الثلاثاء , أكتوبر 26 2021
ماجدة سيدهم

اللبس الشرعى عمل خلل نفسي خطير (حرام عليكوا شوهتوا ستات مصر )

بقلم / ماجــدة ســـيدهم

لمجرد لفت النظر بس وإثارة الجدل بنلاقي كل سنة وكل صيف تطلع مؤمنة أو شوية من المؤمنات ويعملوا دوشة على المايوه الشرعي واللي أطلقوا عليه اسم البوركيني تقربا من البيكيني ..ماعلينا .

حبيبتي من غير لف ولا دوران .. الحقيقة اللي الكل عارفها وإنت متأكدة منها وماحد هايقدر يقولها لك مباشرة أن شكل المايوه الشرعي الكامل على الشواطيء وعلى حمامات السباحة أسوأ اختراع وغير حضاري بالمرة .. لا يليق بالسياحة ولا يليق بمستوى الفندق العالي اللي حضرتك نازلة فيه ولا بطبيعة المنتجعات السياحية ولا يليق بالمرأة المصرية أصلا .. ولايصلح للنزول به في حمامات السباحة اللي لها قواعد وشروط و آداب عامة متعارف عليها وأنتو عارفينها كوبس جدا.. يبقى ليه كل سنة نثير نفس المشكلة …تحت بند اضطهاد المايوه الشرعي ..!

ورغم كدا ولأنه اصبح امر واقع فيه أماكن كتير بتخصص وبتسمح بنزول المايوه الشرعي مرعاة للحرية الشخصية ..! وليه كتير بيحصل الاصرار على استخدام حمامات السباحة المخصصة لغير المحجبات(بفلوسنا ) .

وكأنه خايفين تفوتكو فرصة التطفل والشغب والاستفزاز ..في حين غير المحجبات مابيقتحموا ولابيفرضوا نفسهم على أماكنكوا ..

بشكل عام ومن غير زعل كام نقطة كدا على الهامش : * مهما ابتكرتوا وحسنتوا ولونتوا في هذا المدعو المايوه الشرعي هايفضل عنده مقدرة غريبة أنه يقلل جدا من قيمة أي ست لبساه مهما كان وضعها وعلا شأنها. مهما اتنكت وقالت كلمتين انجليزي على ڤيربين فرنساوي ..

* مجرد سؤال بجد ..ليه يابنات ياحلوات أحيانا بنلبس البيكيني فوق المايوه الشرعي أو مغطية ملامحك بماسك العفة ..المنظر دا بنشوفه كل سنة . .هل هو استعراض أو روشنة مثلا .. دا مدلولة عدم ثقتك بنفسك دا غير انه تلثوث بصري وافساد للذوق العام وانك بتلبسي ما يرضي الناس اللي انتي خايفة منهم ..ومع ذلك انتي حرة ..بس نحترم قواعد المكان..

اللي بيحصل ايه.؟ ..غالبا لما بتبقى عارف ان فيك حاجة مش مظبوطة ولبسك أو أسلوبك مش ماشيين مع طبيعة المكان فتحس انك غريب ومش متأقلم مع حد و أنك أقل من الموجودين رغم أن مافيش حد منتبه لك أصلا فيكون الحل الوحيد هو افتعال أي مشكلة أو لفت النظر بشيء غريب تخلي الناس تبص وتنتبه أن حضرتك موجود

وعلشان أحنا هارشين دماغ بعض فما فيش غير مشكلة واحدة اللي تاكل مع الشعب المؤمن والكلام يكتر عليها وتبقى حديث الساعة ونبان مظلومين هي أننا نتهم إدارة الفندق أو المكان اللي نازلين فيه بالعنصرية وبقهر العفيفات من نزول البيسين بكوم القماش الملفوف على بعضه..

بالظبط زي الشخص اللي مالوش لازمة سواء جوا أو برا المحروسة فينتبه ان كفاية عليه أوي أنه مؤمن .. يقوم يجي قدام قطر أو باص في قلب ميدان عام ويفرد المصلية ويكبر ..مش مهم أنه خرق القانون والقواعد العامة وعطل الطريق ولا المهم انه مركز في الصلاة أصلا ولا لأ .. ..المهم ان الناس بصت عليه …

* ست الكل مادمت ارتضيتي تلبسي المايوه الشرعي بكل حريتك ومن كل روحك وقلبك وإخلاصك زي مابتقولي يبقى من فضلك خليكي واثقة من نفسك والتزمي بآداب المكان وبلاش تفرضي قناعتك واختيارك على حد لأنه مش من حقك … فما ينفعش مثلا أدخل الأوبرا وأنا لابسة شبشب واقول دي حريتي لمجرد ان ماعنديش بديل ..

فتفادبا لمشكلة كل سنة ..استمتعي بالمتاح ..البحر واسع وأروع وأحسن من البيسين على فكرة .. و من غير مانكسر القواعد والأصول ونبقى أشخاص مزعجين .. المفروض أنك أنثى .. فخليكي رمز للرقة والهدوء والنضج السلوك المتحضر وقد المسؤولية ..مش عيال ..يا عاوزين من دا ياندب بالرجل .. عيب في حقك وفي حق بلدنا ..

* بمناسبة المايوه الشرعي والمانيكير الشرعي والمكياج الشرعى والبيرة الحلال والمورتاديلا والسلامي الحلال ورقص ملتزم وغير ملتزم .. حتى العلاقات المنحرفة اصبح فيها الحلال والحرام ..كل دا تحايل وتفسخ نفسي خطير .. . الحياة لاتحتمل كل هذا التعقيد ..الحياة أبسط واقصر مما تتصوروا

جربوا تعيشوا ..جربوا تهدوا …

شاهد أيضاً

المنسحبون من مشاهدة فيلم ريش اساءوا لأنفسهم وشككوا فى قدرات حكام مهرجان” كان “

أشرف حلمى أثار انسحاب عدد من الفنانين قاعة عرض الفيلم المصري “ريش” في مهرجان الجونة …

تعليق واحد

  1. عفوا لا يجوز أن تقولي عن اللبس الشرعي لديني أنه سبب لخلل نفسي و انه حرام علينا وكأنه سبب إجرام، رغم أن البنت تعرضت للتنمر والاضطهاد ولم تتنمر على احد، كفاية عنصرية بنت جسمها عزيز مش متاح لنظر الجميع وفي نفس الوقت بتعيش حياتها طبيعي ماذا يزعج العالم في هذا؟! لماذا تمنعوها من الحياة لمجرد أنها ترفض العري

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *