جريدة الأهرام الجديد الكندية 
مقالات مشابهة
أوعي ..تقرب من الموجوع أوي أو المهزوم أوي والمطعون أوي أوي واللي اتكسر بجد واللي اتظلم واتقهر بجد وتقوله لازم تسامح وتحب وتعذر لأن ربنا قال كدا …أو أن دا اختبار للصبر والاحتمال ومكافأتك عند ربنا عظيمة
أو تقوله أنت ما تعرفش الخير فين دا اسمه قهر وتجاهل .. أوعى تروح للمخذول واللي عايش جوه
وحدته وأنت مبتهج وسعيد وتستكر عليه الحزن وتستغرب من كسرة نفسه وإحباطه وتقوله أجمد كدا
وأوعى تبكي أو لازم تنسي أو لازم تقاوم أو استغفر ربك أو لازم تروح الكنيسة
وتفرح وتهلل وتسبح معانا وأن وطننا في السما .. دا اسمه قهر وحماقة
وأوعى أمامه تسرد مواعظ عن فوائد الصلاة والاعتراف والتوبة كأن اللي هو فيه عقاب بالمرصاد عن ذنب
هو مايعرفوش ..أو أنك تضغط عليه باللوم وكان لازم يبقى حريص أكتر ..أو تقوله احمد ربنا
أنت أحسن من غيرك..أو شوف فلان وعلان ..أو شوف القديس فلان اتحمل كذا وكذا
وتفضل تحكي عن سعادتك والمعجزات اللي بتحصل كل يوم معاك لمجرد أنك المؤمن الواو
اللي يصلي و يواظب وبيتشفع .. دا اسمه قهر وغباء أوعى تتعامل مع صدمة اللي فقد غالي
بأن دا الكاس الداير وكلنا هنموت.. ويا بخته دا موتته حلوة أو هيروح مكان أحسن ..أو سابكوا مستورين
دا قهر وكبرياء.
للأسف دا بيكون رد فعل أغلب الناس اللطيفة بزيادة اللي ماختبرتش أي ألم اطلاقا
ولا تدرك يعني ايه جرح .. صدقوني مفيش أسهل من رص الأيات والشعارات الرنانة
يعني تقضية واجب والسلام .
الكلام شيء والاحساس شيء تاني خالص ..الموجوع مش محتاج يسمع كلام من حد
ولا تحكي له أمثلة ولا حكم ..بيحتاج بس ناس حواليه
دا بيطمنه وبيرفع عنه غم وحشة كبيرة مخيفة .. فيكفي أنك تكون جنبه بس
تحضنه من قلبك بجد ..الحضن حكمة.. الحضن كلام مابيتقالش ..طبطب على كتفه كل شوية
تبوس راسه وإيده وكأنك بتعتذر له عن الدنيا كلها ..يحس بالحب والاهتمام بجد وإن وجعه بيحترم ومقدر
دا أفضل جدا من أي كلام .. وسيبه يعبر عن حزنه وغضبه بطريقته يأخذ وقته لحتى يتوزان
سيبه يبكي ويحكي ويكرر نفس الكلام .. دا أبسط حق للمجروح فرجاء أوعى تتجاهل أو تستهتر
أو تستخف بمشاعر الوجع والمرارة لأي حد .. مش عارف تدعمه ولو بالسكات فالابتعاد أفضل جدا
رفقا بالمجروحين
