السبت , يوليو 13 2024
الكنيسة القبطية
محفوظ مكسيموس

الانتحار

محفوظ مكسيموس

نتكلم بالعامية شوية و نركز مع بعض و ياريت نهتم كلنا.

موضوع الانتحار مش جديد أبدا و لو قريت تاريخ و حتي القصص والروايات الأدبية القديمة

هتكتشف أن الإنتحار موجود من زمان بس بدأنا نسمع عنه كتير دلوقتي بسبب السوشيال

ميديا والتصوير و الإعلام.

حسب إحصائيات منظمة الصحة العالمية في ٢٠١٦ عدد المنتحرين سنويا ٨٠٠ الف

أو انتحار فرد كل ٤٠ ثانية و دي طبعا أرقام غير دقيقة أبدا ولا تعبر إلا عن

الحالات المسجلة ولكن هناك أعداد كبيرة من المنتحرين لا يتم تسجيلها كانتحار

وخاصة في دول الشرق الأوسط لأن الناس بتعتبر الانتحار ( عار ) و ( حرام )

وعلشان كدة ناس كتير مابتعترفش بانتحار أقاربهم.

المشكلة كمان مش في عدد المنتحرين اللي هو فرد كل ٤٠ ثانية. لا المشكلة الأكبر أن ٢٠

فرد كل ٤٠ ثانية بيحاولوا الإنتحار ومش بينجحوا ولو حسبت الإحصائيات دي

هتخاف فعلا لأن ده معناه أن لو نجحوا هيبقي في حدود ١٩ مليون فرد بينتحر سنويا.

أكتر نسب انتحار في العالم طبقا لمنظمة الصحة العالمية في الدول الفقيرة وللأسف مصر

تصدرت قائمة الدول المتحدثة بالعربية في ٢٠١٦ بمعدل ٣٧٩٩ رجل و ٧٠٤ سيدة أو فتاة.

طيب إيه أسباب الإنتحار و العوامل اللي بتزيد الإحصائيات:


١- الإضطراب النفسي والإكتئاب

لازم الناس تركز شوية وتحاول تتعلم وتقرأ عن الإضطراب وبلاش تستهتروا

لما تلاقوا حد مكتئب ولو حد ذكر قدامك أي أفكار انتحارية لازم تساعده

ولم معرفتش بلغ كل اللي حواليه وفهمهم خطورة الوضع.

٢- لو فيه تاريخ إنتحاري في العيلة

( حد انتحر قبل كدة ) دا كمان سبب مقلق جدا ( Trigger )

ياريت الناس تاخد بالها جدا من ده و لو ظهر حد تاني مكتئب لازم تساندوه جدا نفسيا وجسديا و روحيا.

٣- الفشل بكل أنواعه :

مش كل الناس بتستحمل الفشل سواء فشل دراسي أو إجتماعي

( زواج، طلاق وإنفصال ) أو فشل عملي سواء وظيفة أو بيزنس أو حتي فشل

عاطفي قصة حب.

كل أنواع الفشل دي ممكن تبقي دوافع واسباب للإنتحار.

الدعم الأسري مهم جدا جدا ودور الأصدقاء كمان مهم وبلاش تتجاهلوا

دور الطبيب النفسي والمعالج السريري لأنهم مهمين جدا ومش عار زي ما أنتم فاكرين.

٤- عدم الثبات الوجداني و في الحالة دي لازم طبيب معالج مع متخصص

جلسات سماعية مع رعاية أسرية ودعم إجتماعي.

٥- نشر رسائل المنتحرين قبل عملية الإنتحار من الأسباب الحقيقية التي تنشر

فكرة الانتحار وترويجها يساعد كثيرين علي الإنتحار

( خدوا بالكم و بلاش تنشروا الرسايل أرجوكم )

الانتحار بيبدأ بالتفكير فيه كفكرة ثم التخطيط و بعد كدة التنفيذ ياريت كلنا نعرف نساعد

بعض ونسمع بعض و بلاش نستخف بمشاعر بعض و نحس ببعض ولما تشوف حد تعبان

أو مهموم أو منطوي أو عنده أفكار سلبية لازم تهتم و تحاول إنك تخليك جنبه وتدعمه

وتنبه كل حد حواليه وصدقني الدور الاجتماعي والدعم النفسي

من أقوي عوامل الحماية فبلاش تستهتروا بالخوف والحزن والفشل و صغر النفس

لأن اللي بيموتوا منتحرين أكتر من ضحايا الحروب و السرطان.

الحب والإهتمام و التشجيع والدعم والصداقة والوعي كلها عوامل حماية

فبلاش تبخلوا بها علي بعض.

قدموا حب و دعم وزعوا تشجيع و فرح وأمل و لقلبكم السلامة و لحبايبكم .

دمتم بعافية و صحة نفسية أحبائي.

الانتحار
المنتحرين

شاهد أيضاً

الكنيسة القبطية

موضة صفع الجمهور

كان ارحمهم الفنان احمد عبد العزيز عندما إنتهر احدهم عندما وضع يده على كتفه ومع …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.