة فى الأرض عمقية
ولا كنت يوم عربى ولا جينة تركية
……. رفعت رشدى …….
جريدة الأهرام الجديد الكندية 
