جريدة الأهرام الجديد الكندية 
مقالات مشابهة
كلمه إلي الفنان المحترم الكبير محمد عبده حق حضرتك تشوف بلدك أعظم بلد في الكون وكل إنسان طبيعي إنتماؤه أكيد لوطنه إحنا نشوف مصر أم الدنيا وحضرتك تشوف السعودية أبو الدنيا وغيرنا يوصف بلده بإنها ست الدنيا …
لكن حفكر حضرتك وأفكرني إن مصر كانت قبله لكل فنان عاوز يتشهر ويأخذ فرصة وجواز مرور للفن في العالم العربي كله ، وأكيد حضرتك كنت منهم وكنت بشوف حضرتك وأنا طفله في استوديو النهار بابا محمد نوح في بداياتك وجيت واتصورت جنب الهرم ، ومسكت عود وعملت أول البوم غنائي وإتشهرت واترحب بك في بلدك التاني مصر
ومن مصر وبمصر حضرتك النهارده بقيت علم كبير من إعلام الفن السعودي والعربي وعن جدارة واستحقاق ..
شوف حضرتك كده لو المصريين الفنانين والعازفين وقائدي الأوركسترا والكورال ومهندسين الصوت والاضاءة والشعراء والنجوم ماكانوش موجودين في الحفلات كانت حاتكون ليها الشعبية والنجاح والإقبال الي حاصل ؟؟؟
أو هل اساسا كان حينفع تتعمل ؟؟؟؟
يا سيدي الفاضل القدير مصر و المصريين تاريخ وخبرة وثقافة وتعليم وبصمة في مطبخ الفنون بكل ألوانها
سنين كتير نتعب كلنا في عدها .. بعترف احنا كسلنا شوية ..أو ظروفنا ملخباطانا وتوهتنا شويتين
بس وعد لحضرتك وعهد علي نفسنا إننا أكيد قريب قوي حنفوق وحنشد حيلنا وننجح أكتر وحنفضل نساعد كل بلد عربي شقيق علي النجاح والتحقق في كل مجال ، وكل موهبة من كل البلاد علي الانتشار زي ماعودناكوا .. وحضرتك تيجي تطربنا عن قريب في أم الدنيا مصر
كامل احترامي ومودتي
سحر محمد نوح
