الإثنين , نوفمبر 29 2021

مذيعة من فرق الإنقاذ

بقلم : ماجدة سيدهم

لما تطلع مذيعة بلا معنى كل دورها أنها يادوب راشقة في رجلين أيقونات شلة مهرجان الجونة للأزياء .. وتجاملهم على حساب بطلة فيلم” ريش ” الحائز على جايزة مرموقة بمهرجان كان للسينما العالمية ..وطالعة تجامل شلتها لتاخد بتارهم.. دي متوصية تمام . . يبقى كدا المشكلة مش مع الفيلم لكن مع البطلة الصعيدية البسيطة . يعني م الآخر كدا نفسنة نسوان لمؤاخذة ..(بس اوعوا تنسوا تستروا سمعة مصر) ..

لو كان شاغلها السينما المصرية الواو بجد ومتابعة أخبار السينما بالعالم كانت جريت كدا وعملت تغطية كاملة من ٤شهور عن حدث حصول أول فيلم روائي مصري في تاريخ السينما المصرية كله بجايزة مرموقه في مهرجان رفيع المستوى زي ” كان ” ..

كانت استضافت المبدع البارع عمر الزهيري مخرج الفيلم واتكلمت معاه عن الفيلم وقيمته الفنية ورسالته وإزاي اترشح لمهرجان كان وازاي وصل لأبطال الفيلم وتفاصيل كتير مهمة ..

.لكن راحت بكل خبث المذيعين الدليفري تقابل البطلة دميانةنصار متصورة نها بتستغل بساطتها ولغتها الصعيدية الجميلة ( أصل مصر .) وبملامحها الموروثة من الاف السنين من غير مجوهرات ولا تسريحة شعر .. علشان تعمل عليها نمرة طبقية يمكن تبرد نار المنسحبين والمحروقين وال مش فنانين نهائي ..وتقول أن السينما المصرية الجبارة والعظيمة خلت ناس عمرها ماكانت تحلم تيجي مكان زي دا “الجونة’ .

طيب اهدي على نفسك شوية ياست المذيعة …لأ خالص مش السينما المصرية ياقطة ( دي واقعة من زمان وبسببكوا ) . لكن فوز فيلم ريش في مهرجان كان هو اللي لفت الأنظار للفيلم ولكل فريق العمل وللبطلة اللي فعلا بموهبتها الفطرية كشفت زيف وحقد وغرور ونفوذ وعدم موهبة كل دعاة الفن في المحروسة ..

يعني لا أنت ولا شلتك ولا أي واحد هايموت نفسه على ستر سمعة مصر (هو فيه إيه ) عنده مشهد واحد يقدر ياخد عليه جايزة عالمية بأي مهرجان عالمي .مافيش ولا هايحصل

ماهو مش بتقل المجوهرات على الفساتين والبدل ولا بعدد الأفلام ..ولا بالشو الأعلامي.. ولا بالسجاد الحمرا اللي هوساكم واللي اتعملت لكوا مخصوص .. لكن بقيمة العمل الفني كفكرة ونص وإضاءة وإخراج وتفاصيل تانية ..

انتوا فاهين يعني إيه قيمة العمل الفني وتأثيره في المجتمع وعلى الحركة السينمائية.؟

افرحي يا ست البنات ياجميلة ..يامبدعة خلقة ربنا .. افرحي وإحنا كمان فرحانين معاكي ..شرفتينا وشرفتي مصر بأول جايزة عالمية بمهرجان كان .. وصدقيني كل اللي هاجم الفيلم وانسحب وهو متورط في رعونته وعمل فيها فارس الفن والوطن كله هايجيب ورا بس ياريت يفضلوا منسحبين

*اللي يقلق بجد …الناس دي إيدها طايلة . واخشي تدبير اي شيء ..انتماء سياسي معين .تمويل مشكوك فيه .حشر الطائفية (لعبة رخيصة أوي ) أو فجأة تطلع أوامر من الصهيونية العالمية اللي قاعدة لنا حتى في الريش . ودي وحدها كافية لتدمير الفيلم بفريق العمل كله .ودمتم ورغم أي شيء مبروك ريش ..

برافو دميانة نصار ( انتبهي حد يورطك تشاركي في فيلم فاشل عن قصد …دول كهف تعابين حتى لو اكتفيتي بريش .دا امتياز وفخر )

برافو الرائع عمر الزهيري

شاهد أيضاً

جمال رشدى

محمد الباز والسقوط المهنى في بئر نحيب ساويرس

جمال رشدي يكتب محمد الباز كاتب صحفي يمتلك ثقافة الكلمة، فرغم اختلافي مع بعض اطروحاته …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *