الجمعة , مارس 29 2024

ماجدة سيدهم تكتب : هو إحنا ليه بنكره بعض …مش طايقين بعض ..

للاسف كلنا بقينا نعاني جدا من سوء معاملتنا لبعض و من بذاءة أخلاقنا ..بقينا نشتكي بمرارة من بعض ..أيوه بكل وضوح احنا بنكره بعض ..بنتربص لبعض

دا غير سمعة وعلاقة اغلب المصريين ببعضهم بالخارج (حدث بلاحرج ) واغلبنا اتعامل مع جاليات مختلفة بالخارج للاسف لكن مابنسمعش غير أن المصريين بس هم اللي بياكلوا ف بعض

إحنا مش بنكبر بنلاقي نفسنا كدا .دا مشوار طويل من التربية والثقافة المدمرة لأي انسان واللي بتبتدي من جوه البيت واحنا لسه صغيريبن ..ف نلاقي التمييز بين الأخوات..المقارنة المستمرة مع الأصحاب..كسر المجاديف ومعاير ة طول الوقت..دا غير التربية المعدومة في المدارس وغياب الوعي

مثلا بنتربى على ( شوف اخوك أو ابن عمك أحسن منك ..شوف صاحبك متفوق عليك .. حظه حلو .. شوفي فلانه ارفع منك اشطر منك ..صاحبتك الجربانة اتخطبت قبلك .. شوف فلان اللي ماكنش لاقي ياكل جاب عربية ..اتجوز جوازة هنا.. ماتبقاش اهبل ومايل وتساعد غيرك .. صاحبك دا بيستغلك .. البت الناصحة ماتطلعش من الحامعة الا وعريس في إيدها . . خليك ناصح وأعمل زيه ..اتغدى بيه قبل مايتعشى بيك . ..حظ العفنة بالحفنة ..أهل ابوك مش بيحبوك .. الجوازة الهنا هي اللي من غير اخوات ولاحماة ..لو جوزك حاتطلع عينه اياكي تفرطي في دهبك ..

اللقمة الحلوة ليكي والمرة لجوزك ..صاحبتك بتغير منك وبتلف على خطيبك ..ماتعرفيش حد بتشتري حاجتك منين ..اوعى تصدق صاحبك لانه مش حايتمنى لك الخير ..اديله بالجزمة ..افضحيها ..خسارة فيهم صباح الخير ..امسك عليهم غلطات تقدر تكسرهم بيها ..ماتدلوش وش واوعى تسامحه لو اعتذر ميت مرة …تشوف فيه يوم ….يكفيك شر جار له عنين ..شك في صوابع ايدك ..إن جالك الطوفان ..اوعى تبل ريق حد ..ماحدش بيحبك غير امك وابوك ..امك مش عاوزاكي ..ابوك مش عاوزك و…..تلال من السلبيات اللي تهزم وتهد جبال

تفتكروا لما نتربى بالشكل المضلل دا ..لما نكبر حايكون تفكيرنا وسلوكنا شكله إيه .

طبعا حايخرج من جوانا مخزون السنين المرة كله ..وطبعا دا ورث ولادنا كمان ..

..هو دا رصيدنا الحقيقي واللي بنشوفه كل يوم وكأنه سلوك عادي ..

طبيعي لازم نكره وننتقم ونتمنى الشر لأي حد ممكن ينافسنا او بيشاور على ضعف قديم جوانا .. ومش قادرين نفهم إن مافيش حد يقدر يعيش وحده ..وان شعارات الانتماء هي مش للمباني لكن لأبناء الوطن الواحد ..

للأسف تلقائيا بنلاقي نفسنا بنتفنن في تفاصيل الخوزقة حتى مع الناس اللي معاهم عشرة وعيش وملح ..ايوة دي خيانة ..

تفتكروا فيه كره وخبث وفشل اكتر من كدا ..دا احنا بقينا نخاف نضحك في وش بعض ..وصراعنا دايما بيكون باللي نملكه أكتر من التاني وبس ..

البذرة الخربانة ثمارها مرة واحنا بس اللي بنشرب ونعاني ونغضب ونقرف ونبعد من بعض ..

افتكرت السوريبن في مصر واللي دعموا بعض وخافوا على بعض ..وازاي بقوا قوة لها تأثير ووجود فرض نفسه باحترام ..


.للأسف تراث الكراهية معزز باغتيال الفكر والتحرر والتنوير ..


” ثورة فكر ”

شاهد أيضاً

الأقصر

مدفع رمضان بالأقصر.. ومرارة فقد هويتنا

كتب الاستاذ الطاهر على الحجاجى كان المدفع الذى أمامنا بالصورة من أقدم المدافع ويرجع تاريخه …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.