جريدة الأهرام الجديد الكندية 
مقالات مشابهة
نشر الدكتور سامح أحمد الطبيب المصرى الذى يعمل بمدينة بوسطن الأمريكية والمصاب بفيروس كورونا على صفحته الشخصية تعليقا حول حجز سكان عدد من العقارات بمدينة بورسعيد قائلا
أخبار عن مجموعة عمارات في بورسعيد تم إغلاقها بسبب وجود إصابات للسكان فيها بفيروس كورونا القاتل
الحكومة قفلت العمارات علشان تمنع انتشار الفيروس وفي نفس الوقت يأتون للناس فيها بأطعمة من غير ما يخرجوا
بصراحة تصرف حضاري من الدولة بس مش كامل لأنه مؤقت
مجموعة اقتراحات في الموضوع:
١- تعميم الإغلاق وحظر التجول الكامل في كل مصر وأنا متأكد أن القيادة السياسية عندها القدرة تأخذ قرار بالقوة دي مع عمل مطابخ ميدانية لضمان وصول الأكل للشعب
٢- وقت الحروب في روسيا الجيش عمل مطاعم ضخمة في الميادين الكبيرة لصرف أكل لأحياء كاملة بمطابخ ميدانية بحلل ضخمة بحيث يوصل الأكل لكل الناس اللي مش قادرين يخرجوا من بيتهم
في وجود وباء زي الوضع الحالي ممكن ده يتعمل بس بشكل يمنع انتشار الفيروس بحيث يفضل السكان في بيوتهم ويعين قائد الميدان لكل عمارة واحد من السكان يبقى مسئول عن توصيل الأكل لباقي السكان
٣- بالنسبة للمستشفيات لازم يتعمل خيام عزل قدام المستشفى بضغط جوي سالب لمنع نشر الفيروس في الجو وبسراير مستشفى ميدان عسكري لمنع نشر المرض في باقي مرضى المستشفى
٤- بالنسبة للعنايات المركزة أنا اقدر اشرح لأطباء العناية أزاي يوصلوا ٩ مرضى على جهاز تنفس صناعي واحد لقلة عدد الأجهزة
٥- أتعلموا تعملوا عيش في البيت لمنع التجمع أمام المخبز
٦- السيدات في المنازل أتعلموا تحلقوا لأزواجكم وأطفالكم في البيت
٧- اقترح توقيف حركة المترو بالكامل ومنع حركة المجاميع زي اللي ظهر في الفيديو البشع اللي الناس فيه زحمة جدا في وقت انتشار الفيروس
٨- في المستشفيات لازم منع الزيارات نهائي وما يدخلش إلا المريض فقط
٩- تحويل مستشفيات بالكامل أو نصها إلى وحدات عناية مركزة وتدريب أطباء على تشغيل أجهزة التنفس الصناعي
١٠- فتح الصيدليات لتوصيل الأدوية فقط للمنازل عن طريق مناديب العمارات المخصصين من الجيش المتواجد في الميادين
١١- توفير أجهزة الكشف السريع عن الفيروس اللي بيطلع النتيجة في ١٥ دقيقة ويتكلف ١٥٠ جنية الاختبار الواحد
١٢- توفير علاجات الفيروس عن طريق أطباء يتم اختيارهم لمنع نقص الدواء وضمان وصوله لأكبر عدد من المرضى
١٣- إعفاء التليفون والإنترنت من الفواتير الرسوم والفواتير لتشجيع الناس المحجوزين في البيوت
١٤- تقديم نشرات متواصلة في التليفزيون لشرح الحالة للشعب وإرشادهم لأفضل طرق الوقاية من الفيروس بغسيل الأيدي مع توزيع المطهرات على السكان عن طريق مناديب العمارات
١٥- التقليل من خطاب الكراهية في الإعلام لان الوقت اللي المفروض مصر تشتغل بكل طاقتها كشعب موحد ضد خطر قاتل
أنا شخصيا قمت كل ما كتبته انتقاداً للنظام مش علشان أنا شايف البلد اتصلحت تماما زي ما أحب أشوفها لكن علشان المصلحة العليا للبلد أهم من الاختلافات والخلافات وحقيقي ده مش وقته
لما نعدي الأزمة على خير أبقى اشتمني زي ما أنت عايز وقول عليا اللي نفسك فيه
انا أمتلك الشجاعة الأدبية اللي تخليني اعتذر لأي حد ضايقهم كلامي قبل كده لان الحدث مصيبة ومش وقت النكت والهزار فلو زعلتك حقك عليا
أنا لو كانت صحتي كويسة كنت نزلت بنفسي أساعد حتى وأنا مواطن أمريكي بس مصر لها حق عليا
أهم حاجه دلوقتي حاول تنقذ نفسك وأهل بيتك واهم منهم بلدك
