الجمعة , مارس 29 2024

وحانعدي الشلاحات (الجيش الأبيض والاستهتار الأسود )

بقلم / ماجدة سيدهم

مش حاتكلم عن أزمة الأطباء ولاحاتكلم أنهم أول من دفعوا التمن و..لكن خلينا في استهتار معاليك الأسود ..

في الأول كلنا عارفين ان الدولة وقعت في خطأ كبير جدا في رهانها على وعي الشعب وكان لازم وحتمي تطبيق عقوبات توجع الجيب على اللي يخترق قوانين الحظر والوقاية خصوصا ان الدولة ماقصرت في حملات التوعية ..

لأن هو حاجة من الاتنين

ياما أنتو مغيبين. لدرجة مش عارفين الشعب اللذيذ دا لما يتساب له الحبل على الغارب من غير أي التزام وتتكل على وعيه حايوصلنا لفين .. أو انكوا عارفينه صح ولعبتوا على رهان الفيرس نفسه وبكدا عفارم عليكوا كسبتوا الرهان …

بس على فكرة الشعب نفسه ضحك على حكاية الوعي دي لما فطس من الضحك والزحمة ووصل بينا هيلا بيلا كدهو للشلاحات وبقينا ٢٠مليون مرة واحدة ..
لأ ولسه الوعي دا محضرلكوا الكبيرة وحايحدي الشلاحات انشاء الله بصاروخ دوغري ..

فيا حضرة المستهتر اللذيذ.. كان لازم تفهم كويس لما دول العالم المتحضر والملتزم أوي .. الكورونا بهدلته إزاي وأخدته وش ورا التاني .. فكان لازم تفهم أننا هنا في المحروسة بإمكانيتنا دي لازم حانتشلح ..

ودا التعبير اللي انتشر في بداية الأزمة لما الناس اللي بتفهم صرخت وقالت الشارع اللي حاتعتمدوا على وعيه دا حايودينا الشلاحات يعني حانتشلح يعني كارثة غير مسبوقة .. تمام كدا

تقوم حضرتك تستخف دمك وتعملي فيها سبع رجالة ف بعض وانك الواد اللي مايقدر عليه حد ..أو أنك المؤمن اللي مش حايمنع قدر ربنا ومكتوبه ..
ونشوف زحام غير عادي بالشوارع والأسواق والمحلات..وكمان بتستظرف و نازل تتظاهر وتفطر رمضان على الكورنيش ..

خلاص ماتجيش دلوقت تصرخ وتولول وتسب وتهين في الدكاترة والدولة والحقنا ياسيسي ..ويا حكومة (**** ) ومافيش مشفيات تستقبلنا ..الحقونا ياناس الحكومة بتموتنا ..أحنا بنموت ياسيسي ..

كان لازم تعرف ان فتونة حضرتك الأسابيع اللي فاتت بندفع تمنها دلوقت ..ولازم ياظريف كمان تتوقع الأسوا برضه نتيجة استهتارك لحد دلوقت
ياترى مع الزيادة المرعبة دي لسه ماتعلمتوش …انا متأكدة انكوا حاتلتزموا غصب عنكوا لما تلاقوا الخطر وصل جوا البيوت ..

بس للأسف كل اللي بنحكيه هنا أو حتى بالاعلام مابيوصلكوش خالص … أيوه للأسف إحنا بنكلم نفسنا والناس الي في الشوارع في حتة تانية خالص ..
يبقى الغرامات اللي توجع الجيب هي الحل ..دا لو عاوزين ..

بس أحب أفكركوا .. بالمعدل دا ..حانعدي الشلاحات ..

الجيش الأبيض

شاهد أيضاً

يتساءل الجهلاء : أليس المحجبات مثل الراهبات؟

إسماعيل حسني الراهبة إنسانة ميتة، صلوا عليها صلاة الميت يوم رهبنتها رمزاً لمغادرتها العالم المادي، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.