الجمعة , أبريل 22 2022
أخبار عاجلة
ماجدة سيدهم
ماجدة سيدهم

إهداء للحناجر

دا اهداء بسيط لكل حنجور بيحذر وبيطالب بعدم الاحتفال بأعياد الكريسماس ( إياك والشجرة ) لأسباب ما في نفسهم أو في مرجعيتهم التراثية .. عموما مافيش مشكلة خالص .. فالأمر لايعني المسيحين في شيء إطلاقا .. لأن التحذير والشو السنوي دا هو رسالة موجهة دوغري (مش بالظبط أوي ) للأحباء المسلمين فقط مش للمسيحيين خالص .. أما ليه “مش بالظبط” لأن الرسالة خايبة وهزيلة ولا تعني غير “عيني فيه وأقول عليه ٱخيه ”

ثانيا دعوتكم الهزيلة دي هي مطلب سنوي متكرر ..لكن إيه الجديد اللي قولتوه السنة دي مختلف ..! .. فاهدوا كدا وبلاش فرقعة فارغة وقصر ديل ..وبلاش تحثوا الناس على هدم شجرة الميلاد لأن فيه ناس تانية جميلة ومحبة للجمال اتكلفت وتعبت وزينت المكان .. وبصراحة كمان المنظر بيكون مهين وغير حضاري خاصة منظر البنات في مشهد همجي طالعين بالعبايات والكوتشيات يقطعوا الزينة ..

ثالثا .. المبررات اللي بتقولوها على سبيل التحذير والاكتشاف الخطير وأنكوا جبتوا التايهة بأن أعياد الكريسماس هي “عيد ميلاد الرب ” طيب زيدوا عليها ودا للعلم بالشيء ..

ميلاد المخلص المسيح يسوع .. ابن الله الكلمة المتجسدة .. عمانوئيل .. طفل المذود . الميلاد العذراوي ، لأنه ببساطة هو الميلاد المحرر والمغير في تاريخ الحياة .. ومع ذلك بنلاقي الميادين بتتزين أكتر والشجرة أكبر ..العروض والاستعدادات بأغلب المحلات والمولات رائعة وكتير من الشوارع مليانة هدايا و بابا نويل بكل الأحجام وتنويعات محلات الحلويات .. وفاترينات كتير بتعرض الملابس باللون الأحمر والأخضر كعنصر جذب دا موسم رزق ورواج وحركة وخير وبهجة على الوشوش لكل الناس ..الولاد الصغيرين بيفرحوا والصبايا بيفرحوا والناس مبسوطة وهي بتشتري حتى طلباتها العادية .. لأن الأجواء نفسها بتعطي سعادة ونشاط وصحة.. .ما أجرموش يعني ولا فقدوا إيمانهم .. فإيه بقى .؟! مشكلكتوا فين بالظبط ..!

فاهدوا كدا واتفرجوا وأنتو ساكتين ..سيبوا الناس تسرق الفرحة يوم .. مش يمكن يفرحوا .. ميري كريسماس على كل مصر الحلوة و على ناسها الحلوين الطيبين وعلى العالم كله …

شاهد أيضاً

كمال زاخر

مشاهدات اكليروسية!! (1)

كمال زاخر كان بيتنا الكبير يشهد العديد من زيارات الآباء الكهنة، اصدقاء والدى، ربما لأنهم …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *