الجمعة , مارس 29 2024
محمد عمران رئيس الرقابة المالية

محمد السيد طبق يكتب لا حياة لمن تنادي

تتكلم عن فساد محمد عمران المتحكم في البورصة من 2014 وسبب تراجعها وانهيارها يرقوة ويمدوله سنه رغم أنها معاه بقت اسوء بورصة في العالم وبتموت حرفيا هي وصناعها ومستثمرينها اللي ضاع شقى عمرهم وهو لسه قاعد على تلها ..

تتكلم عن وزارة المالية اللي شغالة تفصيل ضرايب ورسوم على الناس الحية والميتة ووصلت حتي استمارة البطاقة الشخصية اللي كانت ب15 جنية ل305 جنية… وإنها حرفيا بقت وزارة جباية وبتسرق جيوب المصريين ومبتفرقش بينهم .. يقوموا يخلوها هي المسئولة عن الإستثمار والتنمية رغم أنها وزارة بتاخد ومبتديش ومعندهاش خيال للإنتاج بس هو كدا وخلاص..

تتكلم عن فساد وزارة الصحة واللقاحات المضروبة والمنتهية صلاحيتها والأطباء اللي أخطائهم بقت فجه وبتتسبب في موت المرضى.. والمستشفيات الخاصة اللي بقت فواتيرها زي الفنادق الخمس نجوم والمستشفيات العامة اللي بقت مجرد ممر للمقابر.. يكتموا على الخبر ويمر بعد يوم واتنين ولا كأن فيه حد مات من الإهمال.

تتكلم عن وزارة النقل وحوادث الطرق اللي مصر بتحتل المركز الأول عالميا في حوادث الطرق والقطارات واللي كان بكتيره بيشيلوا فيها عامل التحويلة او رئيس هيئة السكة الحديد

وكان ممكن بيتوجه لوم للوزير دلوقتي الوزير بقى محصن وعاد الكلام عنه جريمة

وبيطلعلك لجان تهلفط وتقول عليك إخوان حتى لو اسمك حنا جرجس ميخائيل… .

تتكلم عن فساد وزارة الزراعة والفلاح اللي بيعيش حرفيا اسوء سنينه وغرقان في الدين والأرض اللي بقت عبأ عليه وشح المية..و الفشل في زراعة المحاصيل الإستراتيجية و أزمة اللحوم والدواجن

يقولك عايز اغير تقاوي القطن ومازرعش رز واغير كل سلالة المواشي المصرية… ويكلمونا عن أكل ورق الشجر..

تتكلم عن فساد الرياضة وتسيسها تحت خلفية الدواعي الأمنية وبرامج الرياضة والمليارات اللي بتندفع على صناعة فاسدة وكأن المواطن المصري هياكل بطوله وهيحارب غريمة وهينتصر عليه في ماتش انتصار الأبطال وإن سعادته يا عيني هو ومراته وعيالة إن الأهلي يكسب وميهموش إيجار وكهربا ولحمة ومدارس وخضار… #تتكلم عن وزارة الكهرباء اللي اجدع وصل كهربا كان في 2016 كان سبعين جنية للي عنده تكيف او اتنين ودلوقتي بقى بيدفع 2000 جنية رسمي… وإن الوزارة الميمونه في شهر 7 اللي جاي دا ال هتشيل الدعم خالص وهتبقى الفاتوره حرفيا لمن استطاع إليها سبيلا.. تتكلم وتقول ايه ولا ايه و هذا الوطن لا حياة فيه لمن تنادي

شاهد أيضاً

يتساءل الجهلاء : أليس المحجبات مثل الراهبات؟

إسماعيل حسني الراهبة إنسانة ميتة، صلوا عليها صلاة الميت يوم رهبنتها رمزاً لمغادرتها العالم المادي، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.