جريدة الأهرام الجديد الكندية 
مقالات مشابهة
أمل فرج
استغاثت سيدة عبر موقع التواصل الاجتماعي “فيسبوك” جراء تعرضها وابنتها للسحل والاعتداء داخل كافيه بمنطقة التجمع من مجموعة من طالبات مدرسة دولية.
حيث ذكؤت سيدة تدعى “نشوى هادي” تفاصيل الواقعة عبر صفحتها الشخصية
على موقع التواصل الاجتماعي “فيسبوك“: “أنا بشارك معاكم تجربة صعبة مرينا بيها علشان
نفتح باب الحوار ونعمل توعية، حصلت معانا حادثة مؤلمة جدًا، وعايزين نأكد على أهمية
احترام الكرامة والخصوصية، بنطلب من كل الناس الوقوف معانا في دعم القيم الإنسانية
والعدالة، لو حصل حاجة زي كده لأي حد تاني، ياريت الكل يقف معاه”.
وتابعت: “امبارح، كنت أنا وبنتي في محل شهير بالتجمع، حوالي الساعة 10 الصبح، قاعدين
نشرب قهوة، والمكان كان هادي، بعد نص ساعة دخل حشد من طالبات ثانوية عامة من مدرسة
إنترناشيونال معروفة، وتحول المكان لهرج ومرج، هزار بصوت عالي، زقّ، ورش مياه
لحد ما وقعوا على ترابيزتنا”.
وأضافت: “ابتسمت أنا وبنتي، وقلنا معلش، لكن لما شفت الأرض مليانة كلينكس وورق أكل
ضحكت لبنتي وعلّقت، وسمعتني بنت من المجموعة، فجأة ردّت عليا بتريقة
بصوت عالي Oh my god، يا جماعة طنط مضايقة، وضحكت هي وصاحبتها
قلت لها بهدوء: انتي بتتريقي؟، قالت لي: مالك؟ وبدأت ترفع صوتها وتشوح بإيديها”.
واستكملت قائلة: “قالت لي انتي عبيطة؟، فوقفت وقلت لها عيب احترمي نفسك
ردّت لو ما احترمتش نفسي هتعملي إيه؟، وفجأة بنت تانية دخلت تشتم وتزق
وألقوا علينا كابتشينو وسوائل، هدومي اتغرقت، وبنتي اتدلقت عليها كابتشينو سخن
وشعرها ودراعها اتحرق”.
كما قالت : “البنات شتموا بالأب والأم، واحدة منهم ضربتني بالقلم وطارت نضارتي
وسحبتني برا المحل وشدت طرحتي من على رأسي، والناس واقفة بتتفرج في الآخر الأمن
دخل وابتدوا يهدونا، لكن البنت وقفت تصورني من ورا الزجاج، وتضحك”.
وأضافت: “مامتها جات وبدل ما تعتذر، شتمتني وقالتلي إني أنا اللي غلطانة
رغم إن الناس في المحل شهِدوا إن بنتها هي اللي اعتدت عليا وقلعتني الحجاب وضربتني
رفضت أسكت، وحررت محضر، وعملت كشف طبي لإثبات الإصابات اللي حصلت لي ولبنتي”.
و ذكرت السيدة في نهاية منشورها: “الموضوع اتحوّل لجنحة، ورفضت الصلح
رغم محاولات تواصل من جدة البنت، والإصابات اللي اتعرضنالها، كدمة في ضلع بنتي
حرق وخرابيش في اليد، كدمة في كتفي اليمين.
