الجمعة , مارس 29 2024
الكريسماس

عيب بجد

بقلم / ماجدة سيدهم

مش علشان حضرتك قولت ميري كريسماس ولا نزلت واشتريت لك شجرة ميلاد وزينتها ولا اتصورت جنب سانتا كلوز ولا بالصدفة كنت بأوروبا فأنت كدا بقيت متحضر وواد متحرر وهاي كلاس ..

لا حضرتك انت بس بتحاول تتحدي الصراع اللي جواك مابين مظاهر الاحتفال بميلاد يسوع بشكله الراقي المبهج في العالم كله وبين أفكار سلفية مشوهة اتزرعت في دماغك من سنين وقتلت فيك الفهم والحياة ..

ماهو مش معقول ياعسل تشارك في احتفالات الكريسماس بخلفية سلفية ..بدليل مفهومك الشاذ اللي بتكرره كل سنة فتقول ” وطبعا في الكنيسة حاتقضوا ليلة مسخرة طول الليل

شوف حضرتك صوم الميلاد دا ٤٣ يوم مع صلوات كنسية ملتزمة وطقوس عبادة مستمرة

وأما ليلة رأس السنة الميلادية المعنية واللي بيقام فيها قداس احتفالي كبير.

بتشوفه حضرتك

بالفضائيات علنا بكل تفاصيله .فأكيد واضح يعني أن لا فيه سكر ولا عربدة

ولا مساطيل واقعة على بعض ولا فاتحينها درمغة

دا غير أن كتير من الأحباء المحترمين بيحضروا القداسات دي معانا

ماحدش طلع منهم وحكى عن مسخرة جوا الكنائس ..

يعني ناس واقفة تصلي لله ليحل الحب والسلام والبركة على كل البشر وعلى بلادنا

فكل الأقباط ياجميل أو الغالبية منهم بيكونوا في الكنائس .. مش ف البارات ولا زاحمين حضرتك على محلات الخمور ولا الكباريهات .. فعيب ياللي عامل فيها متحضر لما تقول ” دا انتو حاتقضوا ليلة مسخرة وبوس وتحسيس ..”

للأسف دا مش ذنبك ..دا ذنب الاغبياء اللي استغلوا جهل سياتك

وشوهوا روحك بالنجاسات وعملوا منك كائن غلط

بس الحقيقة المشكلة الأخطر انك انت نفسك مش عاوز تفهم

أو بالأصح خايف تعرف وتصدق الحقيقة أحسن تتصدم في مفاهيمك اللي هي برضه غلط

فكل سنة بتقول نفس الاستفسار وكل مرة الناس تجاوب وتشرح وبرضه تصر على الحماقة ..

التنوير والتحضر سلوك من جوا مش شوية مظاهر من برا .. لسه شوية ومسيرها تنضف ..

( الرسالة للبعض )

شاهد أيضاً

يتساءل الجهلاء : أليس المحجبات مثل الراهبات؟

إسماعيل حسني الراهبة إنسانة ميتة، صلوا عليها صلاة الميت يوم رهبنتها رمزاً لمغادرتها العالم المادي، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.