الأربعاء , أكتوبر 27 2021
المهندس أحمد عاطف

تفاصيل مبكية يسردها والد المهندس المقتول بشأن المتهم

نازك شوقى

كشف عاطف الشربيني، والد مهندس المنصورة القتيل، تفاصيل مقتل نجله، قائلًا: “ابني كان واخد شيكات على صديقه محمد أبوالعز بمبلغ 680 ألف جنيه، وزميله دا فلس ومعدش معاه فلوس، وابني الوحيد اللي كان واخد شيكات على الشخص دا لأنه كان واخد فلوس كتير من ناس في البلد”.

وأضاف “الشربيني” في مداخلة هاتفية لبرنامج “رأي عام” والذي يقدمه الإعلامي عمرو عبد الحميد، والمُذاع على فضائية “TeN”: “ابني كلم صاحبه محمد وقاله عايز الفلوس وطلب منه أنه يجيله عشان يأخذ فلوسه، واتقابلوا مع بعض وكاميرات المراقبة ظبطت ابني مع محمد أبوالعز واقفين على كوبري الجامعة في حته ضلمة، والقاتل مسكه خدره وزقه في النيل وسابوه ومشي”.

وتابع: “تاني يوم بسأل على ابني مراته قالتلي مباتش في الشقة، وأنا آخر مكالمة كلمته كان مع صاحبه عند كوبري الجامعة وقالي هجيلك بس عربية محمد صاحبي سخنت ومستنينها تبرد وهنيجي وجايز أروح ميت غمر”.

وأوضح: “ابني قالي هاخد الفلوس من محمد أبوالعز وامشي، والقاتل لما اتسأل عنه قال أنه أخد تاكسي ومشي، وبحثنا عن ابني في كل المستشفيات والمباحث بدأت تدور في كل الأماكن لحد ما توصلت إدارة مجلس حماية النيل بعد 10 أيام”.

وأكد: “الكراكة طلعت ابني من تحت وادي النيل، المتهم كان عامل تخطيط أن ابني يقع في النيل والمياه تجرفه ناحية دمياط والمشكلة تبعد عنه وربنا رايد يفضحه، وفضلت الجثة في مكان وقوفهم على الكوبري”، مضيفًا باكيًا: “ابني كان نايم في قلب المشرحة كان وشه أبيض وبيضح وزي ما بيقولي انا في الجنة يا بابا والله، وبطلب من الناس تفضل معايا ويتكاتفوا معايا عشان أجيب حق عيال أحمد ابني، وبشكر كافة القيادات اللي ساهمت في معرفة تفاصيل مقتل ابني”.

شاهد أيضاً

ياسمين صبرى تخرج عن صمتها لترد على هجوم والدها ” مفيش علاقة بينى وبينه”

نازك شوقى حلت الفنانة ياسمين صبري ضيفاً كريماً على برنامج ABtalks مع أنس أبو خوش …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *